15. वायदा देलार देश

पाछे यैबे हाँय समया आई रला। कि इसराइली लोक के वायदा देश, कनानर भीतरे जाहा। हाँय देश ने यरीहो नावर गोटक शहर रला। तार राखा करबा काचे हातार बोंहरक मजबूत भाड़ा रला। यहोशू हाँय शहर ने दुयटा भेदी के पटायला। हाँय शहर ने राहब नावर गोटक वेश्या रला। हाँय ये भेदी मन के लुकाय रला, आवरी पाच्छे हाँय तीके शहर ले बाचाय करी निकरी जिबा काचे संग देला। हाँय असन ऐइकाचे करला कसन बोलले हाँय मापरू के बिशबाश करते रला। जोन समया ने इसराइली लोक यहिरो के नाश करबाय तैबे हाँयमन राहब आवरी तार परिवारर रक्षा करबा काचे वायदा करी रलाय।

इसराइली लोक के वायदा करला देश भीतरे जिबा काचे यरदन नदी के लंगबार रला, मापरू यहोशू के बोलला, पुजारी लोक के आगे जायके देस। जैबे पुजारी लोक यरदन नदी ने तिकर पाँव कूंदलाय तैबे पीनी बहबाटा थेबला। कसन बोलले कि इसराइली लोक सुकला भूई ऊपरले हाँय पाट जायके सकोत।

हाँय लोक यरदन नदी के लंगबा के मापरू यहोशू के बोलला, यरीहो उपरे हमला करबा काचे तियार राहा, हाँय कुबे बड़े शहर रला।मापरू हाँय लोक के बोलला, पुजारी आवरी सिपाही मन के छय दिन तक हाँय शहर के किंदर बार आय। तैबे पुजारी लोक आवरी सिपाही मन असनी करलाय।

तैबे सात देनने, इसराइली लोक हाँय शहरर बोंहरक आवरी किंदरलाय। तिकर शहरर बोंहरक किंदरलार पाछे, पुजारी लोक आपनार युरही फुकलाय आवरी सिपाही मन कुबे चिचायलाय।

तैबे यरीहोर बोंहरकर भाड़ा गसरला। जसन मापरू आज्ञा देई रला इसराइली लोक शहरर सबू वस्तु के नाश करलाय। हाँयमन राहब आवरी तार परिवार के छाड़ी देलाय, जोन इसराइली लोकर हिसा बनी रला। जैबे कनान देश ने रबा बिता उजवा लोक मन सुनलाय कि इसराइली लोक यरीहो के नाश करलाय। तैबे हाँयमन डरलाय कि इसराइली लोक तिकर उपरे हमला करबाय।

मापरू इसराइली लोक के आज्ञा देई रला। कि कनान देश ने रबा बितार कोनी पने जाति सगे शान्तिसंधि ना करबार आय। मातर गिबोनी नावर गोटक कनानी जाति यहोशू के ठगला आवरी बोलला, कि कनान देश ले दूर जागा ताने रबा बिता आय। हाँयमन यहोशू सगे शान्तिसंधि करबा काचे अनुरोध करला। यहोशू आवरी उजवा अगुवामन मापरू के ना पचारलाय ताके काय करबार आय। येके छाड़ी, हाँयमन गिबोनी लोक संगे शान्तिसंधि करलाय।

तीन दिनर पाछे, इसराइली लोक जानलाय कि गिबोनी लोक कनान देश ताने रयते रलाय। हाँयमन रिस होयलाय कसन बोलले गिबोनी लोक हाँयमन के ठगी रलाय। मातर हाँयमन तिकर संगे करलार शान्तिसंधि के बनायकरी सोगायलाय , कसनबोलले हाँय मापरुर छोमे करीरलाय। तैबे किंडीक समयार पाछे, कनान देश ने रबा बिता गोटक उजवा जाति एमोरी लोकर राजामन ले सुनलाय कि गिबोनी लोक इसराइली लोक सगे शान्तिसंधि करला आत।ऐइकाचे हाँयमन आपनार -आपनार सिपाही मन के गोटक गोटक करी बड़े सिपाही बनायलाय। आवरी गिबोन उपरे हमला करलाय। गिबोनी लोक तिकर साहयता करबा काचे यहोशू के खबर पटायलाय।

तैबे यहोशू इसराइलर सिपाहीमन के रुडायला आवरी गिबोनी लोक लगे जिबाकाचे राती भेरा हिडलाय। सकरीया उजर होयबा के हाँयमन एमोरी लोकर सिपाही के चकित करलाय आवरी तिकर उपरे हमला करलाय।

हाँय दिनने मापरू इसराइली लोक काचे जुध्द करला। हाँय एमोरी लोक के घबराय देला, आवरी बड़े -बड़े करा गसराय करी एमोरी लोक के मारी देला।

मापरू बेर के पने बादरी उपरे गोटक लगे तेबाय देई रला। कसन बोलले इसराइली लोक के समय मिरो बली, एमोरी लोक के सबु बाटले हारायके सकोत। हाँय दिनने, मापरू इसराली लोक काचे गोटक बड़े विजय पायलाय।

जैबे मापरू हाँय सिपाही लोक के हारायलार पाछे, कुबे कनानी जातिर लोक इसराइली लोकर उपरे हमला करबा काचे रुडलाय। यहोशू आवरी इसराइली लोक हमला करी तिकर सत्यानाश करी देलाय।

ये जूध्द पाछे, मापरु इसराइली लोकर सबु गोतर के वायदा करलार हाँय देश ने तिकर भाग के देला। तेबे मापरू तिकर सबू संदी उपरे शान्ति देला।

जैबे यहोशू डोकरा होयला, तैबे हाँय इसराइलर सबू लोक के आगदेला। तैबे यहोशू हाँय लोक के सुरता करायला कि हाँयमन हाँय वाचा के मानबार वायदा करी रलाय। जोन मापरू तिकर सगे सियन परबत उपरे बाधी रला। हाँय लोकमन मापरुर उपरे बिसबास करबार आवरी तार नियम के मानबार वायदा करलाय।