50. जिसु महापरू लेवटी आईसी

पूरा पूरी 2,000 बोरोस ले, संसार आने सोबू जागाए अदिक ले अदिक लोक जिसु महापरू जिसुर बारेने सब सन्देस के सुनबाआचेत। कलिसिया उन्नति करसी आचे। जिसु किरिया करला कि हाए संसारर सरबा दाए आफिस लेओट्सी। जोदि हाए एबे आपिस ना आएला आचे, तेबले बी हाए निजर किरिया के पूरा करसी।

जेबे कि हामी जिसु के आपिस लेओटबार के जागबु, महापरू हामके असन रीति ले जीबन जींबार इच्छा करूआए जोन पबीत्र आए आओरी जोन तार इज्जत करूआए। जेबे जिसु पृथबी आने रेते रेला तेबे हाए बोल्ला, “मोर चेलामन संसार आने सोबू जागाए लोकमन के महापरूर राजर बारेने सब सन्देस परचार करबाए, आओरी तेबे अंत आई जाएसी।”

बहुत जातिमन एबले तक जिसुर बारेने ना सुनला आचेत। सरग के लेओटबार पएले, जिसु मसीही मनके हाए लोकमन के सब सन्देस सुनाएबा काचे जोनमोन एके केबे ना सुनला आचेत। हाए बोल्ला, “जा आओरी सोबू जातिर लोकमन के चेला बना!” आओरी “कटाई करबा काचे बेड़ा पाकला आचे!”

जिसु ए बी बोल्ला, “कोनी मानेर कोमीया निजर मालिक ले बड़े ना रए। ई संसार आने जरूरी लोकमन मोके घृणा करलाए, आओरी मोर लागि हाएमन तोमके बी सताएबाए आओरी मरते मारबाए। ए संसार आने तोमी पीढ़ा सहबास, मातर मजबूत बना, काएकाचे कि मुई शैतान के हाराएली आची जोन ए संसार आने सासन करते रेला। जोदि तोमी अंत तक मोर बिसवासी लाएगर बनी रेबास, तेबे महापरू तोमके बाचाएसी!”

जिसु निजर चेलामनके ए बुजाएबाकाचे गोटोक काआनी सांगला कि जेबे संसारर अंत होएसी तेबे लोकमनर संगे काए होएसी। हाए बोल्ला, “कोनी माने निजर बेड़ाए अच्छा मोंजी रोपला। जेबे हाए सोएते रेला तेबे तार दुश्मन आएला आओरी गेऊंर मोंजी मोनोर मोजि गता झारर बूटार मोंजी के दबाए देला, आओरी पाचे हाए ऊटी गला।”

“जेबे बूटामन बड़े होएलाए तेबे कोमीयामन हाए माने के बोल्लाए, ‘ए मालिक, तुइ तो बेड़ाए अच्छा मोंजी रोपिरेलिस। तेबे ए थाने झारर बूटामन काएकाचे आचे? ” हाए माने जबाप देला, ‘खाली मोर दुश्मन आका ताके रोपबार चाएबाए। एटा मोर कोनी दुश्मन आए जोन असन करला आचे। ’”

“हाए कोमीयामन निजर मालिक के जबाप देलाए, ‘हामी ए झारर बूटामनके झिकि देले होएसी? ’ हाए मालिक बोल्ला ‘नाई। जोदि तोमी असन करबास तेबे तोमी केतक गेऊँ के बी झिकि देबास। कटाईर समय तक जागा। तेबे झारर बूटामन के खोदरा आने रुंडा ताकि तोमी ताके जलाएके सकबास। मातर गेऊँ के मोर लगे धरी आसा। ’”

चेलामन ए काआनीर मतलब के ना बुजलाए, ई काचे हाएमन जिसु के हाएटाके बुजाएबा काचे बोल्लाए। जिसु बोल्ला, “अच्छा मोंजी रोपबा लोक जिसु महापरू के आगे बड़ाएसी। बेड़ाए संसारर बड़ावा करूआए। अच्छा मोंजी महापरूर राजर लोकमन के बड़ावा करूआए।”

