17. दाऊद संगे मापरुर वाचा

शाऊल इसराइली देशर पहिल राजा रला। हाँय डेग आवरी सुन्दर रला, जसन हाँय लोक बोलते रलाय बिलकुल असनी। इसराइलर उपरे राज करबार पहिले कतक बरस शाऊल गोटक अछा राजा रला।मातर पाछे हाँय गोटक दुष्ट पुरुष होयला। जोन मापरूर आज्ञा के ना दरला, ऐइकाचे मापरू गोटक उजवा पुरुष के चुनला जोन गोटक दिने तार राज उपरे राजा होयसी।

मापरू दाऊद नावर गोटक जुवान इसराइली मुनूक के चुनी करी गोटक दिनने शाऊलर जगा ऊपरे राजा होयबा काचे तियार करबार मुरायला। दाऊद बैतलहम नगरर गोटक धोरही रला।कतक समया ऊपरे, दाऊद बाघ, आवरी भालू, दुनो के मारी देई रला।कसन बोलले दाऊद दवारा राखा करबा समया तार बाबार भेड़मन ऊपरे हाँयमन हमला करी रलाय। दाऊद गोटक नम्र आवरी धरमी मुनूक रला। हाँय मापरुर ऊपरे भरोसा आवरी तार आज्ञा के मानला।

येबे दाऊद जुवान मुनूक रला, हाँय ठोसर -डेग गोलियत के जुध्द करला। गोलियत गोटक अच्छा सिपाही रला। हाँय कुबे बोरसक आवरी अनुमान ने तीन मीटर डेग रला। मातर मापरू गोलियत के मारबार आवरी इसराइली लोकके बाचायबा काचे दाऊदर संग देला। ऐतार पाछे, दाऊद इसराइल लोकर शत्रुर ऊपरे कतक हार जित पायला। दाऊद गोटक बड़े सिपाही होयला, आवरी हाँय कुबे जुध्द मन ने इसराइली सिपाही मन के संग देला। लोकमन ताके कुबे सहराय लाय।

लोकमन दाऊद के कुबे माया करलाय कि शाऊल ताके कुचर होयला। शाऊल ताके मारबा काचे होयते रला। ऐइकाचे दाऊद शाऊल आवरी तार सिपाहीमन ले लुकबा काचे झार ने परायला। गोटक दिने, जैबे शाऊल आवरी तार सिपाही दाऊद के डगरायते रलाय तैबे शाऊल गोटक करपन ने गला। ये हाँय करपन रला जोनताने दाऊद लुकी रला, मातर शाऊल ताके ना दखला। दाऊद शाऊलर पिटीबाटे हातार कुबे लगे गला। आवरी तार पटई तानले गोटक गोंदा काटला। पाछे, जैबे शाऊल हाँय करपन तानले निकरला तैबे दाऊद ताके हागदेई करी हाँय धरला पटईर गोंदा के दखायला। ये रीती ले, शाऊल कि दाऊद राजा होयबा काचे, मोके मारबा काचे इंकार करला।

कतक समयार पाछे, शाऊल जुध्द ने मरी गला, आवरी दाऊद इसराइलीमनर राजा होयला। हाँय गोटक अछा राजा रला, आवरी लोकमन हाके माया करलाय।मापरू दाऊद के आशीषित करला आवरी ताके सफल बनायला।दाऊद कुबे जुध्द करला आवरी मापरू इसराइलीमनर शत्रुमनके हारायबा काचे तिकर संग देला। दाऊद यरूशलेम के जीती करी हाँके आपानर राजधानी बनायला हाँय ताने रला, आवरी राज करला। दाऊद चालीस बरस तक राजा रला। ये समया ने इसराइल लोक समरलाय आवरी धनवान होयलाय।

दाऊद गोटक मंदिर बनायबा काचे होयते रला। हाँय ताने सबू इसराइली लोक मापरुर भजन कीरतन करोत आवरी बलिदान चढ़ाओत। अनुमान ने 400 बरस ले हाँय लोक मुसार बनायलार मिलाप रावटी ने मापरुर भजन कीर्तन करते रलाय आवरी तार काचे पूजा देयते रलाय।

