49. महापरूर नुआ किरिया

गोटोक सरगदूत गोटोक धांगड़ी बाएले मरियम के बोल्ला कि हाए महापरूर बेटा के जनम देसी। हाए एबे कुँआरी रेला, मातर पबीत्र आत्मा तार लगे आएला आओरी हाए पेटेहारनी होएला। हाए गोटोक बेटा के जनम देला जार जाओ हाए जिसु सोंगाएला। ई काचे, जिसु महापरू आओरी माने दुनों आए।

जिसु बहुत चमत्कार मन करला जोनटा दकाउआए कि हाए महापरू आए। हाए पानी आने हिंडला आओरी तूफान के शांत करला। हाए बहुत बीमार लोकमनके अच्छा करला आओरी बहुत लोकमन ले दुस्टात्मा मनके निकराएला। हाए मोरला लोकमन के जियाएला, आओरी पाँच रोटी आओरी दुईटा माच के 5,000 लोकमन के खुआएबा काचे पूरा-पूरी भोजन आने परिबर्तन करला।

जिसु गोटोक महान सिख्या देबा लोक बी रेला। जोन सोबू हाए सिखाएला, हाएटा हाए अच्छा ले सिकाएला। जोन हाए लोकमन के करबा काचे बोलूआए हाए हाएटा के करबार ठीक आए काएकाचे कि हाए महापरूर बेटा आए। उदाहरन काचे, हाए सिकाएला कि दूसरा लोकमन के हाई परकार ले प्रेम करबार आए जसन तोमी निजके प्रेम करूआस।

हाए ए बी सिकाएला कि तोमके सोबू चीज ले अदिक आओरी निजार संपाति ले बी अदिक महापरू के प्रेम करबार आए।

जिसु बोल्ला कि संसार आने काई बी चीज के पाएबार ले अदिक अच्छा आए महापरूर राज आने होएबाटा। तार राज आने तोमोर ओलबा काचे जरूरी आए कि महापरू तोमके तोमोर पापमन ले बाछाओ।

जिसु बोल्ला कि केतक लोक ताके ग्रहण करबाए। महापरू हाए लोकमन के बाचाएसी। मातर दूसरा लोक ताके ग्रहण ना करेत। हाए ए बी बोल्ला कि केतक लोक अच्छा माती पारा आत, काएकाचे कि हाएमन जिसुर बारेने सब सन्देस के ग्रहण करूआत, आओरी महापरू हाएमनके बाचाउआए। मातर केतक लोक बाटर कठोर माती पारा आत। महापरूर बचन मोंजी पारा बाटे घसरुआए, मातर हाएती काई बी ना आकरे। ए लोक जिसुर बारेने सन्देस के ग्रहण करीदेऊआत। हाएमन तार राज आने ओलबाकाचे मना करीदेऊआत।

जिसु सिखाएला कि महापरू पापीमन के बहुत प्रेम करूआए। हाए हाएमन के खेमा करबार चाउआए आओरी हाएमनके निजार संतान बनाएबार चाउआए।

जिसु ए बी सांगला कि महापरू पाप के घिनाऊ आए। काएकाचे कि आदम आओरी हवा पाप करलाए, ई काचे तिकर सोबू बंस बी पाप करलाए। ई संसार आने रेबा सोबू गोटोक लोक पाप करूआत आओरी महापरू ले दूर आचे। सोबू लोक महापरूर दुश्मन आत।

मातर महापरू ए संसार आने रेबा सोबू लोक ले ए रीति ले प्रेम करला: हाए निजार गोटोक बोली बेटा के दी देला ताकि महापरू हाएमनके दंड ना दे जोन तार उपरे बिस्वास करूआत। एतार पालटा, हाए तार संगे सोबुदाए काचे रेबाए।

तोमी मोरबार लाएगर आस, काएकाचे कि तोमी पाप करलास। तोमके महापरू रिशा होएबाटा ठीक आए, तार पालटा, हाए जिसु उपरे रिशा होएला। हाए जिसु के क्रूसर मृत्यु दी करी दंड देला।

