42. यीशु थो रु दीनी।

घुबू ज्या परमेश्‍वर सु यीशु कु सिजीनिजु ते टाड़ंनु घासु , इदकु नीसु चेले लगान्दी कु सुखुड़ं दी निजु दीलन र्खचु इदु यीशु कु साथु जो लिजु इदु कु बारी रु काडंथे घा निजु इदजो यकीन निजु कि इदु मसीह निजु। खलन कि तब ले इदु किसेदिजु थन इदु भुदाचुमे लीदा कि दुबारा खर्चु किटाड़ंसु उइ मुपेनिजु कि घुबु काड़ंथे रु विश्‍वाश घामु ली।

यीशु कु उइकु लगान्दी रालन उइकु साथु दिमु हन्दु घासु खलन इदु मुसीतरयो ताड़ंयो। इदसु रुसु कि उइ खमकु बारी काडंथे घा निजु। उइसु इदोजो तुकतू ज्या रु यीशु कु साथु लिइनु बीर घटना कु बारी रु बतेसु। उइसु सोचुसू कि उइ खमरी परदेशी जो काड़ंथे घा निजु। जो मुपेनिजु कि यरुशलेम रु खा लिजु ली

तब यीशु सु उई समझेसु कि परमेश्‍वर कु वचन मसीह कु बारी रु खा लिसु खलन कि दलना नोगोन्दी भविष्य पेनु मी सु ली निजु कि यानु मीजन यीशु जो सतेसु अज्यु सेदमु। अज्यु अनमा ले लिसु कि इदु सुम ज्या रु रिझीयाड़ं।

जब उइ इदु भाड़ं होनसु जो भंड़ं निसु मी सीड़ंमु चिड़ं निजु। तब होना मुन्छु कल निजु। उइसु यीशु जो उइकु साथु सुयमू हन्दु यो लिसु खलन इदु उइकु साथु ताकु सुड़ंरु दिसु। अफी मुन्छु कु झाती झामु हन्दु इदु कुसयड़ंजु। यीशु सु ताकु रोठा कु कुरलन इदु हन्दु परमेश्‍वर कु धन्यावाद घासु, अज्यु इदु छायासु। अचानक उइसु किपेसु कि इदु यीशु निजु। खलन कि इतमझाया इदु उइकु मी कु लगान्दी कुहेजु।

इदु निसु मी सु ताकु खिजुजो लिसु इदु यीशु निजु। इदु हन्दु जब इदुसु नीड़ं परमेश्‍वर कु वचन कु समझेसु ते निड़ं दलना खुश निजु। खलन कि उई दिलन र्खचु थोकते यरुशलेम कु दिसु। जब उइ होनसु ते उइसु सीरी जो बतेसु यीशु टाडंना निनि निड़ं इदु ताड़ंसु ली।

जब चेले काड़ंथे घा निजु , यीशु अचानक सु सुड़ंरु इदकु साथु प्रकट लिसु। इदुसु लिसु घे जो शान्ति छुयालो , चेले सोचुसू कि इदु घुबरी भुत निजु , खलन यीशु सु लिसु घनी खलन जरनी, ली घनी अनमा खलन मु मुसोचोनु अनम हुचाना लि जी यीशु ली ? झिकु ला लिगी कु उड़ंनी भुत कु माघरतु अनमा गुराड़ं मुनी लिदी घुबरी ले जिकु लगान्दी ली। अनमा थेमु हन्दु कि भुत मुनिजु इदुसु झामु कु हन्दु अल्या थोजिसु उइसु इदोजो न्या कु ताकु टुकड़ा दासु अज्यु इदसु झासु।

यीशु सु लिसु जिकु बारी रु परमेश्‍वर कु वचन जो ली नीनी इदु पुरो कलजु। जीसु घनी कि बतेसु कि अनुजन कु लिम जोरुरी ली। तब यीशु सु उइजो परमेश्‍वर कु वचन झेनु सु समझेसु। इदसु लिसु दलना तुकतू भविष्य पेनु मी सु रिसु कि जि मसीह कु दुख अनमु पडियाड़ं सिजिमु पडियाड़ं अज्यु सु सुमझाया सिजलाड़ं र्खचु टाड़ंलन रिजम पडियाड़ं।

इदु भविष्य पेनु मी सु अनमा लिसु की जीकु चेले परमेश्‍वर कु वचन कु बतेड़ंदा। इदु बिर ताकु कु पक्षताप घामु हन्दु बतेड़ंदा। खलन की इदु अनमा लिजे परमेश्‍वर इदु कु पाप माफ घाघदा। जिकु चेले फुड़ं कु प्रचार घामु यरुशलेम शुरु घाघदन। तब अुइ बिर श्ग बिर जाती रु दंयाड़ं। घनी जन जिकु बिर ताकु काड़ंथे अज्यु लन कु गवाह लीलो जिसु लियो अज्यु घायो अज्यु इदु बिर काड़ंथे जिकु साथु लिजु।

खिजु 40 पिसा ज्या होना ,यीशु अफी चेले रु हुलाडं प्रकट लिजु। ताकु बार ते उसु ताकु ज्या रु 500 नाइ रा सु ज्याडं दल मी रु प्रकट लिजु। इदु सु अफी चेले रु हुलाडं तरीका सु साबित घासु इदु टाडंना घासु ,अज्यु इदुसु उइकु परमेश्‍वर कु राज्य कु बारी मे ज्ञान दासु।

यीशु सु अफी चेले सु लिसु ,परमेश्‍वर सु झिझो थो लोग अज्यु संसार कु बिर ताकु जन रु राज घामु कु अधिकार दासु। इदु हन्दु थन जी घनीजो लिदी की दिलन बिर जाति कु मिजन जो चेलो बनेमु। अनमा घामु कु हन्दु घनिजो उइकु भा ,सीरी अज्यु शु़द्व लिमे कु मुघं सु शुद्ध ढुबकि दामु लि। जो अल्या ले जिसु घनिजो आज्ञा दा नीनी बिर काडंथे मनेमु ले घनी उइ सिखेमु ली। चि घामु जि नोगोन्दी होना सु घनी रकसा सुयाडंसी।

यीशु कु सिजलडं खर्चु टाड़ंनु 40 पिसा ज्या कु नोगोन्दी ,इदु सु अफी चेले जो लिसु जब होना सु जिकु भा घनी ताकत मुदाडंदा तब होना यरुशलेम रु सियमु। उइ घनी रु शुद्ध लेमु पाड़ंमु कु हन्दु अनमा घाघदा। तब यीशु थो लोग रु ताजु। अज्यु ताकु खु सु इदु उइकु मीरु किचाहिजु। थो लोग यीशु बिर चीज रु राज घामु परमेश्‍वर कु दाहिनी रु कुस्यड़ंजु।