32. यीशु दुस्टात्मा ले पीढ़ित माने के आवरी गोटक बीमार बाएले के अच्छा करूआय

यीशु आवरी हाटर चेलामान आपनार डोंगा आने हाय जागाए गलाय जोनथाने गिरासेनी लोक रेबराय। हायमन हाय जागाए पहुंची करी डोंगा ले उतरलाय।

हायथाने गोटक माने रये जोन दुष्टात्मा ले ग्रस्त रये।

यह माने एतक बोकुबिता रये कि कोनी बी हाके धरके ना सकते रेलाय। केतक हार लोकमन हाके हाथमन आवरी गोड़मनके सिकोला संगे बी बांधलाय, मातर हाय हायमनके टूटाय देते रये।

हाय माने हाय जागाए कबरस्थान आने रेबराय। यह माने पूरा दिन आवरी पूरा राति कोलार होयबाराय। हाय कपड़ा ना पिंद्बाराय आवरी केबे केबे आपना के पोखना मन संगे घायल करबाराय।

हाय माने पोलाय करी यीशु लगे आयला आवरी हाटर आगे मांडीखूटा देला। टेबे यीशु हाय मानेर भीतरर दुष्टात्मा ले कथा होयलाय आवरी बोलला, “ई माने ले बाहरे निकली आ!”

हाय दुष्टात्मा ऊंचा आवाज ले कोलार होला, “हे यीशु, परम परधान मापरूर बेटा, तोर मोरले काय काम ? किरपा करी मोके ना सताव !” तेबे यीशु हाय दुष्टात्मा ले पोचारलाय, “तोर नाम काय आय ?” हाय उत्तर देला, “मोर नाम सेना आय, कायकाछे कि हामी बहुत आय।” (रोमी सेना आने खुबे हजार सैनिकमनर गोटक समूह गोटक “सेना” रेलार रये। )

हाय दुष्टात्मामन यीशु ले बिनती करलाय, “किरपा करी हामके ई जागा ले बाहरे ना पोठाव !” हाय लगर पहाड़ आने बरिया मनर गोटक झुंड चरते रेलाय। हायकाछे हाय दुष्टात्मामन यीशु ले बिनती करलाय की, “किरपा करी हामके हाय बरियामन आने पोठाय देस!” यीशु बोलला, “ठीक आय, हायमन आने चले जा!”

आवरी हाय दुष्टात्मामन हाय माने ले निकली करी हाय बरियामन आने परवेश करलाय। हाय बरियामन पोलायकरी गोटक ठियाँ टीला आनेले झील आने डोगाय डेलाय आवरी बुड़ी मरीगलाय। हाय झुंड ले ऊना पूरा 2,000 बरिया रेलाय।

हायथाने हाय बरियामनर देखभाल करबा लोकमन रेलाय। जोन सोबू होय रेला जेबे हायमन दखलाय तो हायमन नगर आने पोलायलाय। यीशु जोन करीरलाय हायथाने हायमन सोबू के सांगलाय। हाय नगरर लोकमन निकर्लाय आवरी माने के दखलाय जोनथाने दुष्टात्मामन रेलाय। हाय शांति ले, पोटी पिंदी करी, आवरी गोटक सोमान माने पारा व्यवहार करी-करी बोसी रेला।

हाय लोकमन बहुत डरी रेलाय आवरी हायमन यीशु के जिबा काछे बोललाय। आवरी यीशु डोंगा आने चेगलाय। हाय माने जाके दुस्टात्मामन रेलाय हाय यीशु संगे जिबा काछे बिनती करला।

मातर यीशु हाके बोलला, “नाई। मुय चाएबीचि की तुय घर जायकरी सोबू के सांग कि मापरू तोर काछे काय काय करलाय। हायमनके सांग कि कसन मापरू तोर उपरे दया करी रेलाय।”

हायकाछे हाय माने चले गला आवरी सोबुके ई बारे ने सांगाला जोन यीशु हातार काछे करी रेलाय। हातार कतानी के सुनबा हर एक लोक भकुवा होय रेलाय।

यीशु झीलर दूसरा बाटे वापिस आयलाय। हातार हायती खेटबार पाचे, गोटक बड़े भीड़ हातार आली पालि जमा होयलाय आवरी हाके दबायके लागलाय। हाय भीड़ आने गोटक बाएले रेला जोन बारा बोरस ले खून निकरबार समस्या ले पीढ़ित रेला। हाय आपनार सोबू धन बईद मनके देई रेला ताकि हायमन हाके अच्छा करके सकोत, मातर हातार रोग आवरी बिगड़ी जाई रेला।

हाय सुनी रेला कि यीशु केतक बीमार लोकमन के अच्छा करी रेलाय आवरी हाय सोचला, “मुय निश्चिंत आची अगर मुय केवल यीशुर पोटी के बी छूईंबी, तो मुय बी ठीक होई जीबी!” हायकाछे हाय यीशुर पिटी बाटे आयला आवरी हातार पोटी के छूईंला। जसन हाय हाके छूईंला, खून निकरबाटा बंद होय गला।

संगे संगे ही, यीशु जानी गला कि हायमन ले सामर्थ निकरला आचे। हायकाछे हाय पिटी बाटे मुड़ी करी पोचारलाय, “मोके कोन छूईंला ?” चेलामान उत्तर डेलाय, “एथाने एतक सारा लोकमन ले तोर चारो बाटे भीड़ आचेत, आवरी तोके ठेगल्बात। तो गुय कायकाछे पोचारबिस कि मोके कोनी छूईंला ?”

हाय बाएले यीशुर आगे थरथरते आयला आवरी बहुत दरी करी आपनार मांडी आने बोसला। तेबे हाय हाके सांगला कि हाय काय करला आचे, आवरी ए बी कि हाय अच्छा होय गला आचे। यीशु हाके बोलला, “तोर विश्वास ने तोके चंगा करला। शांति ले जा।”