14. कमन ताने भुलकबार

मापरू इसराइली लोक के हाँय नियम सागबार सरायला, जोन के हाँयमन बाधलार वाचार कारण पालन करबार आय। आवरी हाँय सियन परबतर छोमे नेला। हाँय तीके वायदा करलार देश ने नेबा काचे होयते रला। ये देश के कनान पने बोलूआत। मापरू बादरीर खम्भा होई तिकर छोमे -छोमे गला, आवरी हाँयमन तार पिटी -पिटी गलाय।

मापरू अबराहम, इसाक, आवरी याकूब के प्रतिज्ञा करी रला, कि हाँय वायदा करलार हाँय देश तिकर वंश के देयसी, मातर ये समया ने हाँयताने कुबे जातिर लोक रयते रलाय। हाँयमन के कनानी बोलते रलाय। ये कनानी लोक मापरुर आराधना ना करते रलाय। आवरी तार आज्ञा के ना मानते रलाय। झुटा देबतार उपास करते रलाय आवरी कुबे गलत काम करते रलाय।

मापरू इसराइली लोक के बोलला, जैबे तोमि हाँय वाचार देशने जिबास तैबे हाँयतानर कनानी लोक ले अलगे रबास। तिकर सगे ना राहा आवरी तिकर सगे बिहा ना करा।तोमके तिकर सबु मुरती के नाश करबार आय। जोदि तोमि मोर आज्ञा ना मानले, तोमि मोके छाड़ी तिकर देबतार उपास करबास।

जैबे इसराइली लोक कनान देशर संदी ने केटलाय, मूसा इसराइलीर सबू गोतरर गोटक -गोटक करी बारा मुनुक के चुनला। हाँय तीके जाई करी हाँय देशर भेद दरबार सागला, दखबा काचे कि हाँय कसन देश आय। तीके हाँय कनानी लोकर भेद पने दरबार रला। ये दखबा काचे ताकत बिता रलाय कि निर्बल रलाय।

हाँय बारा लोक सबू कनान देश होई करी चालीस दिन तक बुलीकरी लैवटी आयलाय। हाँय लोक के सागलाय, हाँय देश कुबे उपज देबार देश आय।आवरी फाक – फल कुबे आचे। मातर दस भेद आनबा लोक बोललाय, तिकर शहर कुबे बड़े आय आवरी हाँय लोक डेंग,आवरी ठोसर आत।जोदि हामी तिकर उपरे हमला करबू तो निशचित हामके हारायबाय, आवरी हामके मारी दबाय।

तुरते कालेब आवरी यहोशू आवरी उजवा दुयटा खबर आनबा लोक बोललाय, ये सत्ते आय, कि कनानर लोक डेंग आवरी ताकत बिता आत, मातर निशचित रूप ले हामी तीके हारायके सकबू, मापरू हामर काचे जूध्द करसी।

मातर लोकमन कालेब आवरी यहोशुर ना सुनलाय। हाँयमन मूसा आवरी हारून उपरे रिस होयलाय आवरी बोललाय, “तोमि हामके ये भयानक जगा ने काय काचे आनलाआस”। हामके मिसर देश ताने रबार रला। जोदि हामी हाँय देश ने जिबू तो हामके जुध्द ने मारबाय, आवरी कनान देश लोक हामार बायले, पिला के दास बनायबाय। हाँय लोक तीके मिसर देश ने लैवटायकरी नेबा काचे गोटक उजवा अगुवा बाचबा काचे होयते रलाय।

जैबे लोक असन बोललाय तैबे मापरू कुबे रिस होई रला।मापरू मिलाप करबार रावटी ताने आयला आवरी बोलला, “तोमि मोर विरोध ने बलवा करला आस ऐइकाचे मुई तोमि सबू के ये कोमन भूलकायबी। सबू गोटक लोक जोन बीस बरस नोयले तारले कुबे बरसर लोक हाँय ताने मोरी जिबाय आवरी केबे पने हाँय देश ने ओलके ना सकबाय, जोन मुई तोमके देबाकाचे होई रली। केबल कालेब आवरी यहोशू हाँयताने ओलके सकबाय।

