32. ईशु भूतआतमा रला माने आवरी गोटक बेमार बायले के चंगा करला

ईशु आवरी हातार चेलामन तिकर डोंगा ने चेगी करी हाँय क्षेत्र ने गलाय, जोन ताने गिरोसेनी लोक रबार आत। हाँय मन हाँय क्षेत्र ने केटी करी डोंगा ले ऊतरलाय।

हाँयताने गोटक माने रला, जोन के भुतआतमा दरी रला।

ये मुनुक के अतक ताकत रला, कि कोनी पने ताके हारायके ना सकते रहेत। कतक हार लोकमन ताके हाथ आवरी घोड़ मन ने सिकोरा संगे पने बाँधलाय मातर ताके टुटाय देबार आय।

हाँय मुनुक हाँय क्षेत्रर मोड़ाभाट्टी ने रबार आय। ये मुनुक सबु दिनने आवरी सबु रातिने चिचायते रबार आय, हाँय पटई ना पिंदी रबार आय आवरी सबुदाय खुद के पकना ने मारी होयते रबार आय।

जसन ये माने ईशु के दखला, तेबे हांय परायकरी हातार लगे गला। आवरी हातार छोमे घुटना टेकी देला तेबे ईशु हाँय मुनुकभीतरर भुत आत्मा के बोलला, ” ये माने ले बाहरे निकरी आव।

हाँय भुतआतमा कुबे चिचायला, ईशु परम प्रधान मापरुर बेटा तोर मोर लगे काय काम आय? किरपाकरी मोके ना तड़पाव। तैबे ईशु हाँय भूतआतमा के पचारला, तोर नाव कायाय हाँय जबाब देला, मोर नाव “सेना,” आय कसन बोलले हामी कुबे आचू, ( रोमी सेना ने कतक हजार सिपाही मनके गोटक समूह के गोटक सेना होयबार आय।)

हाँय भूतआतमामन ईशु के विनती करलाय, किरपाकरी हामके ये क्षेत्र ले बाहरे ना पटाव ये लगर डोगरी ऊपरे बराहा मर गोटक रासी चरबाआत। ऐइकाचे हाँय भूतआतमामन ईशु के विनती करलाय, किरपाकरी हामके हाँय बराहामन ताने पटाव। ईशु बोलला, अछा आय तिकर लगे जाहा।

तैबे हाँय भूतआतमामन हांय मुनुक तानले निकरी करी हाँय बराहामनर ऊपरे परवेश होयलाय। हाँय बराहामन पराय करी गोटक डेंग ऊपरले झरनने डोगायलाय, आवरी बूड़ी मरलाय। हाँय रासी ने अनुमान ने 2,000 बराहा रलाय।

हाँय लगे बराहामन के देख – रेख करबा बितामन रलाय, जोन होई रला, जैबे हांयमन दखलाय तैबे हाँय मन शहर ने परायलाय। ईशु जोन करी रला, हाँय ताने हाँयमन सबूके सांगलाय, हाँय शहरर लोक निकरी आयलाय, आवरी हाँय मुनुक के दखलाय जाहर ऊपरे भूतआतमा रला। हाँय शान्ति ले पटई पिंदी आवरी गोटक साधरण माने अमता व्यवहार करी बसी रला।

हाँय लोक कुबे डरी रलाय, आवरी हाँयमन ईशु के जिबा काचे बोललाय, तैबे ईशु डोंगा ऊपरे चेगला। हाँय मुनुक जाहर ऊपरे भूत आतमा रला। हाँय ईशु संगे जिबा काचे विनती करला।

मातर ईशु ताके बोलला, नाही। मुई बोलबी आची, कि तुई घरे जाई करी सबूके सांग, कि मापरू तोर काचे काय -काय करला आचे। हाँयमनके सांग कि कसन मापरू तोर ऊपरे दया करला।

ऐइकाचे हाँय मुनुक गला आवरी सबूके एतार बारे ने सांगला, जोन ईशु हातार काचे करी रला। हातार कावनी के सुनबा बिता सबु लोक चकित होई रलाय।

ईशु झरनर उजवा बाटे लैवटी आयला। ईशुर हाँयताने केटलार पाछे, गोटक कुबे रासी लोक हातार लगे रुडलाय।आवरी ताके चेपायलाय, हाँय लोक ताने गोटक बायले रला, जाके बारा बरसले लहू जिबार बेमार ने पड़ी रला। हाँय तार सबू धन डाक्टरमन के देई रला। कि हाँय अछा होयबा काचे मातर हातार रोग आवरी पने नसी रला।

बायले सुनी रला, ईशु कतक बेमार लोकमनके अछा करी रला, आवरी हाँय विचार करला, मुई निश्रीत आय, कि जोदि मुई केबल ईशुर पटई के चियले मुई अछा होई जीबी, ऐइकाचे हाँय ईशुर पिटी बाटले आयला, आवरी हातार पटई के चियंला जसन हाँय चियंला लहू जिबार थेबला।

मातर ईशु जानला कि हातार ले शक्ति निकरला आचे। ऐइकाचे हाँय पिटी उलटी करी पचारला मोके कोन चियंला? चेलामन जबाब, देलाय एताने अतक लोकमन तोर सबूबाटे रुंडा होयला आत। आवरी तोके ठेगलबाआत। तो तुई काय काचे पचारबी आस कि मोके कोन चियंला आचे।

हाँय बायले ईशुर छोमे थरथरते, आवरी कुबे डरी तार मांडी टेकी बसला। तैबे हाँय ताके सांगला, कि हाँय काय करला आचे। ये पने कि हाँय अछा होयला आछे, ईशु ताके बोलला, तोर बिसबास तोके अछा करला आचे, शान्ति ले जा।