4. अब्राहम संगे मापरुर मिसबार

पूर होयलार कूबे बरसर पाछे, कूबे लोक रयते, आवरी हाय मन मपरुर आवरी ऐतार -हातार विरोध ने पाप करलाय। कसन बोलले ऐ सबू गोटक भाषा बोलते रलाय, ऐईकाचे येमन गोटकी सगे रुंडा होयलाय। आवरी गोटक नगर के बनायते रलाय। जसन मापरु आज्ञा देई रला, हातार अनुसार हाँयमन सबु मंजपुर ने ना गलाय।

ऐमन कुबे घमंडी रलाय, आवरी ऐमन के कसन जीवना जीयबार आय। ऐईकाचे ऐमन मारुर आज्ञा ना मानते रलाय। हाँय मन गोटक असन मीनार बनायबार मुरायलाय ये सरग के टेकसी मापरु दखला ऐमन गोटक सगे मीसीकरी पाप करते रबाय। तेबे ऐमन कुबे पापी काम करके सकबाय।

ऐईकाचे मापरु तिकर भाषा के कुबे उजवा -उजवा भाषामन बनायदेला, आवरी हाँय लोक मन के सबू मजपुर ने बिगराय देला। जोन नगर के हाँयमन बनायबार मुरायरलाय हाँय बाबेल बोलाय होयसी, जाहर अरत आय, “नसबार”।

कतक सौ बरसर पाछे, मापरु गोटक अब्राम नावर मुनुक के गोटायला। मापरु ताके बोलला, आपनार देश आवरी परिवार के छाड़ी करी हाँय देश ने जा जाके मुई तोके दखायाबी। मुई वर देबी आवरी तोरले गोटक बड़े जाति बनायबी। मुई तोर नाव के उपरे करबी, जोन तोके वर देबाय मुई तीके वर देबी, आवरी जोन तोके शराप देबाय मुई तीके शराप देबी तोर लागी मजपुर वर पायसी।

तेबे अब्राम मपरुर आज्ञा मानला। हाँय आपनार कमयामन आवरी सबू धन माल सगे आपनार बायले सारा के पने कनान नावर देश ने गलाय। मापरु ताके दखाय रला।

जेबे अब्राम कनान देश केटला, तेबे मापरु ताके बोलला, तोर बोहरक दख मुई तोके ऐ सबु देश देबी, आवरी तोर वश सबुदाय ऐतार उपरे राज करबाय तेबे अब्राम हाँय देश ने बसला।

मलिकिसिदिक नावर गोटक मुनुक रला। ऐ मपरुर बड़े पुजारी रला, गोटक दिने अब्राम जूध्द करबा बाटले आयते रला। तेबे हाँय आवरी अब्राम भेट होयलाय, मलिकिसिदिक वर देला आवरी बोलला, सबुले बड़े मापरु जोन सरग आवरी धरतीर स्वामी आय। हाँय तोके वर देयसी, तेबे अब्राम जूध्द तानर जीतलार सबू वस्तुर दशमा भाग मलिकिसिदिक के देला।

कतक बरस होयला, मातर येबे पने अब्राम आवरी सारा के पिला ना होयला। मापरु अब्राम सगे गोटयला आवरी सत करी बोलला, हातार गोटक पिला जनम होयसी आवरी जसन बादरी ने तारा आचेत असनी हातार कूबे वश होयबाय। अब्राम मपरुर सत उपरे विशवास करला। मापरु सागला की अब्राम गोटक धरमी मुनुक रला। कसन बोलले हाँय मापरुर सत उपरे विशवास करी रला।

तेबे मापरू अब्राम सगे गोटक जुबान दरला। सामान्य रूप ने गोटक जुबान दुयटा समूहर मोजी ऐतार -हातार काचे काम करबा काचे गोटक मान बाटा होऊ आय।मापरू अब्राम सगे सत तेबे करी रला जड़कदाय अब्राम सोई रला, मातर हाँय तेबे पने मापरुर गोट सुनते रला।मापरू बोलला, मुई तोके तोर गागरर जनमायलार निजर गोटक पिला तोके देबी। मुई तोर वश के ऐ कनान देश देबी।मातर ऐबेपने अब्राम के कोनी पिला ना रलाय।