29. स्योमुकाड़ं ढाड़ंमी कु कथा।

ताकु ज्या ,पतरस सु यीशु जौ रुसु, "हे स्वामी ,जी अफी पु जो हुलाड़ं बार माफ चिड़ंनी जब उइसु जीकु खिलाफ पाप घा निचु? खा 7 जेयदु बार होना ?" यीशु सु लिसु , " 7 जेयदु बार महा , खलन कि 7 जेयदु कु 70 टुकसा ची गुना।" अन्दु कु द्वारा यीशु कु मतलब ली कि तुकतू र्खचुना माफ घामु चिडंनी। ते यीशु सु अन्दु कथा बतेसु।

यीशु सु लिसु परमेश्‍वर कु राज्य ताकु अनमा राजा कु बराबर लि जो अफी ढाड़ंमी सु हिसाब किताब घामु लागेसु। इदुकु ताकु ढाड़ंमी दलना कर्ज रु निजु जो 2,00,000 नीसु फा हिंड़ं होना लन घामु बराबर निजु।

खलन इदु ढाड़ंमी अफी कर्ज दामु मुतरसु , इदु हन्दु राजा सु लिसु , " अन्दु कु कर्ज चुकेमु हन्दु अन्दु हुरासीरी जो अज्यु अन्दु कु खु जो गुलाम कु रुप रु राड़ंसु।"

इदु ढाड़ंमी सु राजा कु लगान्दी अफी पुकटो रु लेलन सु लिसु , खलन कि अल्या रुड़ंजुम पड़ंयाड़ं ,अज्यु जी अफी कर्ज दलना जोड़ं दाड़ंदा। राजा सु ढाड़ंमी रु सोयोकाडंलन , इदु हन्दु उइसु इदुकु बिर कर्ज माफ किघादुसु अज्यु उइजो दिमु दासु।

खलन जो इदु ढाड़ंमी राजा कु लगान्दी सु भाड़ंरु दिसु , ते इदुसु उइजो ताकु साथु ढाड़ंमी छिइसु जो इदकु 4 पी हिड़ं कु लन घानु मी कर्जदार निजु। इदु ढाड़ंमी सु अफी साथु ढाड़ंमी कु कुचुमसु अज्यु लिसु , घेघु योरतो जिकु कर्ज निनि जी दाड़ंदा।

इदुकु साथु ढाड़ंमी सु उइजो पुकटो रु लेलन सु लिसु , खलन कि अल्या रुड़ंजुम पड़ंयाड़ं ,अज्यु जी अफी कर्ज दलना जोड़ं दाड़ंदा। खलन की अन्दु कु बजाय इदु ढाड़ंमी सु अफी साथु ढाड़ंमी कु जेल रु पांडंदुसु जब होना सु उइसु इदु कर्ज मुदाड़ंदा ते जेल रु सुड़ंयाड़ं।

जो खे ले लिजु इदु खिजु ढाड़ंमी सु ताड़ंसु अज्यु उइसु दलना परेषान लिजु। इदु राजा कु लगान्दी दरु दिजु ताकु इदु सु बिर बतेसु।

राजा सु इदु ढाड़ंमी कु हुलेन रेसु लिसु हे यानु ढाड़ंमी। जिसु घेघु कर्ज कु इदु हन्दु माफ घादियो की खलन की घे सु जिजो विनती घानसू। घे ले इदमना माफ घामु चिड़ंनी निजु। राजा अलाड़ं रिस रु निजु कि इदसु इदु यानु ढाड़ंमी ये जेलखाना रु कुपाड़ं दीसु जब होना इदु अफी बीर कर्ज मुदाड़ंदा।

जब यीशु सु लिसु , " जिकु भा जो थो रु निनि घेजो माफ मुघाड़ंदा घे अफी नुनु जो अफी सिसो सु माफ मुघाड़ंदा।"