5. वादा कु सेनु।

अब्राम ताकू सारै कु कनान देश कुहोनचू , ची हिड़ ज्या इता तक इदू कु घूबरी सेनु मुनिजु। इदु हन्दू अब्राम कु भुदाचूमे सारै सु इदो जो लिचू खलन की परमेश्‍वर सु इता होना जिजो सेनु ढुडमू रु सक्षम मुनिजु। इदु हन्दू जी जन्म दामू रु इदु हन्दू सयानू निजु जिगू भुदाचूमे ढड़ं मी हाजिरा दो निनी। इदू सू ब्या घा। इदू जी हन्दू ताकू सेनु पेदा लिहेयन।

इदु अब्राम सु हाजिरा सु ब्या किघासु। हाजिरा कु ताकु सेनु जन्म दासु अज्यु अब्राम सु इदु मुड़ं इश्‍माएल तासु। खलन कि सारै हाजिरा जो ढासी निजु। जब इश्‍माएल कु 13 चेसम हिड़ं निजु। परमेश्‍वर सु दुबारा अब्राम सु काड़ंथे घासु।

परमेश्‍वर सु लिसु जी दलना शक्तिशाली परमेश्‍वर ले। जी घेजो वादा घादी। तब अब्राम सु थागरु रु लेलन प्रणाम घासु। परमेश्‍वर सु अब्राम सु इदु ले लिसु घे दलना जाती जो भा लिलो। घे घेजो घेघु वंश जो कनान देश दाड़ंदा जो इदकु अफी कु धरती लयड़ं अज्यु जी सदा होना घेघु परमेश्‍वर लयड़ं। घेजो अफी खु कु बिर होरासीरी खतना घामु निनि।

घेघु भुदाचुमे बिर ताकु सेनु ढुड़ंदा। इदु वादा कु सेनु निनि इदकु मुड़ं इसहाक तामु। जी इदु रकसा अफी वादा बनेमु खियाड़ं अज्यु इदु ताकु पुनु जाती लयाड़ं। जी इश्‍माएल जो पुनु जाती बनयाड़ं। खलनकि जी कु वादा इसहाक कु रकसा रायाड़ं। तब परमेश्‍वर सु अब्राम कु मुड़ं किखीदिनिजु अब्राहम किघादुसु इदु कु अर्थ निनि दलना जो भा। परमेश्‍वर सु सारै कु मुड़ं किखीदिनिजु सारा तामु। इदुकु अर्थ ली बिर कु मिना।

इदु अब्राहम अफी खु कु बिर हुरासीरी कु खतना घासु। लगभग ताकु हिड़ं होना इदु अब्राहम 100 रा हिड़ं कु निजु अज्यु सारा 90 टुकसा सुम हिड़ं कु निजु तब सारा सु ताकु सेनु ढुड़ंसु अनमा परमेश्‍वर सु उइजो लिसु उइसु इदु सेनु कु मुड़ं इसहाक तासु।

जब इसहाक जियनु लीजु परमेश्‍वर सु अब्राहम कु विश्‍वाश कु परीक्षा कुरमु हन्दु अफी कु ताकुना सेनु कु जि हन्दु बली कु रुप रु सेदुसु। फिर सु अब्राहम परमेश्‍वर कु काड़ंथे मानुसु अज्यु अफी सेनु बली दामु हन्दु किहायनसी निजु।

जब अब्राहम अज्यु इसहाक बली दामु कु भड़ं चेन्दु धी निजु तब इसहाक सु रुसु है भा जिकु दरु बली हन्दु सिड़ं निनि खलन कि बली हन्दु पाठो वा। अब्राहम सु जवाब दासु है जिकु सेनु परमेश्‍वर बली हन्दु पाठो कु व्यवस्था घाघदा।

इदु बली दामु भड़ं रु पिराजु अब्राहम सु इसहाक जो गुलन दाड़ंसिड़ं रु किचादुसु। इदु अफी सेनु सेयदी निजु परमेश्‍वर सु लिसु रुड़ंजन सेनु था कमा। थन जी किपेयो घे जिकु सम्मान घादन। खलन कि घेजो अफी सेनु जो बली दामु हन्दु कियाहनसी निजु।

अब्राहम सु उड़ंसु कि लगान्दी ज्या कु घुनदा रु ताकु करच्या ताडयो। परमेश्‍वर सु इसहाक कु बदला बली दामु हन्दु करच्या कु व्यवस्था घासु। अब्राहम सु खुश लिलन करच्या कु बली किघादुसु।

परमेश्‍वर सु अब्राहम जो लिसु कि घे जी हन्दु बिर झन दामु हन्दु तैयार निजु। दो होना सु अफी ताकु सेनु जो जी हन्दु बली दामु कियाहनसी निजु। जी घेजो आशिर्वाद धामु कु वादा घा निजु घेघु वंश तुखू कु तारा सु दलना निहेन। खलन कि घेसु जिकु आदेश मानुमु लि। इदु हन्दु जी घेघु खु हन्दु दुनिया कु बिर जाती जो आशिर्वाद धाड़ंदी।