19. भविषद सागबा बिता

मापरू आकट इसराइल लोक लगे भविषद सागबा बिता मन के पटायते रबार आय। भविषद सागबा बिता मापरुर खबरमन के सुनबार आत, आवरी ताके लोकमन के सांग बार आत।

जैबे अहाब इसराइली राजर राजा रला, तैबे हाँय समया ने एलिय्याह भविषद सागबा बिता रला। अहाब गोटक गलत मुनुक रला। हाँय गलत बालदेवर उपास करबा काचे लोकमन के विबश करला।ऐइकाचे एलिय्याह अहाब के बोलला, मापरू हाँय लोकमन के दण्ड देयके जायते रला। हाँय ताके बोलला, “जड़कदाय मुई बरसा होयबा काछे ना बोली तेबले इसराइली राज ने बरसा ना होए आवरी ओस ना गसरसी”। हे गोट अहाब के अतक रिस करला कि हाँय एलिय्याह के मारबा काचे विचार करला।

ऐइकाचे मापरू एलिय्याह के बोलला, हाँय झारे जाई करी अहाब ले लुकीरा। एलिय्याह हाँय नाला लगे गला जोन लगे जिबा काचे मापरु सांगी रला। रोजे सकरीया आवरी रोजे शंज बेरा छेड़े एलिय्याह काचे रोटी आवरी मॉस धरी आयते रलाय। हे सबू समया ने, अहाब आवरी तार सेना एलिय्याह के डगरायते रहेत, मातर हाँयमन ताके डगरायके ना सकलाय।

बरसा ना होयलार किनडिक समयार पाछे, हाँय नाला आँटला। ऐइकाचे एलिय्याह गोटक लगर देश ने गला। हाँय देश ने गोटक गरीब रांडी बायले रला, ताके गोटक बेटा रला। तिकर लगे खायबाटा सरासरी होयते रला कसन बोलले कांही फसल ना होई रला। मातर तेबले पने, हाँय बायले एलिय्याहर देख रेख करला, ऐइकाचे मापरू तार आवरी हातार बेटार जरूरत के पूरा करला, येई कारण ले आटा आवरी तेल कैबे पने ऊना ना होयला, अकाल होयला दाय तिकर लगे खायबा काचे रला। एलिय्याह हाँय ताने किनडिक बरस रला।

साढ़े तीन बरसर पाछे, मापरू एलिय्याह के बोलला, अबर बरसा होयसी। हाँय एलिय्याह के लैवटाय करी इसराइलर राज ने जाईकरी अहाब के गोटायबा काचे बोलला। ऐइकाचे एलिय्याह अहाब लगे गला, जैबे अहाब ताके दखला आवरी ताके बोलला, “अच्छा तुई आस तकलीफ जनमायबा बिता।” एलिय्याह जबाब देला, “तकलीफ जनमायबा बिता तो तुई आस।” तुई यहोवा के छाड़ी देलीस हाँय सत्ते मापरू आय, मातर तुई बालदेवर उपास करबीआस। येबे तोके इसराइल राजर लोकमनके कर्मेल परबत ऊपरे आनबार आय।

तैबे सबू लोक कर्मेल परबत ने गलाय, माने मन आयलाय जोन बोलते रलाय कि, हाँय बालदेवर गोट मन बोलबार आत। येमन बालदेवर भविषद सागबा बिता मन रलाय, हाँय सबु 420 लोक रलाय। एलिय्याह लोकमन के बोलला, कैबे तक तोमि आपनार मन के टुटाय रबास? जोदि यहोवा मापरू आय तो तार भजन कीर्तन करा। जोदि बालदेव मापरू आय तो तार भजन कीर्तन करा।

तैबे एलिय्याह बाल देवर भविषद सागबा बितामन के बोलला, गोटक पशु के पूजीकरी तार मॉस के पूजा देबा काचे गोटक वेदी ऊपरे सोगाह, मातर जोय ना धराह। हातार पाछे मुई पने असनी करबी, आवरी गोटक ऊजवा वेदी ऊपरे सोगायबी। तैबे जोदि मापरू वेदी ऊपरे जोय गसरायले जाना कि हाँय सत्ते मापरू आय। तैबे बालदेवर भविषद सागबा बितामन गोटक पूजा देबा काचे तियार करलाय, मातर जोय ना दरायलाय।

तैबे बालदेवर भविषद सागबा बितामन बालदेव के पारतना करलाय, “हे बाल देव हामर सून।” दिन भर हाँय मन पारतना करलाय आवरी चिचायलाय आवरी अतक तक स्वय के चाक़ू मन तानले काटी होयलाय, मातर बालदेव जबाब ना देला आवरी हाँय कांही जोय ना गसरायला।

