49. मापरुर नुवा वाचा

गोटक सरग दूत गोटक जुवान बायले मरियम के बोलला, कि हांय मापरुर बेटा के जनम देयसी। हांय कुँवारी रला, मातर पवितर आतमा हातार लगे आयला, आवरी मरियम पेट ने तेबला। मरियम गोटक बेटा के जनम देला। तार नाव ईशु सोगायला। एईकाचे ईशु मापरू आवरी मनुक दुनो आय।

ईशु कुबे चमत्कार करला, हांय दखायला कि हांय मापरुआय। हांय पानी ऊपरे हिंडला आवरी आंधी के तेबायला। हांय कुबे बिमारी लोकमन के चंगा करला आवरी कुबे लोकमन तानले दुष्टआतमा मन के निकरायला। हांय मरला लोकमन के जीव करला आवरी हांय पाँच रोटी आवरी दुयटा मांछ के पाँच हजार लोकमन के खुआयबा काचे फुरलामा बनायला।

ईशु गोटक महान गुरजी पने रला, जोन पने हांय सिखायला हांय अच्छा सिखायला। जोन हांय लोकमन के करबा काचे करते रला, हांय तीके करबार आय। कसन बोलले हांय मापरुर बेटा आय। उदाहरण काचे हांय सिखायला कि तोमके ऊजवा लोकमन के ऐ रीती ले मया करबार आवश्यक आय जसन तोमि खुद के मया करुआस।

हांय ऐ पने सिखायला कि तोमके सबु जमक ले कुबे आवरी खुदर धन-दौलत ले पने कुबे मापरू के मया करबार आय।

ईशु बोलला, मंजपुर ने कांई पने जमक के पायबा काचे ले पने कुबे अच्छा आय मापरुर राज ने होयबार। हातार राज ने तोमर जिबार जरूरी आय कि मापरू तोमके तोमर पापमन ले बाचाओ।

ईशु बोलला, कोनी लोक ताके स्वीकार करबाय। मापरू हांय लोकमन के बाचाओ। मातर ऊजवा लोक ताके स्वीकार ना करबाय। हांय ऐ पने बोलला कि कोनी लोक अच्छा भूई आमता आय। कसन बोलले हांय मन ईशुर बारे ने नगत खबर के स्वीकार करुआत आवरी मापरु तीके बाचाऊआय। मातर कोनी लोक बाटर पड़ीया भूई असन आय। मापरुर वचन बीजा अमता बाट ने गसरुआय। मातर हांय ताने कांई पने ना बाड़े। ऐ लोक ईशुर बारे नगत खबर के स्वीकार करुआत हांयमन ईशुर राज ने जिबातानले इंकार करुआत।

ईशु सिखायला कि मापरू पापीमन के कुबे मया करुआय। हांय तीके क्षमा करबा काचे होऊआय। आवरी तीके तार संतान बनायबा काचे होऊआय।

ईशु ऐ पने सांगला कि मापरू पाप के घृणा करुआय। कसन बोलले आदम आवरी हव्वा पाप करलाय। एईकाचे तिकर सबु पीढ़ीर लोक पने पाप करलाय ऐ मंजपुर ने रबा बिता सबु गोटक लोक पाप करुआत। आवरी मापरू ले अलगे आचेत। सबु गोटक लोक मापरू शत्रु आत।

मातर मापरू ऐ मंजपुर ने रबाबिता सबु गोटक लोक ऐ रीती ले मया करुआय। हांय तार गोटक बेटा के देई देला। तदापि मापरू तीके दण्ड ना देहे जोन हातार ऊपरे बिसवास करुआय। ऐके छाड़ी हांयमन हातार संगे सबुदाय काचे रहूआय।

तोमि मरबार योग्य आहस कसन बलले, तोमि पाप करला आस तोमके मापरुर क्रोध होयबार उचित आय, एतार लागी हांय ईशुर ऊपरे क्रोध होयला। हांय ईशु के कुरूस ताने मरना देई करी दण्ड देला।