“झारर बूटामन हाए बदमास माने, शैतानर लोकमन के बड़ावा करूआत। हाए मानेर दुश्मन शैतानर बड़ावा करूआए, जोन झारर बूटामनके रोपी रेला। कटाई ए संसारर अंतर बड़ावा करूआए, आओरी कटाई करबा लोक महापरूर सरगदूत के बड़ावा करूआत।”

“जेबे संसारर अंत होएसी तेबे सरगदूत हाए सोबू लोकमन के गोटोक संगे रुंडा करबाए जोन शैतानर आत। हाए सरगदूत हाएमनके गोटोक बहुत गरम जोय आने पोकाए देबाए। हाएती हाए लोक भयंकर सताव आने कांदबाए आओरी आपणार दत्त रगड़बाए। मातर जोन लोकमन धर्मी आत, जोनमोन जिसुर अनुसरण करला आचेत, हाएमन तिकर महापरू बापर राज आने सूरज पारा चमकबाए।”

जिसु ए बी बोल्ला कि हाए संसारर अंत होएबाले पइले पृथबी आने लेओट्सी। हाए हाई हिसाब ले आपिस आएसी जसन हाए जाई रेला। मतलब, तार लगे असली सरीर रेसी, आओरी हाए आकास आने बादली आने सबार होई आएसी। जेबे जिसु लेओटूआए, तो सोबू मसीही जोन मोरी जाई रेबाए हाएमन मोरला थानले जीउ उठबाए आओरी तार संगे आकाश आने मिसबाए।

तेबे जोन मसीही एबे बी जीबीत आचेत हाएमन आकाश आने उठाया जिबाए आओरी हाए दूसरा मसीही लोक मन संगे मिलबाए जोन मोरला थानले जीउ उठला आचेत। हाएमन सोबू हाएती जिसु संगे रेबाए। तार पाचे, जिसु निजर लोकमन संगे रेसी। जेबे हाएमन गोटोक संगे रेबाए तेबे तिकर लगे सोबुदाए काचे पूरा शांति रेसी।

जिसु तार उपरे बिस्वास करबा सोबू लोक के गोटोक लाका मुकुट देबार किरिया करला आचे। हाएमन सोबुदाए काचे महापरू संगे सोबू चीज आने सासन करबाए। तिकर लगे अच्छा शांति रेसी।

मातर महापरू हाए सोबूर नियाए करसी जोन जिसु उपरे बिस्वास ना करेत। हाए हाएमनके नरक आने पोकाए देसी। हाएती हाएमन कांदबाए आओरी निजर दत्त रगड़बाए, आओरी आएमन सोबुदाए दुका सूका आने रेबाए। केबे ना लिबबा जोय तिके सोबुदाए जलाएते रेसी, आओरी कीड़ामन तिके खाएबाले केबे ना थेबेट।

जेबे जिसु लेओट्सी, तेबे हाए पूरा रीति ले शैतान के आओरी तार राज के मिटाए देसी। हाए शैतान के नरक आने पोकाए देसी। हाएती शैतान सोबुदाए काचे जलते रेसी, हाए सोबू संगे जोनमोन महापरूर कता के मानबार पालटा शैतानर पिटी बाटे जिबाटा बाचलाए।

काएकाचे कि आदम आओरी हवा महापरूर कता के ना मानी रेलाए आओरी पाप के ए संसार आने आनीरेलाए, महापरू ताके सराप देला आओरी ताके मिटाएबार काचे निर्णय करला। मातर कोनी दिने महापरू गोटोक नुआ सरग आओरी गोटोक नुआ पृथबीर रचना करसी जोन अच्छा रेबाए।

जिसु आओरी तार लोक हाए नुआ पृथबी आने रेबाए, आओरी हाएमन सोबुदाए काचे सोबू चीज आने सासन करसी। हाए लोकमनर आँखी ले सोबू आँसू के पोची देसी। एबे काई बी दुका सूका ना रे। हाएमन ना कांदेत। हाएमन बीमार ना होएत आओरी ना मरेत। आओरी हाएती काई बी बुराई ना रे। जिसु निजर राज आने न्याय हिसाबे, आओरी शांति संगे सासन करसी। हाए सोबुदाए काचे निजर लोकमन संगे रेसी।