बाल देवर भविषद सागबा बितामन बालदेव के पारतना करलाय अनुमान ने दिनभर होयला। हाँयमन पारतना करबार सरायलाय। तैबे एलिय्याह ऊजवा पशुर मॉस के मापरुर वेदी ऊपरे सोगायला एतार पाछे लोकमन के बड़े -बड़े हांडीर पानी के हाँय वेदी ऊपरे रोकायबा काचे बोलला, जैबे तक कि मॉस धारु, आवरी वेदीलगर सबु भूई बीजी जाओ।

तैबे एलिय्याह पारतना करला, हे यहोवा, अबराहम, इसाक, आवरी याकूबर मापरू, हामके दखाओ कि तुई इसराइलीर मापरू आस आवरी मुई तोर दास आय। मोके जबाब देश जसन कि येमन जानबाय कि तुई सत्ते मापरू आस।

तुरते बादरी ले जोय गसरला, आवरी हाँय मॉस, धारु, चचरापकना, माट्टी आवरी अतक तक कि वेदी लगर पानी के पने जोय धरला। जैबे लोकमन ये दखलाय हाँयमन भूई ने गसरलाय आवरी बोललाय, यहोवा ही मापरु आय। यहोवा मापरू आय।

तेबे एलिय्याह बोलला, “बाल देवर गोटक पने भविषद सागबा बिता मन बाची करी ना जाओत।” ऐइकाचे लोकमन बालदेवर भविषद सागबा बितामन के दरलाय आवरी तीके हाँयतानले अलगे नेलाए आवरी तीके मारी देलाय।

तैबे एलिय्याह अहाब राजा के बोलला, “जटके तोमर घरे पराओ, कसन बोलले बरसा होयबा बिता आय।” जपके बादरी डापला आवरी कुबे बरसा मुरायला। यहोवा हाँय सुकलाटा के सरायते रला। एतानले जानबा काचे कि यहोवा सत्त मापरू आय।

जैबे एलिय्याह तार काम के सरायला, तैबे मापरू एलिशा नावर गोटक मुनुक के तार भविषद सागबा बिता होयबा काचे चुनला। मापरू एलिशार दवारा कुबे चमत्कार करला गोटक चमत्कार नामान नावर माने संगे होयला। हाँय गोटक शत्रुर सेनार सरदार रला, मातर ताके मुह ने गोटक गलत बेमार होई रला। नामान एलिशार बारे ने सुनी रला, ऐइकाचे हाँय एलिशार लगे आयला आवरी हाँय ताके अछा करबा काचे गुहारला। एलिशा नामान के बोलला, जाई करी यरदन नदी ताने सात हार बूड़।

नामान रिस होयला। हाँय असन करबा काचे माना करला, कसनबोलले असन करबार पागलन काम लागते रला ताके। मातर पाछे हाँय आपनार मन के पलटायला, आवरी जाईकरी यरदन नदीर पानीने सात हार बूड़ला। सातहार बूड़ी करी हाँय पानी ले ऊपरे निकरला तैबे मापरू ताके अछा करला।

मापरू इसराइल लोकमन लगे आवरी कुबे भविषद सागबा बितामन के पटायला। हाँय सबू लोकमन के मुरतीमनर उपास ना करबा काचे बोललाय। एतार ले आवरी हाँयमन के सबूके न्यायपूर्वक व्यवहार करबार आय, आवरी दया करबार आय। हाँय भविषद सागबा बितामन लोकमन के जागरत देलाय तीके गलत काममन के छाड़ी देबार आय, आवरी एतार ले आवरी मापरुर गोटमनर पालन करबार आय। जोदि हाँय लोकमन असन ना करले मापरू तीके दोषी मानी करी तिकर न्याय करसी आवरी तीके दण्ड देयसी।

कुबे समया, हाँय लोकमन मापरुर आज्ञा के ना मानलाया। आकट हाँयमन भविषद सागबा बितामन संगे गलत व्यवहार करलाय, आवरी अतक तक कि केबे -केबे तीके मारलाय। गोटक हार हाँय मन यिर्मयाह भविषद सागबा बिता के सुकला छूंआ ने पकाय देलाय, आवरी ताके हाँय ताने मरबा काचे छाड़ी देलाय। यिर्मयाह छूंआर तले चिकल ने धंसी रला। मातर राजा के तार ऊपरे दया आयला आवरी हाँय तार सिपाहीमन के खबर देला यिर्मयाह के मरबार पहिले ताके छूंआ ले ऊपरे खीचा।

भविषद सागबा बिता मन मापरुर बाटले गोटायते रलाय। भले लोकमन निन्दा करते रलाय। हाँयमन लोकमन के जागरत करते रलाय, जोदि हाँयमन अंगीकार ना करले मापरू तीके नष्ट करी देयसी। हाँयमन लोकमन के येपने सुरता करायलाय कि मापरू तिकर लगे मसीह के पटायबार जुबान देला।