38. यीशु के धराय देबाय

सोबू बोरस, यहूदी लोकमन फसहर परब बनायबाराय। ए ई बारेने गोटक परब रये की केतक सताब्दी पयले मापरू हाकर पुरखामन के मिश्रर कोमियागीरी ले छाड़ाय रेलाय। ऊना पूरा तीन बोरसर पाचे यीशु सार्वजनिक रूप ले परचार करबा आवरी सिक्षा देबार आरंभ करलाय। यीशु आपणार चेला मन के सांगलाय की हाय हाकर मन संगे यारूसलेम आने फसहर परब के बनायबार चायसी आचे, आवरी ये बी की हाय हायती मारी दिया जायसी।

यीशुर चेलामन आने गोटक यहूदा नामर माने रेला। यहूदा प्रेरितमनर धनर थैलीर परभारी रेला, मातर केबे केबे हाय हाय थैली ले पैसा निकलायबाराय। यीशु आवरी चेलामनर येरूसलेम पहुंचबार पाचे यहूदा यहूदी अगुवामनर लगे गला। हाय धनर बदला ने यीशु के धरायबार प्रस्ताब सोंगायलाय। हाय जानी रये की यहूदी अगुवा मन स्वीकार ना करते रेलाय की यीशु मसीह आय। हाय जानते रये की हायमन हाके मरते मारबार चायते रेलाय।

महायाजकर बोलला आने यहूदी अगिवोंमन यीशुर हाकर हाथे धरायबार काछे यहूदा के तीस चांदिर सिक्का देलाय। ए हाय परकार ले होयला जनता की भविष्यवक्ता बोली रेलाय की होयसी। यहूदा मानी गला आवरी धन धारी चले गला। हाय यीशु के गिरफ्तार करबाती हाकर सहायता करबा काछे कोनी मौकार खोज करबाती लागला।

येरूसलेम आने, यीशु आपनार चेला मन संगे फसहर परब बनायला। फसहर भोजनर दौरान, यीशु रोटी धरिकरी टोडलाय। हाय बोलला, “एके धरा आवरी खा। एटा मोर सरीर आय जोन मुय तोमके देबी अछि। एके मोर याद आने करबास।” ई परकार ले, यीशु बोलला की हाय हाकर काछे मोरी जायसी, मतलब हाकर काछे हाय आपनार सरीर के बलिदान दी देयसी।

पाचे यीशु गोटक दाखरसर गिलास धरलाय आवरी बोलला, “एके पिया। एटा नुआ किरियार मोर खून आय जोन की मुय उनधेलबी ताकि मापरू तोमर पापमन के क्षमा करसी। सोबू हार एके पिबा दाय मोर याद आने एके करा जोन मुय एबे कार्बी आची।”

तेबे यीशु आपनार चेलामन के बोलला, “तोमोर आने गोटक लोक मोके धरायसी।” चेला मन चोमकी गलाय, आवरी पोचारलाय कि कौन असन काम करसी। यीशु बोलला, “मोर धरायबा लोक हाय आय जाके मुय ए रोटीर तुकड़ा देबी आची।” तेबे हाय हाय रोटी यहूदा के देलाय।

हाय रोटी के धरलार बाद, यहूदा आने शैतान बसी गला। यहूदा निकरी करी यीशु के धरबार काछे यहूदी अगुवामन के सहायता करबा काछे गला। एटा रातिर समय रेला।

भोजनर बाद, यीशु आवरी तार चेलामन जैतून परबत आने गलाय। यीशु बोलला, “ तोमी सोबू आजी राति छाड़ी देबास। एटा लिखलार आचे, ‘मुय चरवाहा के मारबी आवरी सोबू मेंड़ी मन तितर बितर होय जिबाय।”

पतरस उत्तर डेला, “भले बाकी सब तोके छाड़ी देबाय, मुय ना छाड़ी!” तेबे यीशु पतरस के बोलला, “शैतान तोमी सब के नेबार चायसी आचे, मातर ए पतरस, मुय तोर काछे पराथना कर्ली आची कि तुय विश्वास ने चुकी ना जा। तेबे बी, आजी राति, कुक्ड़ार ना डाकते तुय तीन हार नाई करबिस कि तुय मोके ना जानिस बोली।”

पतरस तेबे यीशु के बोलला, “भले मुय मरीजीबी, मुय केबे बी तोके नाई ना करी!” बाकी सबू चेलामन बी एटा बोललाय।

तेबे यीशु आपनार चेलामन संगे गतसमनी नामर जागाए गलाय। यीशु आपनार चेलामन के पराथना करबा काछे बोललाय ताकि शैतान हाकर परीक्षा ना करो। तेबे यीशु खुद पराथना करबा काछे चले गलाय।

यीशु तीन बार पराथना कारलाय, “हे मोर पिता, अगर संभव आय तो किरपा करी ए दुखर गिलास पीबा काछे मोके ना देस। मातर लोकमनर पाप क्षमा काछे आवरी कोनी बात नियाय, तो तोर आका इच्छा पूरा हो।” यीशु बहुत व्याकुल रलाय आवरी हाकर पोसना खुनर बूंद जसन रला। हाके सामर्थ देबा काछे मापरू गोटक सरगदूत पोठायलाय।

सबू हार पराथनार पाचे, यीशु आपनार चेलामन लगे आपिस आयलाय, मातर हायमन सोई रेलाय। जेबे यीशु तीसरा हार आपिस आयलाय तो यीशु बोलले, “उटा! मोके धरायबा लोक एथाने आचे।”

यहूदी अगुवामन, सैनिकमन, आवरी गोटक बड़े भीड़ संगे यहूदा आयला। हायमन तलवार आवरी लाठी धारी रेलाय। यहूदा यीशु लगे आसी करी बोलला, “हे गुरु, नमस्कार,” आवरी हाके चुमला। हाय धरायबार माने के यहूदी अगुवामन चितायबा काछे असन करला। तेबे यीशु बोलला, “हे यहूदा, तुय गोटक चुम्मा ले मोके धरायबिस ?”

जेबे हाय सैनिकमन यीशु के धरते रेलाय, तेबे पतरस आपनार तलवार निकलायला आवरी महायाजकर गोटक कोमीयार कान काटी देला। यीशु बोलला, “तलवार के दूर कर! मुय मोर बचाव काछे मोर पिता के सरगदूतर गोटक सेना काछे बिनीति करके सकी। मातर मोके मोर पितार कथा मानबार आचे।” तेबे यीशु हाय मानेर कान के अच्छा करी देलाय। तेबे सबू चेलामन पोलायलाय।