21. मापरु ईशुर जुबान देउआय

जैबे मापरू मजपुर के बनाय रला, हाँय जानते रला हाँय पाछे कैबे पने मसीह के पटायके होयसी। हाँय आदम आवरी हवा के वायदा करी रला, हाँय असन करसी, हाँय बोलला हवा ले गोटक वंश जनम धरसी, हाँय साँपर मुंडी के ठेससी। जोन साँप हवा के ठगला हाँय शैतान रला मपरुर अरत रला कि मसीह सबू बाटले शैतान के हाराय देयसी।

मापरू अबराहम के वायदा करी रला, तार दवारा मजपुरर जातिमन उध्दार पायबाय। मापरू पाछे कोनी समया ने मसीह के पटायलार दवारा ये वायदा के पूरा करसी। हाँय मसीह मजपुरर सबू जातिर लोकर तिकर पाप ले छाड़ायसी।

मापरू मूसा के वायदा करी रला, भविषद ने हाँय मूसार अमता गोटक भविषद सागबा बिता के पटायसी। हाँय भविषद सागबा बिता मसीह होयसी। ये रीती ले मापरू आवरी वायदा करला कि हाँय मसीह के पटायसी।

मापरू राजा दाऊद के वायदा करी रला, हातार गोटक वंश मसीह होयसी। हाँय राजा होयसी आवरी मापरूर लोकर ऊपरे सदा काचे राज करसी।

मापरू यिर्मयाह भविषद सागबा बिता के गोटायला आवरी बोलला गोटक दिने हाँय नुआ वाचा के बांधसी। हाँय नुआ वाचा इसराइलमन सगे सियन परबत ऊपरे बांधलार जुना वाचा अमता ना होयसी। जैबे लोकमन सगे तिकर नुआ वाचा के बाँधसी तैबे हाँय तिकर ऊपरे स्वय के आपनार रूप के दखायसी। सबू लोक हांके मया करबाय आवरी तार नियमर पालन करबार इच्छा करबाय। मापरू बोलला, कि तार नियम हृदय ऊपरे लिखला असन होयसी। हाँय तार लोकमन होयबाय, आवरी मापरू तिकर पाप के क्षमा करसी। हाँय मसीह होयसी जोन तिकर सगे नुआ वाचा के बांधसी।

मापरुर भविषद सगबा बितामन येपने बोललाय, मसीह गोटक भविषद सागबा बिता होयसी। भविषद सागबा बिता गोटक हाँय मुनुक आय जोन मापरुर वचन के सुनुआय, आवरी लोकमनर ऊपरे मापरुर खबरर घोसना करुआय। हांके पटायबार मापरू वायदा करी रला, हाँय मसीह गोटक सिध्द भविषद सागबा बिता होयसी, हाँय मसीह मापरुर खबर के अच्छाले, सुनसी, आवरी हाँय लोकमन के हाँय खबर के अच्छा ले सिखायसी।

इसराइलर पुजारी मन लोकमन काचे मापरू लगे सेवा करते रलाय, ये सेवा लोकमनर पाप काचे तीके मापरुर दवारा दण्ड करबार जगा ऊपरे करते रलाय। पुजारीमन लोकमन काचे पारतना करलाय। मातर मसीह सिध्द महान पुजारी होयसी जोन मापरू के देबा काचे गोटक शुध्द पूजार रूप ने स्वंय के देयसी हाँय कैबे पाप ना करसी। आवरी जैबे हाँय स्वंय के बलि होयबा काचे देयसी, तैबे मापरुर के कोनी पने उजवा बलि देबार ना होयसी।

लोकमन ऊपरे राजा आवरी प्रधान राज करुआत, आवरी कैबे -कैबे हाँयमन गलत करुआत। राजा दाऊद केबल इसराइलमनर ऊपरे राज मातर राजा दाऊदर बंश मसीह सबू मजपुर ऊपरे राज करसी आवरी हाँय सदा काचे राज करसी। येके छाड़ी हाँय आकट न्यायपूर्ण रीती ले राज करसी आवरी अच्छा निर्णय के धरसी।

मापरुर भविषद सागबा बिता मन मसीहर बारे ने कुबे गोटमन के सागलाय। उदाहरण काचे मलाकी बोलला, कि मसीहर आयबार पहिले गोटक उजवा भविषद सागबा बिता आयसी। हाँय भविषद सागबा बिता कुबे महत्वपूर्ण होयसी। येके छाड़ी यशायाह भविषद सागबा बिता लिखला कि मसीह गोटक कुवांरी ताने जनम होयसी। आवरी मीका भविषद सागबा बिता बोलला, कि मसीहा बैतलहम शहरे जनम होयसी।

यशायाह भविषद सागबा बिता बोलला, कि मसीह गलील क्षेत्र ने वास करसी। जोन लोकमन कुबे दुखी आचेत, मसीह तीके शान्ति देयसी। हाँय कैदीमन के छाड़ायसी। मसीह बेमार मन के अवारी जोन सुनके ना सकेत, द्खके ना सकेत, बोलके ना सकेत नोयले हीड के ना सकेत हाँयमन के पने अच्छा करसी।

यशायाह भविषद सागबा बिता येपने बोलला, कि लोक मसीह के निन्दा करबाय आवरी ताके अपनायबा काचे माना करबाय। उजवा भविषद सागबा बिता मन बोललाय, कि मसीहर गोटक सगंवारी तार विरोध ने उठसी।जकर्याह भविषद सागबा बिता बोलला, कि हातार ये संगवारी असन करबा उजवा लोकमन ले तीस सिक्का धरसी। येके छाड़ी कोनी भविषद सागबा बिता मन बोललाय कि लोक मसीह के मारी देबाय, आवरी हाँयमन तार पटई के लाटरी खेलबाय।

भविषद सागबा बितामन ये पने सांगलाय, कि मसीह कसन मरसी। यशायाह भविषद के सागला कि लोक मसीहर उपरे थुकबाय तार मजाक करबाय, आवरी ताके मारबाय। ताके भाला ने वेदबाय, हाँय कुबे पीड़ा आवरी कष्ट ले मरी जायसी, जैबे कि हाँय काहीं पने गलत ना करी रयसी।

भविषद सागबा बिता मन ये पने सागलाय, कि मसीह पाप ना करसी। हाँय शुध्द होयसी, मातर हाँय ऐइकाचे मरसी मापरू ताके उजवा लोकमनर पापर काचे दण्ड होयसी हातार मरले लोक मापरू संगे मिसबा काचे सक्षम होयबाय। ऐइकाचे मापरू बोललाआचे कि मसीह मोरो।

भविषद सागबा बिता मन ये पने सांगलाय, मापरु मसीह के मरला तानले जियायसी। ये सबू नुआ वाचा के बाँधलार मापरुर विचार आय। हाँय लोकमन के बाचाय के सकोत जोनमन तार विरुद्ध पाप करला आत।

मापरू भविषद सागबा बिता मन उपरे मसिहिर बारे कुबे गोट के प्रकट करलाय। मातर मसीह भविषद सागबा बितामनर काहरी पने जीव रला दाय नाहसी रला। ये भविषद सागबा बितामनर सांगलार 400 सो ले अधिक बरसर पाछे, सत् समया उपरे मापरू मसीह के ये मजपूर ने पटायला।