47. फिलिप्पी भाड़ं रु पौलुस अज्यु सीलास।

जब शाउल सु बिर रोमी राज्य रु फरेसी निजु ते इदसु अफी रोमी मुड़ं "पोलुस" लीमु शुरु घासु। ताकु ज्या पौलुस अज्यु साथु सीलास फिलिप्पी भाड़ं रु यीशु जो बारे रु जेनु फुडं सुनमे हन्दु दिसु। इदु भाड़ं कु बाड़ंरु यड़ं ती कु थमरु ताकु भंड़ं रु दिजु जो भंड़ं र्प्राथना घामु हन्दु दुमसि निजु। इदुड़ं उइ लुदिया मुड़ं कु ताकु भुदाचुमे जो छियनजु ताकु पन घानु निजु। इदु परमेश्‍वर जो जेनु खी निजु अज्यु इदकु काड़ंथे मानेजु निजु।

परमेश्‍वर सु लुदिया सु यीशु कु बारी रु फुड़ं रु विश्‍वाश घामु हन्दु लन घामु योग्य निजु। पौलुस अज्यु सीलास सु इदु अज्यु इदकु खु जो शुद्ध ढुबकि दासु। इदसु पौलुस अज्यु सीलास जो अफी सुड़ंरु सुडंमु हन्दु विलन रेसु ,इदु हन्दु इदोड़ं कुसूड़ंजु।

पौलुस अज्यु सीलास मीजन सु ज्यारी इदु भंड़ं रु छीही निजु जो भंड़ं यहूदी मीजन प्रार्थना घा निजु। ज्यारी जब इदोडं दी निजु ते गुलाम चुमे रु अशुद्ध लेमे नीजु इदकु नोगोन्दी दि निजु। इदु अशुद्धलेमे कु बारी इदु मीजन भविष्य रु बते निजु ,इदु हन्दु इदु भविष्य बते कु रुप रु अफी स्वामि कु हन्दु दलना जोड़ं कमेलन रामु निजु।

इदकु दिमु कु ज्या गुलामचुमे ढासी निजु ,अन्दु हुरासीरी परम प्रधान परमेश्‍वर कु सेवा घानु मी ली। पापो कु माफ घामु कु अम बते निजु। इदु झारी अनमा घा निजु उइकु पौलुस कुफरसी जु।

ताकु ज्या इदु गुलामचुमे ढासिमु शुरु घासु ,ते पौलुस सु उसीकु इदकु चेनदु फेरिसीलन अशुद्धलेमे जो लिसु ,यीशु कु मुड़ं सु अन्दु र्खचु दी। इलाड़ं व्क्त इदु अशुद्धलेमे सु इदु किसेदिसु।

इदु गुलामचुमे कु स्वामी दलना रिस पिरानिजु। उइसु कुपेनिजु कि खिजु इदु पापीलेमे उसी गुलामचुमे जन कु भविष्य बते मुतर निजु। अन्दु कु अर्थ निजु कि मीजन थन इदकु स्वामि कु जोड़ं मुदाघदा कि उइ इदकु भविष्य बतेलो कि उइकु रकसा रु खा लयाड़ं।

इदु हन्दु गुलाम चुमे कु स्वामी पौलुस अज्यु सीलास जो रोमी अधिकारि कु लगान्दी कुरलन दिजु। उइसु पौलुस अज्यु सीलास कमसु ,अज्यु इदु जेलखाना कु भुदरु किघादुसु।

उइसु पौलुस अज्यु सीलास कु जेलखाना कु अनमा भड़ं रु तासु जो भंड़ं रु भजाड़ं दल सैना निजु। दो होना की उइसु उइकु लिगी कु सिड़ं रु कुगेदिसु। खलन कि पौलुस अज्यु पेल मुन्छू कु वक्त परमेश्‍वर कु तारीफ घा निजु।

अचानक सु ताकु पुनु धरती लुकसिलन। जेल कु बिर दारम कुफुसू ,अज्यु बिर कैदि जन कु जंजीर फुलन सु किघेदिचू।

तब दरोगा रीजीसु। इदसु ताड़ंसु की जेलखाना कु दारफा कुफु निजु। इदसु सोचु कि बिर कैदी टाड़ंलन फुड़ंलन ताजु। इदु किजरजू कि इदकु फुड़ंलन दिमु कु कारण रोमी अधिकारी इदु सेदघदा ,इदु हन्दु इदु अफी सेयमु हन्दु कियानसी निजु। खलन कि पौलुस इदु ताड़ंलन ढासिजु। रुमजन। अफी नुकसान मुकरमू। निड़ं बिर दोना नियड़ं।

इदु दरोगा ढिड़ंलन सु पौलुस अज्यु सीलास कु लगान्दी रालन रुसु ,पापो कु माफ हन्दु जी खा घामु ? पौलुस सु जवाब दासु ,प्रभु यीशु रु विश्‍वाश घा ,ते घे अज्यु घेघु खु पापो कु माफ ताआड़ंदा। तब इदु दरोगा पौलुस अज्यु सीलास कु अफी सुड़ंरु कुरसू अज्यु इदकु टोला उरसु। पौलुस सु इदकु सुड़ंरु बिर मीजन यीशु कु बारी रु जेनु फुड़ं यनसु।

दरोगा अज्यु उइकु बिर खु सु यीशु रु विश्‍वाश घासु इदु हन्दु पौलुस अज्यु सीलास उइजो ष्शुद्ध ढुबकि दासु। तब दरोगा सु पौलुस अज्यु सीलास जो झाती दासु ,अज्यु उइ ताकु साथु रु खुष कल निजु।

खिजु ज्या भाड़ं कु प्रधान सु पौलुस अज्यु सीलास जो जेलखाना सु आजाद किघादुसू अज्यु फिलिप्पी सु दिमु हन्दु लिसु। पौलुस अज्यु सीलास लुदिया अज्यु अल्या खिजु साथु जो छियजु अज्यु इदकु नोगोन्दी भाड़ं सु ताजु। यीशु कु बारी जेनु फुड़ं दालन दिसु अज्यु कलीसिया रु विश्‍वाशी कु गिनती कुबढ़ निजु।

पौलुस अज्यु खिजु मसीही प्रधान सु दलना भाड़ं कु फेरसी निजु। उइसु मीजन जो यीशु कु बारी रु जेनु फुड़ं बतेसु। उइसु कलीसियाओ जो विश्‍वाश कु तुकतू दीमु हन्दु अज्यु ज्ञान दामु हन्दु हुलाडं ना चिठी रे रिसु। इन्दु खर्चो चिठी बाइबल किताब कलजु।