44. पतरस आओरी यूहन्ना गोटोक भिकारी के भल करूआत

गोटोक दिन, पतरस आओरी यूहन्ना मंदिर गलाए। गोटोक खोड़िया माने भिक मांगबा काछे बाटे बोसी रेला।

पतरस हाए खोड़िया माने बाटे दकला आओरी बोल्ला, “मोर लगे तोके देबा काचे पैसा निआए। मातर जोनटा मोर लगे आचे हाएटा मुई तोके देबी आची। जिसुर नाओ आने, उट आओरी हिंडा बुला हो!”

हड़किच दाए, महापरू हाए खोड़िया माने के अच्छा करी देला। हाए एने हाने हिंडबार आओरी डोगाएबार, आओरी महापरूर स्तुति करबार चालू करी देला। मंदिरर दुआर आने रेला लोक भोकूआ होई जाई रेलाए।

हड़किच दाए लोकमनर गोटोक बड़े भीड़ हाए मानेके दकबा काचे आएलाए जोन खोड़िया रेला। पतरस हाएमनके बोल्ला, “ए माने अच्छा आचे, मातर ए गोट आने भोकूआ ना हुआ। हामी एके निजर शक्ति आनले अच्छा ना करू, नोएले ई काचे नाई कि हामी महापरूर इज्जत करूआए। बल्कि, हाए जिसु आए जोन ए माने के निजर शक्ति ले अच्छा करला आचे, ई काचे कि हामी जिसु उपरे भोरोसा करूआऊ।”

“हाएमन तोमी आका आस जोनमोन हाए रोमी राजपाल के जिसु के मरते मारबा काचे बोली रेलास। तोमी ताके मारी देलास जोन सोबुके जीबन देऊआए। मातर महापरू ताके मोरला थानले जीउ करला। तोमी ना समजलास कि तोमी काए करते रेलास, मातर जेबे तोमी हाए काममन के करते रेलास, तेबे जोनटा भविष्यबक्ता मन बोली रेलाए हाएटा पूरा होएला। हाएमन बोली रेलाए कि जिसु महापरू दुख उठाएसी आओरी मोरी जाएसी। महापरू एके ई हिसाब ले होएके देला। ई काचे एबे, पचताप करा आओरी महापरूर बाटे आसा, ताकि हाए तोमोर पापमन के धोइकरी साफ करी देओ।”

जेबे मंदिरर अगुवामन पतरस आओरी यूहन्ना के सुनलाए, तेबे हाएमन डरिगलाए। ई काचे हाएमन तिके धराएकरी जईल आने सोंगाए देलाए। मातर जोन पतरस बोली रेला हाए उपरे बहुत लोकमन बिस्वास करलाए। जिसु आने बिस्वास करबा लोकमनर संख्या बड़ी करी 5,000 होई गला।

दूसरा दिन, हाए यहूदी अगुवामन पतरस आओरी यूहन्ना के महायाजक आओरी दूसरा धर्मी अगुवामन लगे आनलाए। हाएमन हाए माने के बी आनलाए जोन खोड़िया रेला। हाएमन पतरस आओरी यूहन्ना के पोचारलाए, “कार अधिकार ले तोमी हाए खोडिया माने के अच्छा करलास? ”

पतरस जबाप देला, “ए माने जोन तोमोर छोमे ठियाँ आचे ताके जिसु जिसु महापरूर ताक़तर द्वारा अच्छा करलार आचे। तोमी जिसु के क्रूस उपरे चेगाएलास, मातर महापरू ताके आओरी जीउ करी देला!” तोमी ताके स्वीकार ना करलास, मातर जिसुर ताक़त के छाड़ी उद्धार पाएबार काई दूसरा बाट निआए!”

हाए अगुवामन चौंकी जाई रेलाए कि पतरस आओरी यूहन्ना बड़े हिम्मत ले कता होई रेलाए। हाएमन दकलाए कि ए माने मन सादा सीधा लोक रेलाए जोन पड़ी बी ना रेलाए। मातर पाचे हाएमनके हेत आएला कि हाएमन जिसु संगे रेलाए। ई काचे हाएमन तिके बोल्लाए, “हामी तोमके खुबे दंड देबू जोदि तोमी ए माने जिसुर बारेने लोकमन के काई आओरी संदेश देलास बोल्ले।” आसनी बहुत कता बोल्लार पाचे, हाएमन पतरस आओरी यूहन्ना के जाएके देलाए।