12. बहारे निकरबार

इस्रायाली लोक मिस्र ले निकरी करी खुबे हरिक रेलाय। ही मन अबर दास न रेलाय, आवरी हाय मन किरिय र देस ने जायते रेलाय!जोन बले एस्रायाली मन मांगलाय, मिस्री मन हायमन के सबु देलाय, येती ले बी सोना आवरी चांदी आवरी मोहेंगा सामान देलाय। दुसर देस र खिनी लोक महापरू थाने बिसबास करलाय आवरी इ स्रायाली लोक मिस्र ले निकरलाय तेबे हायामन तिकर संगे होयालाय।

दीनर दाय बादरी ने गोटक खम्बा हतार छोमे –छोमे चलला। आवरी राती बेरा एय जोय र खम्बा बनी गला। महापरू जोन हाय बादरी र खम्बा आवरी जोय र खम्बा ने रेला, रोजे तिकर संगे रेला आवरी हाय हिंडबा बेरा तिकर मुखिया रेला। तीके एतकी कारबार रेला कि हतार पीटी हिंडबा रेला।

खिनिक बेरा र पाचे, फिरोन आवरी हतार लोक अपनार मोन के बदली देलाय। हाय मन इस्रायली मन के फिर ले अपनार दास बनायाबर चायते रयूआत। ऐई काचे हाय मन इसरायली मन र पीछा करलाय। ये महापरु रेला ही रेला जोन तिकर मन के बदली देई रेला। हाय ऐई काचे असं करी रेला काय काचे हाय चायते रेला कि हर जन जनोत कि फिरोन ले आवरी महापरू मिसरी मन र सबु देबता मन ले हाय, यहोवा, खुबे शक्तिसाली आय।

जड़ दाय इस्रायली मन मिस्र र सेना के आयते दखलाय तेबे तीके सुरता होयला कि ये फिरोनर सेना आय आवरी लाला सुमुन्द र मोजी ने लटकी गलाय। हाय मन खुबे डरी गलाय आवरी कान्दके रेलाय, ”हामी मिस्र के काय काचे छाड़लु? हामी मोरूआ बे!”

मूसा इस्रायली मन के बोलला, ”डर बार बंद करा!महापरू आजी तोमर काचे लड़सी आवरी तोमके बचायसी।”तेबे महापरू मूसा ले बोलला,”ये लोकमन के लाल समुंद र छोमे होयके बोलला।”

तेबे महापरू ने हाय बदरीर खम्बा के धरी इस्रायली मनर आवरी मिसरी मनर मोजी ने सोंगयला कि मिसरी लोक इस्रायली मन के दकके ना सकोत।

महापरू मूसा ले समुंद थाने अपनार हाथ बड़ाय बा काचे बोलला। महापरू हवा ले समुंद र पानी के डेबरी बाटे आवरी बुजनी बाटे करी देला, जार ले समुंद थानले गोटक रोड बनी गला।

इस्रायली लोक अपनार दुनो बाटे पानीर काति र संगे सुकला भुई थाने समुंद ने होई करी हिंडला लाय।

तेबे महापरू हाय बाट ले बादरी के उटायला मिसरी लोक इस्रायली मन बाची करी जायते दखला। मिस्रि मन तीके धरबा काचे तिकर पीछा करबार निर्णय धरलाय।

हाय मन समुन्द्रर जरिया ले हाय बाट थानले इसरायली मनर पीछा करलाय, मान्तर महापरु मिसरी मनके दराय देला आउरी तिकर रथ मनके आटकाय देला। हाय मन चिचाय के मुरायलाय, " पोरा! इसरायली मन बाटले महापरु लड़सी आचे!"

सबु इसरायली मन समुन्द्रर दूसरा बाटे केटलाय। तेबे महापरु मूसा के बोलला कि हाय फिरले पानी थाने हाथ बडाओ। जेबे मूसा अमता करला, तेबे पानी मिसरी सेना थाने घसरला आउरी जमतार अमति होईगला। सबु मिसरी सेना बुडी गलाय।

जेबे इसरायली मन दखलाय किमिसरी मन मोरी जाई रेलाय तेबे हाय मन महापरू थाने विस्वास करलाय। हाय मन विस्वास करलाय कि मूसा महापरू बाटले भाविस्यवकता रेला।

इसरायली लोग मन एकाचे बले खुबे हरिक रेलाय कय्काचे कि महापरू तिके मोरबा थानले आउरी दास होयबा थानले बचायला। अबर हाय मन महापरूर आराधना करबा काचे आउरी हातार आज्ञा के मानबा काचे आजाद रेलाय। इसरायली मन अपनार आजादीर परब के बनायबा काचे आउरी महापरू के हरिक करबा काचे गीत के गायलाय कायकाचे कि हाय तिके मिसरी मनर सेना ले बाचाय रहूआय।

महापरू इसरायली मन के हर बरस गोटक परब बनायबा काचे आदेस देऊआय। एटा याद दिलायबा काचे कि कसन महापरू मिसरी मन के हारायला आउरी हाय मनके दास होयबा ले आजाद करला। एटा फसहर परब बोलाय होई रला। इथाने हाय मनके परब बनायबा काचे गोटक अच्छा मेमना के बली करबातटा रला, हाके भूंजबाटा रला, आउरी हाके खमीर नोयला रोटी संगे खायबा टा रला।