16. छाड़ायबा बिता

यहोशूर मोरलार पाछे, इसराइली लोक मापरुर आज्ञा के ना मानलाय। हाँयमन मापरुर नियम के पालन ना करलाय, आवरी हाँयमन हाँय वायदा करलार देशर बाचला कनानी लोक के बाहरे ना निकराय देलाय। इसराइली लोक आपनार सत् मापरू यहोवा के छाड़ी करी, कनानी लोकर देबता मनर उपास करके मुरायलाय। इसराइली लोक लगे कोनी राजा ना रलाय। ऐइकाचे जाके जोनटा अच्छा लागला असनी हाँयमन करलाय।

मापरुर आज्ञा के ना मानबार लागी इसराइली लोक गोटक नियम बनायलाय, जाके कतक हार बनायते रलाय ये नियम असन परकार ले चलला। कतक बरस तक इसराइली लोक मापरुर आज्ञा के ना मानबार, तैबे हाँय तीके तिकर शत्रु ले हाराय करी दण्ड करसी। ये शत्रु इसराइलमनर तिकर वस्तु के चोरबाय, तिकर धन माल के नाश करबाय, आवरी हाँय तानले कुबे लोक के मारी देबाय। जैबे इसराइल मनर शत्रु तिकर उपरे कतक बरस तक हत्याचार, करबाय एतार पाछे, इसराइल लोक आपनार पापर पश्चाताप करबाय आवरी मापरू के तीके बाचायबा काचे पारतना करबाय।

सबू हार जैबे इसराइली लोक पाप के मानबाय तैबे मापरू तीके बाचायसी। हाँय गोटक छाड़ायबा बिता दवारा असन करसी गोटक असन लोक जोन तिकर शत्रुर विरोध ने जूध्द करसी आवरी तीके हाराय देयसी। तैबे देश ने शांति होयसी आवरी हाँय छाड़ायबा बिता तिकर उपरे अच्छा ले राज करसी मापरू हाँय लोक के बाचायबा काचे कुबे छाड़ायबा बिता मनके पटायसी। मापरू गोटक लगर शत्रु जाति, मिधानी लोकर दवारा इसराइली मनके हारायबा काचे असन करला।

मिधानी लोक सात बरस तक इसराइली लोकर फसल के चोरलाय। इसराइली लोक कुबे डरी रलाय, आवरी हाँयमन करपन ताने लुकलाय कसन बोलले मिधानी लोक तीके डरायके ना सकोत। परले पने तीके बाचायबा काचे मापरू के हाँयमन आगदेलाय।

गिदोन नावर गोटक इसराइली मुनुक रला। गोटक दिनने, हाँय गोटक ना दखबा जगा ताने गोंहू पेटते रला कसन बोलले मिधानी लोक ताके चोरके ना सकोत। यहोवार सरगदूत गिदोंन लगे आसी करी ताके बोलला, “हे शूरवीर सुरमा” मापरू तोर सगे आचे।जा आवरी इसराइली लोक के मिधानी लोक ले बाचाव।

गिदोंनर बाबा लगे मुरतीमनर गोटक बेदी रला। सबुले पहिल आज्ञा जोन मापरू गिदोंन के करबा काचे बोलला ताके हाँय बेदी के टूटायबार रला। मातर गिदोंन लोकमन के डरते रला ऐइकाचे हाँय राती होयबार बाट दखते रला। तैबे हाँय, बेदी के टुकड़ा -टुकड़ा करी देला। हाँय मापरू काचे गोटक नुआ बेदी बनायला आवरी हातार उपरे मापरू काचे पूजा देला।

सकरीया दाय लोकमन दखलाय कोनी बेदी के टुटाय करी टुकड़ा -टुकड़ा करी देला आछे, ऐइकाचे कुबे रिस होयलाय। हाँयमन गिदोंन के मारबा काचे तिकर घरे गलाय, मातर गिदोंनर बाबा बोलला, “तोमि काय काचे तोमर देबतार साथ देबा काचे होयला आस?” जोदि हाँय देबता आय तो ताके आपनार रक्षा ताके करके दिआस। कसन बोलले हाँय असन बोलला ऐइकाचे लोकमन गिदोंन के ना मारलाय।

तैबे इसराइली लोक के चोरबा काचे मिधानी लोक आवरी आयलाय। हाँय मन कुबे लोक रलाय, तिकर हिसाब करके ना होयते रला। गिदोंन तिकर विरोध ने जूध्द करबा काचे, इसराइली लोक के गोटक सगे आगदेला।गिदोंन मापरू के दुयटा चीना मागला कसन बोलले, ताके विसबास होओ कि मापरू सत्ते ताके इसराइली लोक के बचायबा काचे बोलसी आचे।

पहिल चीना काचे, गिदोंन भेड़र बाल के भूई उपरे सोगाय करी मापरू के बोलला, सकरीयार ओस केबल भेड़र बाल ने पढ़ो आवरी भूई उपरे ना पढ़ो। मापरू असनी करला रातीबेरा, हाँय मापरु के बोलला, भूई बीजो मातर भेड़र बाल सुखी रओ। मापरू असन पने करला, ये दुयटा चीना दखी करी गिदोंन विसबास करला कि मापरू सत्ते ताके बोलसी आचे कि हाँय इसराइली लोक के मिधानी लोक ले बाचाव।

