18. बटवारा राज

दाऊद राजा चालीस बरस राज करला। तैबे हाँय मरी गला, आवरी हातार बेटा सुलेमान इसराइलर ऊपरे राज करबार मुरायला। मापरु सुलेमान के गोटायला आवरी ताके पचारला, तुई सबुले कुबे काय मागुआस, कि मापरू तार काचे करसी। सुलेमान मापरू के मागला मोके कुबे बुध्दिमान बनायदेस। ये गोट मापरू के हरिक लागला, ऐइकाचे मापरू सुलेमान के मजपुरर सबुले बुध्दिमान पुरुष बनायला। सुलेमान कुबे गोटमन सिखला आवरी हाँय गोटक बुध्दिमान शासक रला। मापरू ताके धनवान पने बनाय देला।

यरूशलेम ने सुलेमान हाँय मंदिर के बनायला जहार काचे तार बाबा विचार बनाय रला आवरी सबु वस्तुर जुगाड़ बनाय रला। येबे लोक मिलाप रावटी के छाड़ी मन्दिर ने मापरुर भजन कीर्तन करते रलाय आवरी तार काचे पूजा देयते रलाय। मापरू आसीकरी मन्दिर ने रैयते रबार आय आवरी हाँयताने हाँय आपनार लोक मन सगे बास करते रला।

मातर सुलेमान उजवा देशमनर बायले मन के माया करला। हाँय कुबे, अनुमान ने 1000 बायलेमन सगे विहा करी मापरुर आज्ञा के ना मानला। ये तानले कुबे बायले मन ऊजवा देश मनले आयलाय आवरी तिकर सगे तिकर देबतामन के आनलाय, आवरी तिकर उपास करते रलाय। जैबे सुलेमान डोकरा होयला, तैबे हाँयपने तिकर देबतामनर उपास करला।

ऐइकाचे मापरू सुलेमान के रिस होई रला। हाँय बोलला, हाँय इसराइली देश के दुयटा राज ने बटवारा करबा द्वारा हाके दण्ड देयसी। हाँय सुलेमानर मोरलार पाछे, असन करसी।

सुलेमानर मोरलार पाछे, रहबाम राजा होयला। इसराइल देशर सबू लोक हाके राजार तिकर रूप ने ग्रहण करबा काचे गोटक सगे रुंडा होयलाय। हाँयमन रहबाम के लड़ायलाय कि सुलेमान तीके कुबे हरबर काम कराय रहे। आवरी कुबे लागा धरला। हाँयमन रहबाम के गुहारलाय कि तुई असन ना कराव्।

मातर रहबाम तीके बड़े मुर्खता ले जबाब देला, “तोमि बोलबा आस मोर बाबा सुलेमान तोमके हरबर काम करायला।” मातर मुई तोमके हातार ले पने कुबे हरबर काम करायबी, आवरी मुई तोमके हातार ले कुबे दण्ड देबी।

तैबे लोकमन ताके असन बोलबार सुनलाय, तैबे तिकर ले कुबे लोक तार विरोध करलाय, दस गोतरर लोक ताके छाड़ी देलाय तार संगे येबे दुई गोतरर लोक बाचलाय। ये दुई गोतरर लोक आपनी के यहूदार राज बोललाय।

बाचला दस गोतर मनने यारोबाम नावर गोटक पुरुष के आपनार राजा बनायलाय, ये गोतरर देश उतर पूरब हिसा ने रला। हाँमन आपनी के इसराइलर राज बोललाय।

मातर यारोबाम मापरुर विरोध करला, आवरी लोक मन के पाप करायला। हाँय आपनार लोकमनर दवारा उपास करबा काचे दुयटा मुरती बनायला, येबे यहूदार राज ने यरूशलेम ने मापरूर मंदिर ने हातार भजन कीर्तन करबा काचे ना गलाय।

यहूदार आवरी इसराइलर राज दुश्मन होयलाय, आवरी आकट येमन दुनो झगडा होयबार आत।

इसराइलर नुआ राज ने, सबू राजा दुष्ट रलाय। येमन तानले कुबे राजामन तिकर जगा उपरे राजा होई रबार बिता मनके उजवा इसराइल मनर दवारा मारी गलाय।

इसराइल राजर सबू राजा मन आवरी कुबे लोकमन मुरतीमनर उपास करलाय। जैबे हाँयमन असन करलाय, तैबे आकट वेश्यामन सगे पिरती करलाय आवरी अतकतक कि कतकहार मुरतीमनर छोमे पिला मनके पूजा पने देलाय।

यहूदा राजर राजा, दाऊदर वंशर रलाय। ये राजामन तानले कतक भला मुनूक रलाय, जोन मन न्यायपूर्वक राज करलाय, आवरी मापरुर भजन कीर्तन करलाय। मातर यहूदार कुबे राजा दुष्ट रलाय। हाँयमन दुष्टता ले राज करलाय आवरी मुरतीमनर उपास करलाय, अतकतक येमन तानले कोनी -कोनी राजामन गलत देबतामनर छोमे तिकर पिलामन के पूजा देलाय, यहूदार कुबे लोकमन पने मापरुर विरोध होयलाय। आवरी उजवा देबतामनर उपास करलाय।