10. दस संकट

मापरू मूसा आवरी हारून के जागरत देला, फिरौन हूड होयसी। जैबे हाँय मन [फिरौन लगे गलाय तैबे हाँय मन बोललाय, इसराइली लोकर मापरु ये बोलसी आचे, “मोर लोक के जायके देस।” मातर फिरौन तिकर ना सुनला आवरी इसराइली लोक के जायके देबार छाड़ी हाँय हाँयमन के आवरी कुबे मसागत करबा काचे बीवस करला।

फिरौन हाँय लोक मन के ना जायके देबा काचे होयते रला, ऐइकाचे मापरू मिसर देश ने दस संकट के पटायला। ये संकट ले , मापरु फिरौन के दखायला कि फिरौन आवरी मिसरर देबता मन ले कुबे शक्ति बिता आय।

मापरू नील नदीर पानी के लहू बनाय देला, मातर फिरौन पने इसरायली लोक के जायके ना देला।

मापरू सबू मिसर देश ने बेढका के पटायला। बेढका के गूचायबा काचे मूसा के बिनती करला। मातर सबू बेढकामनर मोरलार पाछे, फिरौन आपनार मन के हुड करला आवरी इसराइली लोक के निकरी करी जायके ना देला

ऐइकाचे मापरू कुटकीर बिपति पटायला। हातार पाछे हाँय डासर बिपति पटायला। फिरौन मूसा आवरी हारून के आगदेला आवरी तिके बोलला, ,जोदि हाँय बिपति के तेबाय देले इसरायली लोक मिसर देश के छाड़ी करी जायके सकबाय। जैबे मूसा पारतना करला तैबे मापरु मिसर देश तानले डांस के गुचाय देला। मातर हुड होई रला आवरी हाँय लोक के निचिनता होई जायके ना देला।

एतार पहिले मापरू मिसरदेशर सबु पोसबा जनावर के बेमार करी मोराय देला। मातर फिरोनर मन हाड होई रला आवरी हाँय इसराइली देशर लोक के जायके ना देला।

तैबे मापरू मूसा के फिरौनर छोमे लेहरा ताने लाकड़ी पकायबा काचे बोलला। जैबे हाँय असन करला मिसर देशर लोकर चामड़ी ताने दुःख देबा फोड़ा निकरला, मातर इसराइली लोक के काहीं ना होयला। मापरू फिरौनर मनके हाड करला, आवरी फिरौन इसराइली लोक के निचिनता होई जायके ना देला।

एतार पाछे, मापरु करा गसरायला आवरी मिसर देशर कुबे फसल के नसाय देला आवरी जोन पने बाहरे निकरलाय तीके मारी देला। फिरौन मूसा आवरी हारून के आगदेला। आवरी हाँय मन के बोलला, मुई पाप करली आची। तोमर लोक जावत। तैबे मूसा पारतना करला आवरी बादरी तानले करा गसरबार तेबला।

मातर फिरौन आवरी पाप करला आवरी आपनार मन के हाड करला। हाँय इसराइली लोक के निचिनता होई जायके ना देला।

तैबे मापरू मिसर देश ने ताफा रासी के आयके देला। ऐ ताफा रासी सबु फसल के खायलाय।जोन फसल के करा नुकसान ना करी रला।

आवरी मापरू आंधर करला तीन दिन तक आंधार रला। ऐ अतक भूमकाल रला कि मिसर देशर लोक आपनार घर ले ना निकरके सकलाय, मातर जोन लगे इसराइली लोक रहिते रलाय हाँय लगे ऊजर रला।

नोव बिपतिर पाछे पने फिरौन इसराइली लोक के निचिनता होई जिबा काछे माना करला। फिरौन ना सुनी रला ऐ इकाचे मापरू गोटक अतिम बिपति के पटायबार विचार बनायला। ऐ फिरौनर मन बदली देयसी।