15. प्रतिज्ञा रा देश

अंत मंज, अबै सो टैम चली आ थू कि इस्रायली मणु प्रतिज्ञा रै देश, कनान मंज प्रवेश करन| तेैस देशा मंज यरीहो नां रा अक्क नगर थू| तसेरी सुरक्षा ताई तसेरै चोरुनी तरफ मजबूत दुआला थी| यहोशुयै तैस नगरा मंज दूँ भेदी जो भैज्जू| तैस नगर मंज राहाब नां री अक्क वेश्या रैहन्दी थी| तैहै इन्या भेदी जो लूकाऊ, अतै फिरी बादा मंज तैहै तिन्याजो नगर थऊँ बची करी नकैणै मंज मदद करी| तैहै एसा ठेरैताई करू कि क्योकि सो प्रमात्मै मंज विशवास करदी थी| जैस टैमै इस्रायली मणु यरीहो जो नाश करना तैहणै तिन्यै राहाब अतै तसारै टबरा री रक्षा करनै री प्रतिज्ञा करी थी|

इस्रायली मणु जो प्रतिज्ञा रै देश मंज गाणै ताई यरदन नदी पार करनी थी| प्रमात्मै यहोशु सितै बल्लू, “याजका जो पैहलै गाणा दे|” जैहणै याजकै यरदन नदी मंज अपणै कदमा जो रखु ता पाणी री धारा रा चलना बंद भूची गो, जैत थऊँ कि इस्रायली मणु नदी री दुई तरफ हुक्की जमीना पुर गिची सकन|

तिन्या मणुयै यरदन नदी पार करी लेई ता प्रमात्मै यहोशु सितै बल्लू कि यरीहो पुर हमला करनै ताई तैयार रेया, कि सो बड़ा पक्का नगर थू| प्रमात्मै तिन्या मणु सितै बल्लू कि तयांरै याजका अतै सपाई जो छिया धैड़ै तिकर तैस नगरा रै चोरुनी तरफ चक्कर लाणा हा| अत: याजका अतै सपाई एसा ही करू|

तैहणै सतमै धैड़ै, इस्रायलीयै तैस नगरा रै चोरुनी तरफ सात बरी होर चक्कर लाऐ| तसेरै नगरा रै चोरुनी तरफ सतमी बरी चक्कर लगाई लैड़ै थऊँ बाद, याजकै अपणी तुरही बजाई अतै सपाईयै जोरदार हल्ला पाऊ|

तैहणै यरीहो रै चोरुनी तरफ री दुआला डेई गेई! जिनी प्रमात्मै आज्ञा दितुरी थी इस्रायलीयै नगर री हर अक्क चीज जो खत्म करी दित्ता| तिन्यै केवल राहाब अतै तसारै टबरा जो छड्डी दित्ता, जेड़ै इस्रायली रा भाग बणी गछुरै थीयै| जैहणै कनान मंज रैहणै वाळै होरी मणुयै हुणु कि इस्रायलीयै यरीहो जो खत्म करी दिता हा, ता सो डरी गै कि इस्रायली मणु तिन्या पुर भी हमला करना|

प्रमात्मै इस्रायली जो आज्ञा दितूरी थी कि कनान मंज रैहणै वाळी कसी भ जाति सोगी शांतिसंधि ना करनी हा| पर गिबोनियों नामक अक्क कनानी जातियै यहोशु सितै झूठ बल्लू कि सो कनान थऊँ दूर अक्की जगहा रै रैहणै वाळै हिन्| तिन्यै यहोशु सितै तिन्या सोगी शांतिसंधि करनै रा अनुरोध करू| यहोशु अतै होर इस्रायली अगुवै प्रमात्मै थऊँ ना पुछु कि तिन्याजो कै करना चेहिन्दा| ठेरै बजाऐ, तिन्यै गिबोनियो रै सोगी शांतिसंधि करी लेई|

त्रीं धैड़ै बाद, इस्रायली जो पता लगा कि गिबोनी मणु कनान मंज ही रैहन्दै थीयै| जो जळी नकैए क्योकि गिबोनीयै तिन्या जो धोखा दित्ता थू| पर तिन्यै तिन्या सोगी करुरी तैसा शांतिसंधि जो बणाई रखु क्योकि सो प्रमात्मै रै सामणै करी गेई थी| तैहणै कुछ टैमा बाद, कनान मंज रैहणै वाळी अक्क अन्यजाति, एमोरी रै राजै हुणु कि गिबोनीयै इस्रायली सोगी शांतिसंधि करी लेई हा, ठेरैताई तिन्यै अपणी-अपणी सेना जो अक्क करीके अक्क बड्डी सेना बणाई अतै गिबोन पुर हमला करी दित्ता| गिबोनीयै तयांरी मदद करनै ताई यहोशु बलै अक्क सन्देश भैज्जू|

अत: यहोशुयै इस्रायली री सेना जो कठेरु अतै गिबोनी बलै पूजणै ताई सो पुरी रात चलै| भयागा तड़कै मंज तिन्यै एमोरी री सेना जो हेरान करी दित्ता अतै तिन्या पुर हमला करी दित्ता|

तैस धैड़ै प्रमात्मा इस्रायली ताई लड़ू| तिनी ऐमोरी जो डराई दित्ता अतै तिनी मोट्टै-मोट्टै ओळै फड़ाई करी मतै सारै एमोरी जो मारी दित्ता|

प्रमात्मै सुरजा जो भी अम्बरा मंज अक्की जगह पुर रोकी दित्ता ताकि इस्रायली जो पर्याप्त टैम मुळी गच्छा कि एमोरी जो पुरी तरह थऊँ हराई दीन| तैस धैड़ै, प्रमात्मै इस्रायली ताई अक्क बड्डी जित हासल करी|

जैहणै प्रमात्मै तिन्या जो हराणै रै बाद, मतै कनानी जाति रै मणु इस्रायल पुर हमला करनै ताई किठीयै| यहोशु अतै इस्रायलीयै हमला करीके तयांरा सर्वनाश करी दित्ता|

इन्या युद्ध रै बाद, प्रमात्मै इस्रायल रै पत्येक गोत्रा जो प्रतिज्ञा रै तैस देशा मंज तयांरा भाग दित्ता| तैहणै प्रमात्मै इस्रायल जो तसेरी सभी सीमा पुर शांति प्रदान करी|

जैहणै यहोशु बुड्डा भूची गो ता तिनी इस्रायल रै सबी मणु जो अक्क सोगी हद्दू| तैहणै यहोशुयै तिन्या मणु जो याद करऊ कि तिन्यै तैसा वाचा रा पालन करनै री प्रतिज्ञा करी थी जेड़ी प्रमात्मै तिन्या सोगी सीनै पाड़ा पुर बन्नी थी| तिन्या मणुयै प्रमात्मै रै प्रति विशवासयोग्य रैहणै अतै तसेरी व्यवस्था रा पालन करनै रा वादा करू|