तैबे गिदोंन सिपाहीमन के तार लगे आगदेला आवरी 32,000 मुनूक आयलाय। मातर मापरू हाके बोलला, कुबे अनंगर आचेत। तैबे गिदोंन हाँय सबू 22,000 के घरे लैवटाय देला, जोन मन जूध्द करबा काचे डरते रलाय। मापरू गिदोंन के बोलला, ये मुनूक मन येबे पने कुबे अनंगर रलाय। ऐइकाचे गिदोंन 300 सिपाही मन के छाड़ी करी हाँय सबू के घरे पटायदेला।

हाँय राती मापरू गिदोंन के बोलला, “मिधानी मनर माचा ने जा आवरी तिकर गोटायबाटा सुन।” तुई सुन हाँय मन काय गोटायबा आत तैबे तुई तिकर उपरे हमला करबा काचे ना डरबीस। “ऐइकाचे हाँय राती, गिदोंन तिकर माचा तले गला आवरी हाँय गोटक मिधानी सिपाही तार मित्र के गोट सागबाटा के सुनला जोन हाँय सपना ने दखी रला। हाँय मुनूक मित्र बोलला ये सपनार अरत आय कि गिदोंनर सेना हामार मिधानी सेना के हाराय देबाय।” जैबे गिदोंन ये सुनबा के हाँय मापरुर स्तुति करला।

तैबे गिदोंन आपनार सिपाहीमन लगे लैवटला आवरी हाँयमन के सबू के गोटक – गोटक नरसिगा, गोटक माट्टीर पात्र, आवरी गोटक मशाला देला, हाँयमन हाँय माचा के गेरलाय जोन ताने मिधानी सिपाही मन सोयते रलाय।गिदोंनर 300 सिपाहीमन आपानर मशाला के पात्रमन ने ढापी रलाय। ऐइकाचे मिधानी लोक हाँय मशालार उजर के ना दखके सकलाय।

तैबे गिदोंनर सबू सिपाहीमन तिकर पात्रमन के गोटक समया ने पुटायकरी उदापड़े मशालार जोय के निकरायलाय हाँयमन तिकर नरसिगा पुकलाय आवरी चिचायलाय, “यहोवार बाटले गिदोंनर तलवार।”

मापरू मिधानी लोक के घबराय देला, ऐइकाचे हाँयमन आपनी -आपनी मारा -मारी होयलाय। तुरते गिदोंन हाँय सन्देश वाहकमन के कुबे उजवा इसराइली लोक के मिधानी लोकर पीछा करबा काचे तिकर संग देबा काचे आगदेबा काचे पटायला, हाँयमन तीके कुबे के मारलाय आवरी बाचला लोकर पीछा करी तीके इसराइल देश ले बाहरे निकराय देलाय। हाँय दिनने 1,20,000 मिधानी मारी गलाय। ये परकारले मापरू इसराइली लोक के बाचायला।

हाँय लोक गिदोंन के आपनार राजा बनायबा काचे होयते रलाय, मातर गिदोंन हाँयमन के असन करके ना देला, मातर हाँय तीके , हाँय सोनार आभूषण मागला जोन हाँय सबू लोक मिधानी लोकर के चोरी रलाय।हाँय मन कुबे मात्रा ने गिदोंन के सोना देलाय।

तैबे गिदोंन हाँय सोनार गोटक विशेष वस्त्र बनायला जसन कि महापुजारी मन पिन्दते रहेत। मातर लोकमन हातार उपास करके मुरायलाय, जसन कि हाँय गोटक मुरती आय।तैबे मापरू आवरी ले इसराइली मन के दण्ड देला कसन बोलले हाँयमन मुरतीजर उपास करी रलाय। मापरू तिकर शत्रुमन के तीके हारायबा काचे तियार करला। तेबले बोले हाँयमन आवरी ले मापरू के सहायता करबा काचे पारतना करलाय, आवरी मापरू तिकर लगे तीके बाचायबा काचे गोटक उजवा छाड़ायबिता के पटाययला

ये गोट कतक हार घटला, इसराइली लोक पाप करलाय। मापरू तीके दण्ड देयसी, हाँयमन पश्चाताप करबाय। आवरी मापरू तीके छाड़ायबा काचे काकही पने पटायसी कतक बरस ले, मापरू कुबे छाड़ायबा बितामन के पटायला जोनमन इसराइल लोक के तिकर बाचायलाय।

परले पने हाँय लोकमन उजवा देशमनर असन मापरू के तिकर काचे गोटक राजा मागलाय। हाँय मन गोटक असन राजा मागलाय जोन डेंग आवरी शक्ति बिता होओ, आवरी जोन जूध्द ने तिकर अगुवा करके सको। मापरू के ये निवेदन मन नासला, मातर हाँय हाँयमनके असन राजा देला जसन हाँयमन माग करी रलाय।