30. यीशु 5000 ना सा फा मीजन कु छेगु दाड़ंदा।

यीशु सु अफी खास चेले कु प्रचार घामु अज्यु मीजन जो परमेश्‍वर कु ज्ञान दामु हन्दु पाड़ंसु दलना सु खीजु - खीजु गॉव पाड़ंसु। जब इदु इदोड़ं र्खचु थोकते राजे इदोड़ं यीशु निजु ते उइसु उइजो बतेसु कि उइसु खा घा निजु। ते यीशु सु उइ झील कु खिजु भंड़ं उइकु साथु ताकु शान्त जगह रु दिलन अल्या ज्या नेसमु हन्दु हुइसु। इदु ताकु नाव रु सुयडंन दिसु अज्यु झील कु खीजु भाड़ं रु ताजु।

खलन कि इदोड़ं दलना सु अनमा मी निजु उइसु यीशु अज्यु चेले नाव दिमु तांडसु। अन्दु मीजन उइजो तुकतु झील कु खीजु भांड़ं रु दिमु हन्दु झील कु थमरु - थमरु फुडंसू। जब यीशु अज्यु चेले होनसु ते मीजन कु ताकु पुनु भीड़ उइकु कुरुनजी निजु।

इदु भीड़ रु भुदाचुमे अज्यु सजंयन जो मुरुमु निजु 5000 ना साफा दलना हुरासीरी निजु। यीशु सु उई मीजन रु दलना तरस काड़ंसु। इदु मीजन यीशु कु हन्दु अनमा मला घुबरी रोनु मुनी निजु। खलन इदुसु यीशु परमेश्‍वर कु ज्ञान दासु अज्यु इदुकु घुन्दा रु जो मीजन काड़ंनु निनि उइजो जेनु घासु।

मुन्छु वक्त चेलो सु यीशु जो लिसु थन ढिल कलजु अज्यु तुकतू लगान्दी रु घबरी ले भाड़ं रु मुनिजु। अन्दु मीजन जो पाड़ंसु की खलन उई दिलन झामु हन्दु खेरी रेलन जालो।

ताकचा यीशु सु चेले जो लिसु ,घे उइजो झामु हन्दु खेरी दा, उइसु जवाब दासु निड़ं अनुमा घुम घा तेरसन ? जीकु लगान्दी नाही रोठा निनि अज्यु निसु न्या निनि।

यीशु सु अफी चेलो जो लिसु कि उइ भीड़ कु मीजन ची रु पचास - पचास कु बराबर रु सुयमु हन्दु लिसु।

तब यीशु सु 5 नाही रोठा अज्यु 2 निसु न्या कुरलन थो रु उड़ंसु अज्यु उदु जाती कुरलन परमेश्‍वर जौ धन्यवाद घासु।

इदो सु यीशु सु रोठा अज्यु न्या कु टुकड़ा घाल छायासु। उइसु मीजन दामु हन्दु अफी चेले कु इदु टुकड़ा दादसु। चेले इदु झाती कु छुजलन निजु अज्यु इदु खजायारी खत्म मुलिजु। इदु बिर मी झालन मजा राजु।

उदु नोगोन्दी चेले सु झाती ज कनेजी निजु इदु जा मुनिजु अज्यु चने 12 टोकरी रु तामु हन्दु जमा घासु। इदु बिर झाती उदु 5 नाही रोठा अज्यु 2 निसु न्या सु रा निजु।