14. बणा मंज भटकणा

प्रमात्मै इस्रायली जो तिन्या नियमा जो दसणा खत्म करू जिंयारा तिन्याजो बन्नी गेई तसेरी वाचा रै कारण पालन करना हा| फिरी तिनी सीनै पाड़ा थऊँ अग्गै तयारी अगुवाई करी| सो तिन्याजो प्रतिज्ञा रै देशा मंज लेई गाणा चाहन्दा थू| एह देश कनान भी कहलन्दा थू| प्रमात्मै बदळा रै खम्बै मंज अगुं-अगुं चलू, अतै सो तसेरै पचुं-पचुं चलै|

प्रमात्मै अब्राहम, इसहाक अतै याकूब सितै प्रतिज्ञा करी थी कि सो प्रतिज्ञा रा सो देश तयांरै वंशजा जो दिल्ला, पर एस टैमै तैठी मती सारी जाति रेऊ करदी थी| सो कनानी कहलन्दै थीयै| ऐ कनानी मणु प्रमात्मै री आराधना ना करदैं थीयै अतै तसेरी आज्ञा जो ना मनदै थीयै| सो झुठे देवतै री उपासना करदै थीयै अतै मतै सारै बुरै कम करदै थीयै|

प्रमात्मै इस्रायली सितै बल्लू, “जैहणै तुहै तैसा वाचा रै देशा मंज गान ता तठी या रै सबी कनानी थऊँ छुटकारा पाई लैं| तिन्या सोगी संधि मत करदै अतै तिन्या सोगो बैह मत करदै| तूसियो तयांरी सबी मूर्ति जो पुरी तरह थऊ खत्म करी दीणा हा| जे तुहै मेरी आज्ञा ना मनलै, ता तुहै मेरै बजाए तयांरै देवतै री पूजा करना लगणा|”

जैहणै इस्रायली कनान री सीमा पुर पुज्जै, मुसै इस्रायल रै हरअक्क गोत्रा मंज थऊँ अक्क-अक्क करीके बारा जोआना जो चुणु| तिनी तिन्या जो गिचिकरी तैस देशा रा भेद लैणै रै निर्देश दितै कि हेरा कि सो किना देश हा| तिन्या जो तिन्या कनानी रा भेद भी लैणा थू कि हेरा कि सो जोरावाळै थीयै कि या कमजोर थीयै|

तिन्या बारा जोआनै पुरै कनान मितै भुन्दै चाळीया धैड़ै री यात्रा करी अतै फिरी सो वापस फिरी आयै| तिन्यै मणु जो दस्सू, “सो देश बड़ा उपजाऊ हा अतै फसला बड़ी ज्यादा री हिन्!” पर दस भेदीयै बल्लू, “तयांरै नगर बड़ै पक्कै हिन् अतै सो लम्बै-चोड़ै हिन्! जे अहै तिन्या पुर हमला करदै हिन्, ता पक्का सो असियो हराई दीणा अतै असियो मारी दीणा|”

तुरंत ही कालेब अतै यहोशु अतै होर दूँ भेदीयै बल्लू, “एह सच हा कि कनान रै मणु लंबै अतै जोरावाळै हिन्, पर पक्का अहै तिन्या जो हराई सकदैं हिन्! प्रमात्मै असू ताई लड़ला!”

पर मणुयै कालेब अतै यहोशु री ना हुणी| सो मूसा अतै हारून पुर जळी नकैए अतै बल्लू, “ तुहै असियो एस डरावनी जगह पुर कजो लेई करी आयै हिन्? असियो मिस्र मंज ही रैहणा चेहिन्दा थू| जे अहै तैस देशा मंज गन्दै हिन् ता असै युद्ध मंज मारै गाणै, अतै कनान रै मणु ईन्दी लाड़ी अतै बच्चे जो दास बणाई लैणा|” सो मणु तिन्या जो वापस मिस्र मंज लेइकरी गाणै ताई अक्क होरी अगुवै जो चुणना चाहन्दै थीयै|

जैहणै तिन्या मणुयै एसा बल्लू ता प्रमात्मा बड़ा क्रोधित भूची गो| सो मिलाप वाळै तम्बू मंज आ अतै बल्लू, “तुहै मेरै विरुद्ध बलवा करू हा, ठेरैताई तुसू सबी जो एस बणा मंज भटकणा पैणा| हर अक्क जन जेड़ा बिया साला या तैत थऊँ ज्यादा उम्रा रा हा तैठी मरी गाणा अतै कदी भी तै देशा मंज प्रवेश ना करी पाणा जेड़ा अऊँ तुसियो दिंदा हा| केवल कालेब अतै यहोशु तैस मंज प्रवेश करलै|”

