31. यीशु पानी आने चलुआय

पाँच हजार लोकमन के भोजन करायलार पाचे, यीशु आपनार चेलामन के डोंगा आने जिबा काछे बोलला। हाय हायमन के झीलर दूसरा बाटे जिबा काछे बोलला जेबेकि हाय खिनीक समय काछे हाय जगह आने थेबलाय। आवरी चेलामन चले गलाय आवरी यीशु भीड़ के विदा कारलाय की हाय आपनार घर जाओत। हातार पाचे, यीशु पराथना करबा काछे गोटक परबत आने चले गलाय। हायथाने हाय एकला रलाय, आवरी हाय बेर राति ले पराथना कारलाय।

हाय समय, चेलामन आपनार डोंगा के खेते करते जाते रेलाय, मातर पबन हायमानर विरुद्ध बहुत ज़ोर ले बहते रेला। बहुत राति होयला के बी केवल झीलर मजीगता खेती रेलाय।

हाय समय यीशु पराथना करबाटा सरायलाय आवरी आपनार चेलामनर लगे वापिस जिबार आरंभ कारलाय। हाय डोंगा बाटे जिबा काछे पानीर उपरे हिंडला।

तेबे चेलामन हाके दखलाय। हायमन बहुत डरी गलाय कायकाछे बोल्ले हायमन सोची रेलाय की हाय कोनी भूत आय। यीशु जानी रेलाय की हायमन डरी जाई रेलाय, हायकाछे हाय हायमनके आवाज दी करी बोलला, “ना दारा, यह मुई आय !”

तेबे पतरस यीशु के बोलला, “हे प्रभु, अगर यह तुय आय तो मोके पानी आने हिंडी करी तोर लगे आयबा काछे आदेश देस।” यीशु पतरस के बोलला, “आ!”

आवरी पतरस डोंगा ले उतरी गला आवरी यीशु लगे जिबा काछे पानीर सतह आने हिंडबा आरंभ करला। मातर खिनीक दूर जाइकरी, आपनार आँखी के यीशु ले गुचाय देला आवरी लहर के दखबार आवरी पबन के महसूस करबार आरंभ करी देला।

तेबे पतरस डरी गला आवरी पानी आने डूबके लागला। हाय चिल्लायला, “हे प्रभु, मोके बचाव! “यीशु हाई समय हाथ बढ़ाय करी हाके धरला। तेबे हाय पतरस के बोलला, “तोर विश्वास बहुत ऊना आचे ! तोके सुरक्षित सोंगायबा काछे तुय मोर उपरले भरोसा कायकाछे ना करलिस ?”

तेबे यीशु आवरी पतरस डोंगा आने चेगलाय, आवरी तुरंत पबनर बहबार बंद होई गला। पानी सांत होई गला। चेलामन भकुवा होयकरी यीशुर आगे मांडिखूटा देलाय। हायमन हातार आराधना करलाय आवरी हाके बोललाय, “सते तुय मापरूर बेटा आय।”