45. स्तिफनुस आओरी फिलिपपुस

आकतुर मसीही अगुवामनर आने स्तिफनुस नाओर गोटोक माने रेला। सोबूलोक तार इज्जत करबाराए। पबीत्र आत्मा ताके बहुत ताक़त आओरी बुदी दी रेला। स्तिफनुस खुबे चमत्कार करी रेला। जेबे हाए जिसु उपरे भरोसा करबार बारेने हाएमनके सिख्या देला तेबे बहुत लोकमन तार उपरे बिस्वास करलाए।

गोटोक दिन, स्तिफनुस जिसुर बारेने सिख्या देते रेला, आओरी केतक असन यहूदी आएलाए जोन जिसु उपरे बिस्वास ना करी रेलाए आओरी तार संगे झगड़ा होएबाटा चालू करी देलाए। हाएमन बहुत रिशा होई गलाए, ई काछे हाएमन धर्मी अगुवामन लगे गलाए आओरी तार बारेने झूठ बोल्लाए। हाएमन बोल्लाए, “हामी स्तिफनुस के मूसा आओरी महापरूर बारेने खराप कता बोलबाटा सुनलु!” ई काछे धर्मी अगुवामन स्तिफनुस के धरलाए आओरी ताके महायाजक आओरी यहूदीमनर दूसरा अगुवामन लगे नेलाए। आओरी बी झुटा गवाह आएलाए आओरी हाएमन स्तिफनुसर बारेने झूठ बोल्लाए।

महायाजक स्तिफनुस के पोचारला, “काए ए लोकमन तोर बारेने सते बोलबाआचेत? ” स्तिफनुस महायाजक के जबाप देबाकाचे बहुत कता मनके बोलबाटा चालू करी देला। हाए बोल्ला कि अब्राहमर समय ले जिसुर समय तक महापरू इस्राएल आनर लोकमन काचे बहुत अलग काम मन करलाआचे। मातर लोकमन सोबुदाए महापरूर कता के ना मानलाए। स्तिफनुस बोल्ला, “तोमी महापरूर बिरुद्ध कता होएबा लोकमन आस। तोमी सोबुदाए पबीत्रआत्मा के स्वीकार ना करलास, आओरी सोबुदाए तार भविष्यबक्ता मनके मरते मारलास। मातर जोनटा हाएमन करिरेलाए तार हिसाबे तोमी आओरी बी खराप करलाआचास! तोमी जिसु महापरू के मारीदेलास!”

जेबे हाए धर्मी अगुवामन एटा सुनलाए, तेबे हाएमन एतक रिशा होएलाए कि हाएमन निजार कान मनके बंद करी देलाए आओरी ऊंचा आबाज आने कोरलार होएलाए। हाएमन स्तिफनुस के ओड़गोड़ी करी नगरर बारे नेलाए आओरी ताके मरते बारबा काचे ताके पोकना मारलाए।

जेबे स्तिफनुस मरते रेला, हाए डाकला, “ए जिसु, मोर आत्मा के स्वीकार कर!” तेबे हाए निजार मांडीखूटा दी घसरला आओरी गोटोक हार डाकला, “ए परभू, ए पाप के तिकर उपरे ना लागा।” तेबे हाए मरीगला।

हाए दिने, यारूसलेम आने रेबा बहुत सारा लोकमन जिसुर दास मनके सताएबाटा चालू करी देलाए, ई काचे बिसवासी लोक दूसरा जागाए पोलाएलाए। मातर एतार पाचे बी, जोनती बी हाएमन गलाए हाएमन जिसुर बारेने परचार करलाए।

फिलिप्पुस नाओर जिसुर गोटोक बिसवासी रेला। जसन कि दूसरा बहुत बिस्वासीमन करी रेलाए हाए बी यारूसलेम ले पोलाएला। हाए सामरियार जागाए ऊटी गला। हाएटी हाए लोकमन लगे जिसुर बारेने परचार करला। बहुत लोकमन तार उपरे बिस्वास करलाए आओरी उद्धार पाएलाए। गोटोक दिन, फिलिप्पुस लगे महापरू बाटले गोटोक सरगदूत आएला आओरी ताके झारे जिबा काचे बोल्ला, आओरी गोटोक बाट आने हिंडबा काचे बोल्ला। फिलिप्पुस हाएटी ऊटी गला। जेबे हाए बाट आने हिंडते रेला, तेबे हाए गोटोक माने के निजार रत आने जिबाटा दकला। ए माने कुश देशर गोटोक जरूरी अधिकारी रेला। पबीत्र आत्मा फिलिप्पुस के बोल्ला कि जाइकरी हाए मानेर संग-संग जा।

ई काचे फिलिप्पुस रत लगे गला। हाए सुनला कि हाए कुशी महापरूर बचन के पड़ते रेला। जोन यसायाह भविष्यबक्ता लिकी रेला हाए ताके पड़ते रेला। हाए पड़ते रेला, “हाएमन ताके बलि चेगाएबा मेंडि पारा नेलाए, आओरी जसन गोटोक मेंडि ओगाए रेउआए, हाए बी गोटोक गोट ना बोल्ला। हाएमन तार संगे गलत ब्यबहार करलाए आओरी तार इज्जत ना करलाए। हाएमन तार जीबन नेलाए।”

फिलिप्पुस हाए कुशी के पोचारला, “जोनटा तुइ पड़बी आचीस काए तुइ ताके बुजबी आचीस? ” हाए कुशी जबाप देला, “नाई। जेबे तक कोनी मोके एके ना बुजाए, तेबे तक मुई एके ना बुजके पारी। दयाकरी मोर लगे आसी बोस। यसायाह निजार बारेने लिकते रेला की कारी दुसरार बिसय आने? ”

फिलिप्पुस रत आने चेगी बोसला। तेबे हाए हाए कुशी माने के हाएटा सांगला जोनटा यसायाह जिसुर बारेने लिकी रेला। फिलिप्पुस महापरूर बचन के बहुत दूसरा भागमनर बी चर्चा करला। ई प्रकार ले, हाए हाए माने के जिसुर बारेने सुब सन्देस सुनाएला।

फिलिप्पुस आओरी हाए कुशी हिंडी-हिंडी पानी लगे आएलाए। हाए कुशी बोल्ला,“दक! ए लगे पानी आचे! मुई बपतिस्मा नेके पारी? ” आओरी हाए रत चलाऊ के थेबाएबा काचे बोल्ला।

आओरी हाएमन पानी आने गलाए, आओरी फिलिप्पुस हाए कुशी के बपतिस्मा देला। जेबे हाएमन पानीले बारे आएलाए, तेबे पबीत्र आत्मा अचानक ले फिलिप्पुस के उचाए करी कोनी दूसरा जागाए धरी गला। हाएती फिलिप्पुस लोकमन के जिसुर बारेने सांगबाटा चालू सोंगाएला।

हाए कुशी निजार घरर बाटे आगे बड़ी गला। हाए सर्दा रेला कि हाए एबे जिसु के जानते रेला।