जैहणै मणुयै प्रमात्मै जो एसा बलन्दै हुणु, ता सो दुखी भूयै क्योकि तिन्यै पाप करूरा थू| ठेरैताई तिन्यै कनान रै मणु पुर हमला करनै रा फैसला करू| मुसै तिन्या जो ना गाणै ताई चेतावनी दिती क्योकि प्रमात्मै तिन्या सोगी ना गाणा, पर तिन्यै तसेरी ना हुणी|

प्रमात्मै एस युद्ध मंज तिन्या सोगी ना गछुरा थू, ठेरैताई कनानीयै तिन्या जो पराजित करी दित्ता अतै तिन्या मंज थऊँ मतै जो मारी दिता| तैहणै इस्रायली मणु कनान थऊँ वापस मुड़ी गै| अगलै चाळीया साला तिकर, सो बणा मंज एरा-ओरा भटकणा|

इस्रायली मणु दुआरा बणा मंज भटकणै रै चाळीया साला रै दोरान, प्रमात्मै तयांरी जरूरता जो पूरा करू| तिनी तिन्या जो स्वर्गा थऊँ "मन्ना" कहलाणै वाळी रोट्टी दित्ती| तिनी बटेरै रै झुण्ड भी ( जो कि मध्यम अकार रै पखेरु भुन्दै हिन्) तयारी वारगा मंज भैज्जै ताकि ताकि तिन्या बलै खाणै ताई मॉस भोआ| तैस पुरै टैमै, प्रमात्मै तन्यारै ओडणा अतै जूट्टै जो फटणै थऊँ बचाई रखु|

ऐठिया तक कि प्रमात्मै तन्यारै पिणै ताई चमत्कारी रूपा सितै गोड़ी थऊँ पाणी कड्डू| पर इन्या सबी रै उपरान्त, इस्रायली मणुयै प्रमात्मै रै वरुद्ध अतै मूसा रै वरुद्ध शकैत करी अतै कुड़कुड़ायै| ताभी प्रमात्मा विस्वासयोग्य थू| तिनी जेड़ी प्रतिज्ञा करी थी कि सो अब्राहम, इसहाक, अतै याकूब रै वंशजा ताई करला तिनी सो करू|

अक्क होर टैमै जैहणै तिन्या मणु बलै पाणी ना थू, प्रमात्मै मूसा सितै बल्लू, “गोड़ी सितै गल्ला कर, अतै तैत थऊँ पाणी निकळना|” पर मूसै गोड़ी सोगी गल्ला ना करी| बजायै ठेरै, तिनी होठ्ठी सितै गोड़ी पुर दोई बरी मारू| एसा रीती सितै तिनी प्रमात्मै रा निरादर करू| सबी रै पिणै ताई पाणी ता निकळी आ, पर प्रमात्मै मूसा पुर जळू| तिनी बल्लू, “क्योकि तेई एसा करू हा, ठेरैताई तू प्रतिज्ञा रै देशा मंज गिची ना पाणा|”

जैहणै इस्रायली मणु चाळीया साला तिकर बणा मंज भटकी चुकूरै थीयै, तैहणै जिन्यै प्रमात्मै रै वरुद्ध बलवा करू थू सो सब मरी गै थीयै| तैहणै प्रमात्मै तिन्या मणु जो फिरी थऊँ तैस प्रतिज्ञा रै देशा रै सिवाणै तिकर लेई गो| अबै मूसा बड़ा बुड्डा भूची गछुरा थू, ठेरैताई प्रमात्मै मणु री अगुवाई करनै मंज तसेरी मदद करनै ताई यहोशु जो चुणु| प्रमात्मै मूसा सितै एह प्रतिज्ञा भी करी थी कि अक्क धैड़ा सो तिन्या मणु बलै मूसा जीना अक्क भविष्यवक्ता भैजणा|

तैहणै प्रमात्मै मुसा जो अक्क पाड़ा री चोटी पुर गाणै ताई बल्लू ताकि सो प्रतिज्ञा रै देशा जो हेरी सका| मुसै तैसा प्रतिज्ञा रै देशा जो हेरू पर प्रमात्मै तैसियो तैत मंज गाणै री अनुमति ना दिती| तैहणै मुसा मरी गो, अतै इस्रायलीयै ति धैड़ै तिकर दुःख मनऊ| यहोशु तयांरा नोआ अगुवा बणी गो| यहोशु अक्क अच्छा अगुवा थू क्योकि तिनी प्रमात्मै पुर भरोसा करू अतै तसेरी गल्ला जो मन्नू|