20. गुलाम आवरी लेवटबार

इसराइलर राज आवरी यहूदार राज दुनो ने मापरुर विरोध ने पाप करलाय, हाँयमन हाँय वाचा के टुटायलाय आवरी फेर ले तार भजन कीर्तन करबा काचे जागरत देबा काचे आपनार भविषद सागबा बिता के पटायला मातर हाँयमन तिकर गोटमन के मानबा काचे माना करलाय।

तैबे मापरु तिकर शत्रुमन के तीके नाश करबा काचे सक्षम करलार दवारा दुनो राज के दण्ड करला। अश्शूर गोटक उजवा देश रला जोन कुबे शक्ति बिता होई रला, हाँयमन उजवा देश मनर प्रति कुबे निर्दयी रलाय। हाँयमन आसीकरी इसराइल राज के नाश करलाय अश्शूरी मन आसी करी इसराइल राज ने कुबे लोकमन मारलाय जोन जाके मन ताके नेलाय, आवरी देशर कतक हिसा के पढ़ाय देलाय।

अश्शूर लोकमन सबू अगुवा सोवकार लोकमन आवरी असन लोकमन जोन मन माहगा वस्तु बनाय के सकते रलाय गोटक लगे रुंडा करलाय आवरी हाँयमन तीके अश्शूर देश ने नेलाय। इसराइल ने केबल किडीकमा गरीब इसराइल लोक बाचलाय।

आवरी अश्शूरी लोक हाँय देश ने रबा काचे उजवा देशर लोक के आनलाय। हाँय उजवा देशर लोकमन हाँय शहर के आवरी बनायलाय। जोन इसराइल लोक हाँय ताने बाची रलाय तीके हाँयमन विहा करलाय। ये लोकर वश के सामरी बोललाय।

यहूदार राजर लोकमन दखलाय कसन मापरू तार ऊपरे विशवाश ना करबा के अवारी तार गोटमन के दण्ड करी रला। मातर तैबे पने हाँयमन कनानी लोकर देबतामनर उपास करलाय। मापरू तीके जागरत करबा काचे भविषद सागबा बिता के पटायला, मातर हाँयमन तिकर सुनबा काचे माना करलाय।

अनुमान ने 100 बरसर पाछे, अश्शुरर लोकमन इसराइलर राज के नाश करी देलाय। मापरू बेबीलोनर राजा नबूकदनेस्सर यहूदा राज ऊपरे जुध्द करबा काचे पटायला। बेबीलोन गोटक शक्ति बिता राज रला। यहूदार राजा नबूकदनेस्सरर दास, होयबार आवरी सबु बरस ताके कुबे धन देबा काचे राजी होयलाय।

मातर किनडिक बरसरर पाछे, यहूदार राजा बेबीलोनर विरोध करलाय। तैबे बेबीलोनर लोक लैवटी आसीकरी यहूदार राज ऊपरे हमला करलाय। हाँयमन यरूशलेम शहर ऊपरे कब्ज़ा करलाय, मन्दिर के नाश करी देलाय आवरी शहर आवरी मन्दिरर धन दौलत के जूरी नेलाय।

बलवा करबार कारण यहूदार राजा के दण्ड करबा काचे नबूकदनेस्सरर सिपाही मन राजार बेटा के तिकर छोमे मारी देलाय आवरी फैर ताके आन्धा करी देला। एतार पाछे हाँय राजा के नेई हाँयमन बेबीलोनर जेलघरे मरी जाओत।

नबूकदनेस्सरर आवरी हातार सिपाही मन यहूदाराजर अनुमान ने सबू लोकमन के बेबीलोन ने नेलाय, केवल सबुले गरीब लोकमन के पिटी छाड़ी करी कसनबोलले हाँयमन के खेती ने फसल करबा काचे। ये समया काल के बन्धुआइ बोललाय। जोनताने मापरूर लोकमन के वायदा करला देश ले निकरी जिबा काचे विवश करी रलाय।

भले मापरू तार लोकमन के तिकर पाप काचे बन्धुआई ने नेबार दवारा दण्ड करलाय, तेबेपने हाँय तीके तार वायदा मन के ना भूलकी रला। मापरू तार लोकमनर देख रेख करते रला, आवरी तार भविषद सागबा बितामनर दवारा तीके गोटायते रला। हाँय वायदा करला कि सत्तर बरसर पाछे, हाँयमन फैर वायदा करला देश ने लैवटवाय।

अनुमान ने सत्तर बरसर पाछे, फारसर राजा कुस्त्रू ने बेबीलोन के हारयला, ऐइकाचे बेबीलोनर साम्राज्य छाड़ी फारसर साम्राज्य कतक देशमन ऊपरे राज करलाय। ऐइकाचे लोक येबे यहूदी बलाय होयते रलाय। तिकर ले कुबे लोक तिकर जीवन के बेबीलोन ने बितायलाय। केबल किनडिकमा डोकरा यहूदीमन यहूदा देश के सुरता करलाय।

फ़ारसी लोकर कुबे शक्ति बिता रलाय, मातर हाँयमन तिकर जीतला लोकमन ऊपरे दया करी रलाय। फ़ारसी लोकमनर राजा होयलार किनडिक समयार पाछे कुस्त्रू गोटक आदेश देला, कोनी पने यहूदा लैवटबार होयबा बितामन यहूदी जायके सकेत अतकतक हाँय मन्दिर फैर ले बनायबा काचे धन पने देला। तैबे बन्धुआईर सत्तर बरसर पाछे, यहूदीमनर गोटक शुरू समूह यहूदी यरूशलेम शहरे आयलाय।

जैबे हाँय लोक यरूशलेम केटलाय तैबे मन्दिर आवरी शहरर सबू बाटर बाढ़ा के आवरी बनायलाय। फ़ारसीलोक तिकर ऊपरे राज करते रलाय। मातर गोटक हार आवरी हाँयमन वायदा करला देश ने रयते रलाय, आवरी मन्दिर ने भजन कीर्तन करते रलाय।