2. सवसार आने पाप परबेस करूआय
आदम आवरी हांतार बायले मापरु बाटले तिकर काचे बनायला बीती बढ़िया बाड़ी ने रईकरी खुबे हरिक रेलाय हांय मन फटई ना पिन्दते रेलाय टेबले बले इ गोत लहान्य मन कोनी बले लाज ना होयते रेलाय काय काचे कि संवसार ने पाप ना रये। हांय मन हांय बाड़ी ने हरमेसा बुलते रयेत आवरी मापरु संगे गोटायते रयेत।
मातर हांय बाड़ी ने गोटक साप रये हांय बिकट चलाक रये हांय हाई बायले के पचारला, काय सत्ते मापरु तोमके इ बाड़ी र कोनी बले गचर पाक के खायबा काचे नाई बल्ला आचे?
हांय बायले बल्ला, मापरु हामके बल्ला आचे कि हामी हांय बढ़िया आवरी गीनगिना बुदी र गच के छाड़ी करी कोनी बले गच र पाक के खायके सकास। मापरु हामके बल्ला कि तोमी हांय पाक के खायले नोयले हांके छिंयले तोमी मरी जीबास।
हांय साप हांय बायले के बल्ला ए सत नुआय, तोमी ना मोरबास मापरु जाने कि जसनी तोमी हांय पाक के खायबास तोमी मापरु र समान होई जीबास आवरी हांतार असन बढ़िया आवरी गिनगीना के समज के सकबास।
हांय बायले दकला कि हांय पाक मन के बायलामा आवरी बढ़िया लागबामा दका देयसी आचे। हांय बले बुदिमान बनबा काचे मन करते रये। हाँयटा काचे हांय पाक के टुटाय करी खायला, पाचे हांय हांतार मुनुस के जोन हांतार संगे रये हांय पाक के देला आवरी हांय बले खायला।
तेबे तुरते तिकर आँकी उगाड़ी होयला आवरी हांय मन जानलाय कि हांय मन लांगड़ा रेलाय। हांय मन पोतर के सीलीकरी हांतार फटी बनाय करी हांतार ले खुदर गागर के ढापबार खुबे करी दकलाय।
तेबे मुनुस आवरी हांतार बायले हांय बाड़ी ने बुलबा बेरा मापरु र गोट के सुनलाय आवरी हांय दुनो मापरु ले लुकलाय, तेबे मापरु मुनुस के चिचाय करी बल्ला, तुई कोन्ती आचीस ? आदम बल्ला मुई तोके बाड़ी ने बुलबा दाय सुनली आवरी मुई डरी गली काय काचे की मुई लांगडा रेली हायटा काचे मुई लुकली।
पाचे मापरु पचारला तोके कोन सांगला कि तुई लांगड़ा आचीस ? काय तुई हाय पाक के खायलीस जाके खायबा काचे मुई तोके माना करी रेली ? मुनुस बल्ला तुई मोके जोन बायले देलीस हाई मोके ए पाक के देला, तेबे मापरु बायले के पचारला; तुई ए काय करलीस ? हांय बायले बल्ला साप मोके ठगी देला।
मापरु साप के बल्ला तुई आपनार पेटर पाटा पोड़ी करी हिंडबीस आवरी माटी के चाटबीस। तुई आवरी ए बायले गोटक दुसर के दकी ना सयबास आवरी तोर पिला झिला आवरी हांतार पिला झीला गोटक दुसर के दकी ना सयबाय। ए बायले र थर तोर मुंड के रोमंदबाय आवरी तुई तिकर लेडी के टोकबीस।
तेबे मापरु बायले के बल्ला मुई तोर पिला झिला के जलमायबा दाय र दंड के कुबे बडायबी तुई तोर मुनुस ले लालसा करबीस आवरी हांय तोर उपरे राज करसी।
मापरु के बल्ला तुई तोर बायले र गोट के सुनलीस आवरी मोर गोट के ना धरलीस हांयटा काचे भुई सराप पायला आचे आवरी तोके भात साग कमायबा काचे खुबे हरबर होयके पडसी आवरी तुई मोरी जीबीस आवरी तोर गागर माटी ने मीसी जायसी। हांय मुनुस हांतार बायले र नाव हव्वा संगायला जाआर अरथ आय ; जीव देबा बीती। काय काचे की हांय सबु जातीर मांय होयसी आवरी मापरु आदम आवरी हव्वा के जानवर र चामड़ा ले बनायला फटई पिन्दायला।
पाचे मापरु बल्ला एबर बढ़िया आवरी गिनगीना के जानला मुनुस हामर समान होयला हाईटा काचे टिके हांय जीवर गच र पाक के ना खायके देबार आय नोयले हांय मन सबुदाय काचे जीव रेबाय हांईटा काचे मापरु आदम आवरी हव्वा के हांय बाड़ी ले बाहरे निकरायला आवरी मापरु काकीई बले हांय जीव र गच र पाक के खायबा ले ठेबायबा काचे हांय बाड़ी र ओलबा बाटे खुबे बोपू बीती सरगदूत मन के राका बसाय देला।
उत्पत्ति अध्याय 3 बाइबलर एक कतानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।