49. मापरूर नुआ किरिया

गोटक सरगदूत गोटक धांगड़ी बाएले के बोललाय कि हाय मापरूर बेटा के जनम देयसी। हाय एबे कुआँरी रेलाय, मातर पवित्र आत्मा हातार लगे आयला आवरी हाय गरबबती होयलाय। हाय गोटक बेटा के जनम देलाय। जार नाम हाय यीशु सोंगायलाय। कायकाछे, यीशु मापरू आवरी माने दुनों आय।

यीशु बहुत चमत्कारमन कारलाय जोन ले जान पढ़ुयाय कि हाय मापरू आय। हाय पानी उपरे हिंडलाय आवरी तूफान के शांति करलाय। हाय बहुत बीमार लोकमन के अच्छा करलाय आवरी बहुत लोकमन ले दुस्टात्मामनके निकलायलाय। हाय मरला लोकमन के जीवित करलाय, आवरी हाय पाँच रोटी आवरी दुय माछ के 5,000 लोकमन के खुआयबा काछे पुरापुरी भोजन आने परिबर्तन करलाय।

यीशु गोटक महान शिक्षक बी रेलाय। जोन सबू हाय सिखायलाय, हायटा हाय सिद्धता ले सिखायलाय। जोन सबू हाय लोकमन ले करबा काछे बोलूआय हाय हाके कारबार ठीक आय कायकाछे कि हाय मापरूर बेटा आय। उदाहरण काछे, हाय सिखायलाय कि तोमके दूसरा लोकमन के हाय हिसाबे प्रेम करबा काछे आवश्यकता आय जसन तोमी आफ्ना के प्रेम करबास।

हाय ए बी सिखायलाय कि तोमके सबू चीज ले अधिक आवरी आपनार संपत्ति ले बी अधिक मापरू के प्रेम करबाराय।

यीशु बोललाय कि संसार आने काय बी चीज के पायबाले अधिक अच्छा आय मापरूर राज्य आने रेबार। हातार राज्य आने तोमर परबेस करबा काछे जरूरी आय कि मापरू तोमके तोमर पापमन ले बचाओ।

यीशु बोललाय कि केतक लोक हाके गर्हण करबाय। मापरू हाय लोकमन के बचायसी। मातर दूसरा लोक हाके गर्हण ना करबाय। हाय ए बी बोललाय कि केतक लोक अच्छा माटीर पारा आय, कायकाछे कि हायमन यीशुर विसय आने शुभ संदेश के गर्हण करुआत, आवरी मापरू हायमनके बचाउआय। मातर केतक लोकमन बाटर कठोर माटी पारा आत। मापरूर वचन बीज असन बाटे घसरुआय, मातर हायथाने काय बी ना आकरे। ए लोकमन यीशुर विसय आने संदेश के अस्वीकार करी करूआत। हायमन हातार राज्य आने परबेस करबा ले नाई करी देबाय।

यीशु सिखायलाय कि मापरू पापीमनके बहुत प्रेम करूआय। हाय हायमनके क्षमा करबार चाऊँआय आवरी हायमनके आपनार बेटा बेटी बनायबार चाऊँआय।

यीशु ए बी सांगलाय कि मापरू पाप ले घृणा करूआय। कायकाछे कि आदम आवरी हवा पाप करलाय, हायकाछे हाकर सबू वंसज बी पाप करलाय। ई संसार आने रेबा हर गोटक लोक पाप करूआत आवरी मापरू ले दूर आचेत। हर गोटक लोक मापरूर दुश्मन आय।

मातर मापरू ई संसार आने रेबा हर गोटक लोक ले ई रीति ले प्रेम करलाय: हाय आपनार गोटक बेटा के दी देलाय ताकि मापरू हायमन के दंड ना देओ जोन हातार उपरे विश्वास करूआय। हातार बजाय, हायमन हातार संगे सबूदाय काछे रेबाय।

तोमी मरबार योग्य आस, कायकाछे कि तोमी पाप करलास। तोमर ले मापरू दिशा होयबाटा उचित आय, एतार बजाय, हाय यीशुर उपरे रिशा होयलाय। हाय यीशु के क्रूसर मृत्यु देय करी दंड देलाय।