जिसु केबे पाप ना करला, मातर हाए महापरू के ताके दंड देके देला। हाए मोरी जिबाटा ग्रहण करला। ई रीति ले, तोमोर पापमन के आओरी ई संसारर रेबा सोबू लोकर पापमन के उठाए नेबा काचे गोटोक अच्छा बलिदान रेला। जिसु निजके महापरू काचे बलिदान करीदेला, ई काचे महापरू काई बी पाप के, ए लगले कि भयंकर पापमन के बी खेमा करूआए।

भले जोदि तोमी बहुत अच्छा काममनके करूआस, तेबे एतार द्वारा महापरू तोमके ना बाचाए। तार दोस्त बनबा काचे असन काई बी निआए जोन तोमी करके सकास। तार पालटा, तोमी बिस्वास करबार आचे कि जिसु महापरूर बेटा आए, आओरी हाए तोमोर पालटा क्रूस आने मोरी गला, आओरी ए बी कि महापरू ताके आओरी जीउ करी रेला। जोदि तोमी एतार उपरे बिस्वास करबास, तेबे महापरू पापमन के खेमा देसी।

महापरू हाए सोबू लोक के बाचाएसी जोन जिसु आने बिस्वास करूआए आओरी ताके निजर परभू स्वीकार करूआए। मातर हाए हाएमनके ना बाचाए जोन तार उपरे बिस्वास ना करेत। एटा काई मतलब नुआए कि तोमी धनी आस कि गरीब, माने हो कि बाएले, डोकरा हो कि धांगड़ा, नोएले तोमी कोनती रेउआस। महापरू तोमके प्रेम करूआए आओरी चाउआए कि तोमी जिसु उपरे बिस्वास करा कि हाए तोमोर दोस्त बनके सको।

जिसु तोमके डाकसी आचे कि तार उपरे बिस्वास करा आओरी बपतिस्मा धरा। काए तोमी बिस्वास करूआस कि महापरूर गोटोक बोली बेटा, जिसु जिसु महापरू आए? काए तोमी बिस्वास करूआस कि तोमी गोटोक पापी आस आओरी एटा कि तोमी महापरू द्वारा तोमके दंडित करबार लाएगर आस? काए तोमी बिस्वास करूआस कि तोमोर पापमन के मिटाएबा काचे क्रूस आने मोरला?

जोदि तोमी जिसु आने आओरी जोन हाए तोमोर काचे करला आचे तार उपरे बिस्वास करूआस, तेबे तोमी गोटोक मसीही आस! शैतान निजर अंदारर राज आने एबे तोमोर उपरे सासन ना करके सके। एबे महापरू निजर परकासर राज आने तोमोर उपरे सासन करूआए। हाए तोमके पाप करबा ले रोकी देला आचे, जाके तोमी करबाराए। हाए तोमके गोटोक नुआ, अच्छा जीबन देला आचे।

जोदि तोमी गोटो मसीही आस तेबे जोनटा जिसु करला आचे तार लागि महापरू तोमोर पापमन के खेमा करी देला आचे। एबे, महापरू गोटोक दुश्मनर पालटा गोटोक अच्छा दोस्त मानुआए।

जोदि तोमी महापरूर दोस्त आस आओरी परभू जिसुर सेबक आस तेबे तोमी हाए कतामनर पालन करबार इच्छा करबास जोनटा जिसु तोमके सिखाऊआए। भले तोमी गोटोक मसीही आस, शैतान एबे बी पाप करबा काचे तोमोर परिख्या करसी। मातर महापरू सोबुदाए हाए करूआए जोन हाए बोलूआए। हाए बोलूआए कि जोदि तोमी निजर पापमन के मानबास, तेबे हाए तोमके खेमा करी देसी। हाए तोमके पापर बिरुद्ध लड़बा काचे ताक़त देसी।

महापरू तोमके पार्थना करबा आओरी तार बचन के पड़बा काचे बोलूआए। हाए तोमके दूसरा बिस्वासीमन संगे मिसी करी तार आराधना करबा काचे बी बोलूआए। तोमके दूसरा लोकमन के बी सांगबार आचे कि हाए तोमोर काचे काए करला आचे। जोदि तोमी ए सोबू काम के करबास, तेबे तोमी तार गोटोक अच्छा दोस्त बनी जिबास।