35. सोयकाड़ंनु बा कु कथा।

ताकु ज्या ,यीशु इदु दलना मीजन जो ज्ञान दा निजु जो उदकु यनुसु नीनी थुमसीजु। मी जन टेक्स जोड़ं कुरमु मी अज्यु साथु रु खिजु मिजन निजु उइसु मूसा कु नियम मुमाने निजु।

अल्या यहूदी धार्मिक प्रधान सु ताड़ंसु की यीशु अन्दु मिजन कु रकसा अनमा फासु कि अनमा साथु काड़ंथे घा निजु। इदु हन्दु ताकु खिजु सु अनमा लिमु शुरु किघादुसु इदु यानु घा निजु। यीशु सु कांड़ंथे घामु यनसु इदु हन्दु उइसु उइजो अनमा कथा बतेसु।

ताकु मी निजु इदकु निसु सेनु निजु। मिनु सेनु सु अफी बा से लिसु हे बा जी जो इता जिघु हिस्सा चिड़ंनी। खलन बा कु अफी निसु सेनु जो अफी सम्पत्ति किदाड़ंदसु।

छाटोना मिनु सेनु अफी बिरझन कुरलन सु खिजु देश रु ताचु अज्यु पापी जीवन टाड़ंमु अफी बिर जोड़ं खत्म किघादुसु।

इदुकु नोगोन्दी जो भांड़ं मिनी सीरी निजु उसी देश रु ताकु भजयाड़ं अकाल कलनिजु ,अज्यु इदु कु लगान्दी राषन तुमु हन्दु जौड़ं मुनिजु। इदु हन्दु इदोजो लन छुझु इदु सूअर रो निजु। हुलाड़ं दुख अज्यु किफीनु निजु इदु सुअर कु झाती जामु चिड़ं निजु।

"हुलाड़ं र्खचु इदु मिनु सीरी अफी ज लिसु ,जी खा घामु 'जिघु बा कु बिर ढाड़ंमी कु दरो जामु हन्दु दलना निनि ,फिर ले जी दोयो फिलन नीनी। जी अफी बा लगान्दी थोकते दी अज्यु अफी बा जो ताकु ढाड़ंमी बनेमु हन्दु इदजो विनती घाघदी।"'

इता मिनु सीरी थोकते सु अफी बा कु सुड़ंरु धीमु हन्दु दी निजु। इदु अल्या हानम निजु ,इदु कु बा जो इदु ताड़ंसु अज्यु इदुरु सोयो कयाड़ं। इदु घुयलन सु अफी सीरी दरो दिजु अज्यु इदु गले लगेसु।

इदु सीरी सु लिसु हे बा जिसु परमेश्‍वर अज्यु घेघु खिलाफ पाप घाय निजु। जी घेघु सीरी लिमु कु जरुरत मुनि।

खलन बा सु अफी ताकु ढोड़ंमी घानु ज छाटो दिलन भिजायाड़ं जेनु घे कुरलन योनी अज्यु जिघु सीरी चुकसिमु ,,इदकु उंगली रु अंगूठी अज्यु इदकु लिगी रु पोला चुक सिदीनी। इता बिरजो जेनु पाठो सेयमु ताकी निड़ं झाजे अज्यु जेनु खिमु ,खलन की जिगु सीरी पुड़ं निजु खलन थन टाड़ंमु निनि। इदु कोहे निजु ,खलन इदु निड़ं कुताड़ंसु।

इदु हन्दु मीजन खुषी मनेमु शुरु घासु। अल्या ज्या लीमु कु नोगोन्दी रु पुनू सेनु रे रु लन घालन सुड़ंरु राजु उईसु बेरा अज्यु ढीमु यनसु अज्यु हैरान लिजु कि दो खा लि निजु।

ते पुनु सीरी सी पेयसु कि इदु हन्दु खुशी मने निजु खलन कि उइकु नुनु सुड़ंरु पिरानिजु ते इदु दलना रिस पिरा निजु अज्यु सुडंरु भुदरु दिमु मिलिजु। इदुकु बा सु भाड़ंरु रालन इदुसु उइकु साथु खुशी घामु कु विनती घासु ,परन्तु उइसु महा लिसु।

इदु पुनु सीरी सु अफी बा जो लिसु , अन्दु भिर हिडं रु जीसु घे हन्दु जेनु सीसो सु लन घायो खजयारी ले घेगु काड़ंथे महा मुलीयो खलन घेसु खजयारी झीजो ताकु मिनु पाठो ले मुदानसु खलन जी अफी साथु कु रकसा झाती जानी खलन घेघु अन्दु सीरी सु घेघु जोड़ं पापी लन रु र्खचु घासु अज्यु थन जब इदु राजु ते खुशी मानमु कु गेसु भजायाड़ं पुनु कुली कु सेदीसु।

बा सु जवाब दासु ,जिकु सीरी घे तुकतू र्खचु जीकु साथु ली अज्यु जो अल्या जिकु ली इदु बिर घेघु ली। खलन निड़ं हन्दु खुशी मनेमु जेनु ली खलन कि घेघु पु पुड़ं निजु , खलन थन टाड़ंमु निनि। इदु कोहे निजु ,खलन इदु निड़ं कुताड़ंसु।