ईशु केबीई पने पाप ना करी रला, मातर हांय मापरू के हांय दण्ड देयके देला। हांय मरबार स्वीकार करला। ऐ रीती ले तोमर पापमन के आवरी मंजपुर ने रबा बिता सबु गोटक लोकर पापमन के उठाय नेबा काचे हांय गोटक सिद्ध बलिदान रला, ईशु खुद के मापरुर काचे बलिदान करी रला। एईकाचे मापरू कांई पने पाप के अतक तकले कि भंयकर पापमन के पने क्षमा करुआय।

भले पने जोदि तोमि कुबे अच्छा काममन करुआस तो एतार दवारा मापरू तोमके ना बाचाये। हातार मित्र बनबा काचे, असन कांई पने जोन तोमि करके सकास। ऐके छाड़ी तोमके विशबास करबार आय, कि ईशु मापरुर बेटाआय, आवरी हांय तोमर बालदा ने कुरूस ऊपरे मरला, आवरी ऐ पने कि मापरु ताके आवरी जीव करला। जोदि तोमि एतार ऊपरे विसबास करले मापरू तोमर पापमन के क्षमा देयसी।

मापरू हांय सबु गोटक लोक के बाचायसी जोन ईशुर ऊपरे विसबास करुआय आवरी ताके तार परबू स्वीकार करुआय। मातर हांय तीके ना बाचाये जोन हातार ऊपरे विसबास ना करे। ऐ कांई जरूरी नुआय कि तोमि धनी आस नोयले गरीब, मनुक आस नोयले बायले, डोकरा आस नोयले जुवान, तोमि कोनताने रहूआस। मापरू तोमके मया करुआस आवरी हांय बोलसी आचे कि तोमि ईशुर ऊपरे विसबास करा कि हांय तोमर मित्र बनो।

ईशु तोमके आगदेयसी आचे कि हातार ऊपरे विशबास करा आवरी बतिसमा धरा।काय तोमि विशबास करुआस कि मापरुर गोटक बेटा ईशु मसी आय? काय तोमि विशबास करुआस कि तोमि गोटक पापी आस आवरी ऐ कि तोमि मापरुर दवारा तोमके दण्ड करबार योग्य आस? काय तोमि विसबास करुआस कि तोमर पापमन के मेटायबा काचे ईशु कुरूस ऊपरे मरला।

जोदि तोमि ईशु ऊपरे आवरी जोन हांय तोमर काचे करला आचे हातार ऊपरे विशबास करुआस तो तोमि गोटक मसीही आस। शैतान तार अन्धकारर राज ने येबे तोमर ऊपरे राज ना करे। येबे मापरू तार ऊजर राज ने तोमर ऊपरे राज करुआय हांय तोमके पाप करके ना देऐ, जाके तोमि करबार आहस। हांय तोमके गोटक नुवा अच्छा जीवन देला आचे।

जोदि तोमि गोटक मसीही आहस तेबे जोन ईशु करला आचे तार कारण मापरु तोमर पापमन के क्षमा करी देला आचे। येबे मापरू गोटक शत्रु नाई तोमके गोटक लगर मित्र बनाऊआय।

जोदि तोमि मापरुर मित्र आहस आवरी परबू ईशुर सेवक ( दास ) आहस तो तोमके हांय गोटमनर पालन करबा काचे होयबाआस, जोन ईशु तोमके सिखाऊआय। भले पने तोमि गोटक मसीही आहस, शैतान येबे पने पाप करबा काचे तोमर परिकिया करसी। मातर मापरू सबुदाय हांय करुआय जोन हांय बोलुआय कि हांय करसी। हांय बोलुआय कि जोदि तोमि तोमर पापमन के मानबास तो हांय तोमर पाप क्षमा करी देयसी। हाय तोमके पापर विरुद्ध लड़बा काचे शक्ति देयसी।

मापरू तोमके पारतना करबार आवरी हातार वचन के पढ़बा काचे बोलुआय, हाय तोमके ऊजवा विश्बासी मन संगे मिसी करी भजन कीर्तन करबा काचे पने बोलुआय तोमके ऊजवा लोक के पने सांगबार आए, कि हांय तोमर काचे काय करला आचे। जोदि तोमि ऐ सबु काममन के करबाहास तेबे तोमि हातार गोटक अच्छा मित्र बनी जिबाहास।