जैबे लोक मापरुर असन बोलबाटाके सुनलाय, तैबे हाँयमन दुखी होयलाय, कसन बोलले हाँयमन पाप करी रलाय।ऐकाचे हाँयमन कनान देशर लोक उपरे हमला करबा काचे विचार करलाय।मूसा तीके ना जिबा काचे चेतावनी देला, कसन बोलले मापरू तिकर सगे ना जाए, मातर हाँयमन तार ना सुनलाय।

मापरू ये जुध्द ने तिकर सगे ना जाई रला, ऐइकाचे कनानी लोक तीके हारायलाय, आवरी तिकर कुबे लोक के मारी देलाय। तैबे इसराइली लोक कनान देश ले लैवटी आयलाय, चालीस बरस तक हाँय मन कोमन ताने एबाटे – हाँयबाटे बुलकते रलाय।

इसराइली लोकर झार ने बुलकलादाय चालीस बरस होयलादाय, मापरू तिकर जरूरत के पूरा करला। हाँय तीके सरग तानले “मना” बोलबार रोटी देला। हाँय लावा छेड़े रासी के पने तिकर छानी ने पटायला तिकर लगे खायबा काचे मॉस रहो। सबू समया मापरू तिकर पटई आवरी चप्पल के फाटबा तानले बाचाय करी सोगायला।

अतक तकले कि मापरू तिकर खायबा काचे चमत्कार करी चचरा पकना तानले पानी के निकरायला। मातर ये सबू होयलार पाछे पने, इसराइली लोक मापरूर विरोध आवरी मूसार विरोध ने लड़ायलाय आवरी कूदखायलाय।तैबे पने मापरू बिशवाश ने रला। हाँय जोन वायदा करी रला, कि हाँय अबराहम, इसाक, आवरी याकूबर वंशर काचे करसी। हाँय ये करला।

गोटक आवरी समया जैबे हाँय लोक लगे पानी ना रला। मापरू मूसा के बोलला, “चचरा पकना के गोटाव आवरी हाँय तानले पानी निकरसी।” मातर मूसा चचरा पकना सगे ना गोटायला। ऐइकाचे कि हाँय डांग सगे चचरा उपरे दुईबार मारला। ये रीती ले हाँय मापरुर आज्ञा के ना मानला सबुर खायबा काचे चचरा उपरले पानी तो निकरला।मातर मापरू मूसा के रिस होयला। हाँय बोलला, कसन बोलले तुई असन करली आस ऐइकाचे तुई प्रतिज्ञा करलार देश ने ओलके ना सकिस।

जैबे इसराइली लोक झार ताने चालीस बरस तक बुलकी रलाय। तैबे जोन मन मापरुर विरोध करी रलाय, हाँमन सबु मरी रलाय। तैबे मापरू हाँय लोक मनके आवरी हाँय वायदा करला देशर संदी लगे नेला येबे मूसा कुबे डोकरा होई रला, ऐइकाचे मापरू लोकमनर अगुवा होई तिकर संग देबा काचे यहोशू के चुनला। मापरू मूसा संगे ये प्रतिज्ञा पने करी रला। कि गोटक दिने हाँय, लोकमनर लगे मूसा असन गोटक भविषदसागबा बिता के पटायसी।

तैबे मापरू मूसा के गोटक डोगरी उपरे जिबाकाचे बोलला, कि हाँय वायदा करला देश के दखके सको। मूसा हाँय वायदा करला देश के दखला, मातर मापरू ताके हाँयताने ओलबार अनुमति ना देला। तैबे मूसा मरी गला, आवरी इसराइली लोक तीस दिन तक दुःख बनायलाय। यहोशू तिकर नुआ अगुवा होयला। यहोशू गोटक अच्छा अगुवा रला, कसन बोलले हाँय मापरुर उपरे भरोसा करला आवरी तार आज्ञा के मानला।