3. पुर

कुबे दिनर पाछे मजपुर ने कुबे लोक मन रलाय। कुबे दुष्ट आवरी लालची होई रलाय।अतक घीन होई रला, मापरु गोटक विचार करला कि बड़े पुर ले ऐ सबु मजपुर के नाश करी देबार आय।

मातर मापरु नूहर लागी हरिक रला, हाँय गोटक धरमी मुनुक रला जोन दुष्ट मनुक मन संगे रबार आय। मापरु नूह के सागला हाँय कुबे बड़े पुर आनबा बिता होयला आचे। ऐईकाचे, हाँय नूह के गोटक बड़े डोगा बनायबा काचे बोलला।

मापरु नूह के अनुमान ने 140 मीटर लोम, 23 मीटर ओसार आवरी 13.5 मीटर डेगर डोगा बनयबा काचे बोलला।नूह ताके गछर बनाय बार रला आवरी हाँय ताने तीन गोटा पाऊज, कुबे बाकरा, गोटक छावनी गोटक खिड़की बनायबार रला। हाँय डोगा नूहर परिवार आवरी भूईर सबू किसमर जनावर मन के हाँय पुर ले बाचायसी।

नूह मपरुर गोट के दरला। हाँय आवरी तार बेटा मन आवरी असनी डोगा बनाय लाय, जसन मापरु सागी रला। कसन बोलले हाँय डोगा कुबे बड़े रला, ताके बनायबा काचे कुबे बरस लागला। नूह लोक मन के आयबार पुरर बारे चेतना देयते रला। आवरी हाँय मन के मापरुर बाटे लैवटी आसा बोलला, मातर हाँय मन ताके विशबास ना करलाय।

मापरु नूह आवरी तार परिवार तार काचे आवरी जनावर मन काचे पुरबा अमता खाय बाटा दरबा काचे आदेश करला। जैबे सबु तियार होई रला, तेबे मापरु नूह के बोलला, ऐ दिने हातार बायलेर, हातार बेटामनर, आवरी तिकर बायलेमनर, सबु के मिसायकरी आठ लोक डोगा ने जिबार रला।

मापरु सबु जनावर आवरी पक्षीर, नर, मादा के नूहर लगे पोटायला। डोगा ने जाओत बली। आवरी पूर होयला दाय निचिनता रहोत, मापरु सबु परकारर जनावर मनर सात नर आवरी सात मादा मनके पोटायला। जाके पूजा करबा काचे बाहरबाय। जड़कदाय सबु डोगा ने केटलाय, तेबे मापरु आपनी डोगार बाट के ढापी देला।

तेबे बरसा होयबार मुरायला, आवरी बरसा होयते रला। चालीस दिन आवरी चालीस राती बरसा होयते रला। मजपुरर सबु वस्तु, जतक पने डेग -डेग डोंगरी मन के पानी बूड़ायला।

सुखला भूई ताने रबार सबु वस्तु मरी गला। हाँय लोक मन आवरी जनावर मन के छाड़ी हाँय मन डोगा ने रहेत। हाँय डोगा पानी उपरे पोहरते रला। आवरी डोगा भीतरर सबू वस्तु बुड्बा तानले निचिनता रला।

बरसा तेबलार पाछे, डोगा पाच मास तक पानी उपरे पोहरते रला, आवरी हाँय दिने बरसा किडिक छाड़ी रला। तेबे गोटक दिने डोगा गोटक डोंगरी उपरे जाई तेबला मातर मजपुर ने ऐबे पने पानी भरी रला। तीन मासर पाछे डोंगरी मनर टिप दखा देला।

आवरी चालीस दिनर पाछे, नूह गोटक कावा के ऐ द्खाबा काचे बाहरे पोटायला पानी सुकला कि नाई। हाँय कावा सुखला भूई दखबा काचे ऐबाटे -हाँयबाटे उड़ते रला। मातर ताके असन कोनी जगा ना मिरला।

आवरी नूह गोटक पोरंवा के बाहरे पोटायला, मातर ताके पने कोनी लगे सुखला भूई ना मिरला। ऐईकाचे हाँय नूह लगे लैवटी आयला। गोटक हफ्तार पाछे नूह हाँय पोरंवा के आवरी पोटायला, आवरी हाँय आपनीर चोंडी ने जैतून गछर केन्दा दरी लैवटी आयला। पानी आटते रला, आवरी बूटा मन गाजा होयते रलाय।

नूह गोटक हफ्ता आवरी ठाकला आवरी तीन हार हाँय पोरंवा के पोटायला। ऐबर हार ताके बाहरे जागा मिरला आवरी हाँय लैवटी नायला। पानी आटते रला।

दुई मासर पाछे, मापरु नूह के बोलला, अबर तुई आवरी तोर परिवार आवरी सबु जनावर डोगा तानले निकरी आसा। कुबे सन्तान आवरी नाती -पुती जनमहा आवरी धरती के भरी दियास। तेबे नूह आवरी हातार परिवार डोगा ले बाहरे निकरी आयलाय।

नूह डोगार बाहरे आयलार पाछे, हाँय गोटक बेदी बनायला आवरी पूजा देबार सबू किसमर पशु के आनला आवरी पूजला। मापरु ऐ पूजा ले हरिक होयला आवरी नूह, आवरी हातार परिवार के वर देला।

मापरु बोलला, “मुई सत करबी आची” मुनुकमनर करबार नीच कामर लागीमुई आवरी केबे भूई के शराप ना देई, आवरी पूर ले मजपुर के नाश ना करी, मुनुक आपनार सुरुदाय ले पापी आत।

आवरी मापरु आपनीर जुबाननर चिना काचे पहिल हार बादरीर धनुखांड के बनायला। केबीही पने बादरी उपरे धनुखांड दखा देयसी तेबे मापरु सुरता करसी कि हाँय काय जुबान देई रला। आवरी असनी तार लोक पने सुरता करबाय।