39. यीशु उपरे मुकद्दमा चलुआय

एबर एटा आधा रातिर समय रेला। हाय सैनिकमन यीशु के महायाजकर घरे आनलाय, कायकाछे की हाय यीशु ले सवाल पोचारबार चायते रेलाय। पतरस दूर ले हाकर पीछा करते रेला। जेबे सैनिकमन यीशु के घरे नेलाय, तो पतरस बाहरे थेबी करी आपना के जोय ले गरम करते रेला।

घर भीतरे, यहूदी अगुवामन यीशु उपरे मुकदमा चलायलाय। हायमान हातार विरुद्ध झुटा कथामन के बोलबा काछे बहुत झुटा गवाह मनके आनलाय। जेबेकि, हाकर कथा एक दुसर ले ना मिसते रेला, हायकाछे यहूदी अगुवामन ए साबित ना करके सकलाय की हाय काई कतार दोषी रेलाय। यीशु काई ना बोललाय।

सरा सरी दाय, महायाजक सीधा यीशु दखलाय आवरी बोललाय, “हामके सांग की तुय जीवित मापरूर बेटा मसीह आस ?”

यीशु बोलला, “मुय आय, आवरी तोमी मोके मापरू संगे बोसलाटा आवरी सरग ले आयबाटा बी दखबास।” महायाजक आपनार पोटी के चिरी देलाय कायकाछे की जोन कथा यीशु बोलला हाय हाय कथा आने बहुत रिशा होयलाय। हाय दूसरा अगुवामन उपरे कोलार होयला, “हामके सांगबा काछे दूसरा गवाहर जरूरत नियाय की ए माने काय करला आचे! तुय आपना ही हाके एटा बोलबाता सुनलिस कि हाय मापरूर बेटा आय। हातार बारेने तोर काय निर्णय आय ?”

सबू यहूदी अगुवामन महायाजक के उत्तर देलाय, “हाय मरबार योग्य आचे!” तेबे हायमन यीशुर आँखी आने पट्टी बांधी देलाय, हातार उपरे थुकलाय, हाके मारलाय, आवरी हातार हांसी उडायलाय।

आवरी पतरस, जेबे हाय घर बाहरे जागी रेला। तेबे गोटक कोमीया टोकी हाके दखला। हाय हाके बोलला, “तुय बी यीशुर संगे रेलिस!” पतरस नाई बोलला। पाचे, कोनी दूसरा टोकी बी ई कथा बोलला, आवरी पतरस आवरी नाई बोलला। सरा-सरी दाय, लोकमन बोललाय, “हामी जानु कि तुय यीशु संगे रेलिस कायकाछे कि तोमी दुनों गलील ले आय।”

तेबे पतरस बोलला, “अगर मुय ई माने के जानी तो मापरू मोके सराप दिओ!” संगे-संगे पतरसर ई किरिया करबार पाचे, गोटक कुकड़ा डाकला। यीशु पिटी बाते मुड़ी पतरस के दखलाय।

पतरस हायती ले गला आवरी फूटी-फूटी करी कान्द्लाय। हाई समय, यीशु के धराऊ यहूदा दखला कि यहूदी अगुवामन यीशु के मृत्युदंड देलाय। यहूदा बहुत दुखी होयला आवरी जायकारी आपना के मारी देला।

एबे हाय देशर राज्यपाल पिलातूस रेला। हाय रोम काछे काम करबाराय। यहूदी अगुवामन यीशु के हातार लगे आनलाय। हायमन चाएते रेलाय कि पिलातूस हाके मृत्युदंड दो आवरी हाके मारी देओ। तेबे पिलातूस यीशु के पोचारलाय, “काय तुय यहूदियोंर राजा आस ?”

यीशु उत्तर देलाय, “तुय सते बोललिस। मातर मोर राज्य ए पृथबीर नुयाय। अगर होय रले मोर दास मोर काछे युद्ध करताय। मुय पृथ्वी आने मापरूर विसय ने सते सांगबा काछे आयली आची। हर एक लोक जोन सते के प्रेम करुयाय हाय मोर सुनुयाय।” पिलातूस बोलला, “तो सते काय आय ?”

यीशु संगे कथा होयलार पाचे, पिलातूस बाहरे भीड़ लगे जायी बोलला, “मुय आसान कोनी कारण ना पायली कि ए माने मारा जिबार योग्य आचे।” मातर यहूदी अगुवामन आवरी भीड़ कोलार होयी बोललाय, “हाके क्रूस आने चेगाव !” पिलातूस उत्तर देलाय, “हाय काय भी गलत करबार दोषी नियाय।” मातर हायमन आवरी कोलार होयी बोललाय। तेबे पिलातूस तीसरा बार बोलला, “हाय दोषी नुयाय!”

पिलातूस डरी गलाय कि हायमन दंगा आरंभ करी देबाय, हायकाछे हाय आपनार सैनिकमन द्वारा यीशु के क्रूस आने चेगायबा काछे मानी गलाय। रोमी सैनिकमन यीशु के कोड़ा मारलाय, आवरी हाके राजसी पोटी पिंदायलाय, आवरी हातार मुंडे कांटार बनायला मुकुट सोंगायलाय। तेबे हाय ए बोलीकरी हातार हांसी उडायलाय, “दखा, यहूदीमनर राजा!”