मातर हाँयताने नातान नावर गोटक भविषदसागबा बिता रला। मापरू ताके दाऊद के ये सागबा काचे पटायला, तुई कुबे जुध्द करलीआस, ऐइकाचे तुई मोर काचे ये मन्दिर के बनायके ना सकिस तोर बेटा येके बनायसी। तैबे पने मुई तोके कुबे आशीष देबी। तोर गोटक बंश सबुदाय मोर लोक ऊपरे राजा होई राज करसी सबुदाय काचे राज करबा बिता हाँय गोटक मातर मसीह रला। मसीह मापरुर चुनलार मुनूक रला जोन मजपुरर लोक के तिकर पाप ले बाचायसी।

जैबे दाऊद नातानर खबर के सुनला, तैबे हाँय मापरू के सुरता करला आवरी तार भजन कीर्तन करला। मापरू तार प्रतिष्टा के बढ़ायते रला, आवरी ताके कुबे आशीष देयते रला। दाऊद ना जानते रला कि मापरू ये गोट के कैबे करसी। ये समया ने हामी जानू कि इसराइली लोक के गोटक कुबे दिन तक अनुमान ने 1000 बरस तक मसीहर आयबार टाकी रयके होयसी।

दाऊद कतक बरस तक न्यायपूर्वक तार लोकमन ऊपरे राज करला। हाँय बड़े निष्ठां ले मापरुर आज्ञा के मानला आवरी मापरू ताके आशीष करला। तेबले बले, तार जीवनर आखरी ने हाँय मापरुर विरोध्द ने भयानक पाप करी रला।

गोटक दिने दाऊद तार महल ले बाहरे ओजारला आवरी गोटक सुन्दर बायलेर पानी धोयबाटा के दखला। हाँय ताके ना जानते रला। मातर हाँय पता करला कि हातार नाव बतशेबा रला।

तार नजर के गुचायबार छाड़ी, दाऊद ताके आनबा काचे पटायला। हाँय तार संगे पिरती करला आवरी घरे पटायदेला। किडिक दिनर पाछे, बतशेबा ये बोली करी दाऊद लगे खबर पटायला कि हाँय गर्भवती आचे।

बतशेबार मुनूक ऊरिय्याह नावर गोटक पुरुष रला। हाँय दाऊदर उत्तम सिपाहीमन ले गोटक रला ये दिने हाँय जुध्द करबा काचे बाहरे जाई रला दाऊद ऊरिय्याह के जुध्द तानले आगदेई करी ताके तार बायले संगे रबा काचे बोलला, मातर उजवा सिपाहीमन जुध्द ताने रलाय। ऐइकाचे ऊरिय्याह घरे जिबा काचे नाई बोलला। तैबे दाऊद के जुध्द ने पटायदेला आवरी सेनापति के ताके जुध्द ताने असन जगा ताने सोगायबा काचे बोलला, जोन लगे शत्रु सबुले शक्ति बिता मन रहूआत, कसन बोलले ताके मारी देओत। तैबे असन होयला कि ऊरिय्याह जुध्द ने मारी गला।

ऊरिय्याहर जुध्द ताने मोरलार पाछे, दाऊद बेतशेबा के विहा होयला। पाछे हाँय दाऊदर बेटा के जनम देला। दाऊद जोन करी रला हाँयकाचे मापरू कुबे रिस होई रला। ऐइकाचे हाँय नातान भविषद सागबा बिता के दाऊद के ये सागबा काचे पटायला कि तार पाप कतक गलत रला। दाऊद आपनार पाप के मानला आवरी मापरू ताके क्षमा देला। आपनार बाचला जीवनने पने आपनार हरबर समया ने पने दाऊद मापरुर पिटी -पिटी रला आवरी हातार आज्ञा के मानला।

मातर दाऊदर बेटा मरी गला। ये परकार ले मापरू दाऊद के दण्ड देला। येके छाड़ी, दाऊदर मारबार तक हातार आपनार घरर लोक हातार विरोध लड़ते रलाय। आवरी दाऊदर ताकत कम होई रला। मातर मापरुर ऊपरे विशवाश योग्य रला, आवरी येबेपने हाँय असन करला जोन हाँय दाऊद सगे करबा काचे बादा करी रला।, कि हाँय करसी, बलेपने दाऊद हातार आज्ञा के ना मानी रहो। पाछे, दाऊद आवरी बतशेबार उजवा सन्तान जनम होयला, आवरी हाँयमन तार नाव सुलेमान सोगायलाय।