यीशु केबे पाप ना करलाय, मातर हाय मापरू के हाके दंड देके देलाय। हाय मरबार स्वीकार करलाय। ई रीति ले, तोमर पापमन के आवरी ई संसार आने रेबा हर गोटक लोकर पापमन के उठाय नेबा काछे हाय गोटक सिद्ध बदिदान रेला। यीशु आपना के मापरू काछे बलिदान देय देलाय, हायकाछे मापरू कोनी बी पाप के, एतक तक कि भयंकर पापमन के बी क्षमा करूआय।

भले ही अगर तोमी बहुत अच्छा काम मनके करूआस, टेबे एतार द्वारा मापरू तोमके ना बचाय। हातार संग बनबा काछे असन काय नियाय कि तोमी करके सकास। हातार बजाय, तोमके विश्वास करबाराय कि यीशु मापरूर बेटा आय, आवरी हाय तोमर बदले क्रूस आने मरी गलाय, आवरी ए बी कि मापरू हाके आवरी जीवित करी देलाय। अगर तोमी ए थाने विश्वास करबास, तेबे मापरू तोमर पापमन के क्षमा देयसी।

मापरू हाय हर गोटक लोक के बचायसी जोन यीशु उपरे विश्वास करूआय आवरी हाके आपनार परबू स्वीकार करूआय। मातर हाय हायमनके ना बचाय जोन हातार उपरे विश्वास ना करेत। ए काई मायने ना रये कि तोमी सौकार आस कि गरीब आस, माने आस कि बाएले आस, डोकरा आस कि धांगड़ा आस, या तोमी कोनती रेबास। मापरू तोमके प्रेम करूआय आवरी चाऊँआय कि तोमी यीशु उपरे विश्वास करा कि हाय तोमर संग बनके सकेत।

यीशु तोमके डाकसी आचे कि हातार उपरे विश्वास करा आवरी बपतिस्मा धरा। काय तोमी विश्वास करूआस कि मापरूर गोटक बेटा, यीशु ही मसीह आय ? काय तोमी विश्वास करूआस कि तोमी गोटक पापी आस आवरी ए कि तोमी मापरू द्वारा तोमके दंड पायबार योग्य आस ? तोमी विश्वास करूआस कि तोमर पापमन के मिटायबा काछे यीशु क्रूस आने मरलाय ?

अगर तोमी यीशु आने आवरी हाय तोमर काछे कराय हाय आने विश्वास करबा आस, तेबे तोमी गोटक मसीही आस! शैतान आपनार अंधकारर राज्य आने एबर तोमर उपरे शासन ना करे। एबर मापरू आपनार परकासर राज्य आने तोमर उपरे शासन करूआय। हाय तोमके पाप करबा ले रोकी देलाय, जोन तोमी करते रेलास। हाय तोमके गोटक नुआ, उचित जीवन देलाय।

अगर तोमी गोटक मसीही आस जोन यीशु करलाय हातार कारण मापरू तोमर पापमन के क्षमा करी देलाय। एबर, मापरू गोटक दुश्मनर बजाय तोमके गोटक अच्छा संग मानुआय।

अगर तोमी मापरूर संग आस आवरी परबू यीशुर सेवक आस तेबे तोमी हाय कथार पालन करबार इच्छा करबास जोन यीशु तोमके सिखाऊआय। भले तोमी गोटक मसीही आस, शैतान एबे बी पाप करबा काछे तोमर परीक्षा करसी। मातर मापरू सबूदाय हाय करूआय जोन हाय बोलूआय कि हाय करसी। हाय बोलूआय कि अगर तोमी आपनार पापमन के मानबास, तेबे हाय तोमके क्षमा करी देयसी। हाय तोमके पापर विरुद्ध लडबार काछे सामर्थ देयसी।

मापरू तोमके पराथना करबार आवरी हातार वचन के पढ़बा काछे बोलूआय। हाय तोमके दूसरा विश्वसिमन संगे मिली करी हातार आराधना करबा काछे बी बोलूआय। तोमके दूसरा लोकमन के बी सांगबाराय कि हाय तोमर काछे काय करला आचे। अगर तोमी ई सबू काम के करबास, तेबे तोमी हातार गोटक पक्का संग बनबास।