40. यीशु के क्रूस आने चेगायलाय

यीशुर हांसी करलार पाचे, सैनिकमन हाके क्रूस आने चेगायबा काछे नेलाय। हायमन हाय क्रूस के हातार ले उठवायलाय जोन ठाणे हाय मरसि।

हाय सैनिकमन यीशु के हाय जागा आने आनलाय जोन “खोपड़ी” बलि बोलबाराय आवरी हातार हाथ आवरी गोड़ मनके क्रूस आने ठोकी देलाय। मातर यीशु बोलला, “हे पिता, ए मनके क्षमा कर, कायकाछे की ए मन ना जानेत की ए काय करबा आचेत।” हायमन गोटक तख्ती के बी हातार मुंड उपरे टाँगी देलाय। जोनती लिखा रये, “यहूदीमनर राजा।” पिलातूस हायमनके एटा लिखबा काछे बोली रये।

तेबे सैनिकमन यीशुर पोटी काछे चिट्ठी डाललाय। जेबे हायमन असन करलाय तेबे हायमन हाय भविष्यवक्ता के पूरा करला जोन बोलबा राय, “हायमन मोर पोटी के आपस ने बाटा करलाय, आवरी मोर पोटी काछे चिट्ठी डाललाय।”

हायथाने दुय टा डाकू बी रेलाय, जोन मनके सैनिकमन हाय समय क्रूस आने चेगाय रेलाय। हायमन हायमन के यीशुर दुनों बाते सोंगाय रेलाय। हायमनले गोटक डाकू यीशुर हांसी उडायला, मातर दूसरा बोलला, “काय तुय ना डरिस कि मापरू तोके दंड देसी ? हामी बहुत बुरा काम करलार दोषी आय, मातर ए माने निर्दोष आय। “ तो हाय यीशु के बोलला, “जेबे तुय आपनार राज्य आने आयले तेबे किरपा करी मोके याद सोंगाव।” यीशु उत्तर देलाय, “आजी आका तुय मोर संगे सरगलोक आने रेबीस।”

यहूदी अगुवामन आवरी भीड़र दूसरा लोकमान यीशुर हांसी उडायलाय। हायमन हाके बोललाय, “ अगर तुय मापरूर बेटा आय, तेबे क्रूस ले तले आव आवरी आपना के बचाव! तेबे हामी तोर उपरे विश्वास करबू।”

तेबे हाय पूरा देशर बादली पूरा काला होय गला, भले हाय दिनार मुंडे बेला रेला। एटा मुंडे बेला काला होय रेला आवरी तीन घंटा तक असन आका रेला।

तेबे यीशु डाकी करी बोलला, “पूरा होयला! हे पिता, मुय आपनार आत्मा तोर हाथ आने देबी आची।” तेबे हाय आपनार मुंड के झुकायलाय आवरी आपनार परान के छाड़ी देलाय। जेबे हाय मरला तो गोटक भूकंप आयला। हाय पर्दा जोन मापरूर उपस्थिती ले लोकमन के अलग करबा राय उपरे ले तले आवरी फाटी करी दुय भाग होय गला।

आपनार मृत्युर द्वारा, यीशु लोकमान काछे मापरूर लगे आयबार बाट खोली देलाय। जेबे यीशुर देखभाल करबा गोटक सैनिक जोन सबू होय रेला दखला तो हाय बोलला, “असल आने, ए माने निर्दोष रेलाय। ए मापरूर बेटा आय।”

तेबे युसुफ आवरी निकुदेमुस नामर दुय यहूदी अगुवा आयलाय। हायमन विश्वास करबाराय कि यीशु आका मसीह रेलाय। हायमन पिलातूस ले यीशुर सरीर के मांगलाय। हायमन हातार सरीर के पोटी ले गुड़ायलाय। तेबे हायमन हाके गोटक पोकना थानले काटी करी बनायला कब्र आने नेलाय आवरी हातार भीतरे सोंगायलाय। तेबे हायमन हाय कब्रर बाट के बंद करबा काछे गोटक बड़े पोकना के लुड़काय देलाय।