13. इस्राएल रै सोगी प्रमात्मै री वाचा

इस्राएल जो लाल समुंदर थऊँ पार लेईकरी गाणै रै बाद, प्रमात्मै तिन्याजो बणा मितै भूची करी सीनै कहलाणै वाळै पाड़ा री तरफ लेई करी चलू| एह सो ही पाड़ थू जैठी मूसै बळदी झाड़ी जो हेरू थू| तिन्या मणुयै तैस पाड़ा रै थल्लै अपणै तम्बू जो स्थापित करू|

प्रमात्मै मुसा सितै अतै इस्राएल रै सबी मणु सितै बल्लू, “तुसीयो हमेशा मेरी गल्ला जो मनणा हा अतै जेड़ी वाचा अऊँ तुसू सोगी बनदा हा तैसायो बणाई रखणा हा| जे तुहै एसा करदै हिन्, ता तुहै मेरा तोहफा बहुमूल्य धन, याजका रा राज्य, अतै अक्क पवित्र जाति ठेहरना|”

प्रमात्मै दुआरा तिन्या बलै ईणै ताई मणुयै तराई धैड़ै तिकर अप्पू जो तेयार करू| तैहणै प्रमात्मै सीनै पाड़ा री चोटी पुर थल्लै उतरु| जैहणै सो आ ता भूकंप भुआ, बिजली चमकी, धूं ऊठु, अतै तुरही रा जोरदार शब्द भुआ| तैहणै मूसा अप्पू पाड़ा पुर चढ़ी गो|

तैहणै प्रमात्मै मणु रै सोगी अक्क वाचा बन्नी| तिनी बल्लू, “ अऊँ तुन्दा प्रमात्मा, यहोवा हा| अऊँ ही हा जिनी तूसियो मिस्र रै दासत्व थऊँ छुड़ाऊ| कसी अन्य देवतै री उपासना मत करदै|”

“मूर्ति मत बणन्दै अतै तयांरी उपासना मत करदै, क्योकि अऊँ, यहोवा, तुन्दा अक्कमात्र प्रमात्मा हा| अनुचित रीती सितै मेरै नां रा प्रयोग मत करदै| सब्त रै धैड़ै जो पवित्र मनणै ताई याद रखणा| दुयै शब्दा मंज, छीं धैड़ै मंज अपणै सब काम करना, सतमां धैड़ा तुन्दै ताई आराम करनै अतै मिंजो याद करनै रा धैड़ा हा|”

“अपणै माता अतै पिता रा आदर करना| व्यभिचार ना करना| चोरी ना करना| अपणै पड़ेही री लाड़ी, तसेरै घर, या तसेरै कसी भी समाना जो लेई लैणै री इच्छा मत करदा|”

तैहणै प्रमात्मै इन्या दसा आज्ञा जो नड़ा री दूँ पट्टी पुर लिखी करी मुसा जो दी दित्ता| प्रमात्मै पालन करनै ताई मणु जो अन्य मती जिनी व्यवस्था दित्ती| जे तिन्यै इन्या व्यवस्था रा पालन करू ता प्रमात्मै तिन्या मणु जो आशीष दीणै अतै तंयारी सुरक्षा करनै री प्रतिज्ञा करी| पर तिनी बल्लू कि जे तिन्यै ठेरा पालन ना करू ता सो तिन्या जो दंड दीणा|

प्रमात्मै इस्रायली थऊँ अक्क बड्डा तम्बू बणाणै ताई भी बल्लू- मिलाप वाळा तम्बू| तिनी तिन्या जो ठीक ठीक दस्सू कि एस तम्बू जो किन्या बणाऊ हा, अतै तसेरै अंदर किन्या चिजा जो रखणा हा| तिनी तिन्या जो तैस तम्बू जो दूँ कमरै मंज बडंणै ताई अक्क मोट्टै पर्दै जो बणाणै ताई बल्लू| प्रमात्मै तैस पर्दै रै पचुआं वाळै कमरै मंज इणा अतै तैठी रैहणा| जैठी प्रमात्मा थू तैस कमरै मंज गाणै री अनुमति सिर्फ महायाजक जो थी|

तिन्या मणु जो तैस मिलाप वाळै तम्बू रै सामणै अक्क वेदी जो बणाणा पैणा| कोई भी जेड़ा प्रमात्मै री व्यवस्था री अवज्ञा करा सो तैसा वेदी पुर अक्क जानवर जो लेइकरी अईया| तैहणै याजक तैसियो बली करला अतै वेदी पुर प्रमात्मै ताई बलि रै रूपा मंज बाळला| प्रमात्मै बल्लू कि तैस जानवरा रा खून तैस व्यक्ति रै पापा जो डक्की लैला| एसा रीती सितै, अबै प्रमात्मा तैस पापा जो ना हेरला| सो व्यक्ति प्रमात्मै री नजरी मंज "शुद्ध" ठेरला| प्रमात्मै मूसा रै भाई हारून जो अतै हारून रै वंशजा जो अपणै याजक भूणै ताई चुणु|

प्रमात्मै तिन्या मणु जो जेड़ै नियम दितुरै थीयै सो तयांरा पालन करनै ताई सहमत भूयै| सो केवल प्रमात्मै रै मणु भूणै जो अतै केवल तसेरी आराधना करनै ताई सहमत भूयै|

कई धैड़ै तिकर, मुसा सीनै पाड़ा री चोटी पुर ही रेऊ| सो प्रमात्मै सितै गला करू करदा थू| पर मणु तिन्या बलै वापस फिरनै री भाळ करदै-करदै खीजी गै| ठेरैताई सो हारून बलै सोना लेईकरी आए अतै तैस सितै अक्क मूर्ति बणाणै ताई बल्लू ताकि सो प्रमात्मै रै बजाए तसेरी उपासना करी सकन| एसा रीती सितै, तिन्यै भयंकर रूप सितै प्रमात्मै रै बिरुद्ध पाप करू|

हारूनै बछु रै अकार मंज सोनै री अक्क मूर्ति बणाई| तिन्या मणुयै तैसा मूर्ति री उपासना करना शुरू करी दिता अतै अतै तैसियो बलि चड़ाई! तयांरै पाप री वजह थऊँ प्रमात्मै बड़ा जळू| सो तिन्या जो खत्म करी दीणा चाहन्दा थू| पर मूसै तिन्या जो ना मारनै रा प्रमात्मै सितै विनती करी| प्रमात्मै तसेरी विनती जो हुणु अतै तिन्या जो खत्म ना करू|

आखिरकार मूसा सीनै पाड़ा थऊँ उतरी आ| तिनी तिन्या दूँ नड़ा री पट्टी जो लेउरी थी जिंया पुर प्रमात्मै दस आज्ञा जो लिखू थू| फिरी तिनी तैसा मूर्ति जो हेरू| सो एतना जळू कि तिनी तिन्या पट्टी जो चकनाचूर करी दित्ता|

फिरी मुसै तैसा मूर्ति जो पिह करी तसारा बुरादा बणाई दित्ता, अतै तैस बुरादै जो पाणी मंज मलाईकरी तिन्या मणु जो सो पाणी पियाई दित्ता| प्रमात्मै तिन्यै मणु पुर अक्क मुसीबत भैजी अतै तिन्या मंज थऊँ मतै मणु मरी गै|

जिंया पट्टी जो मूसै त्रोड़ी दिता थू तयांरी जगह लैणै ताई मुसै तिन्या दस आज्ञा री नड़ा री नोई पट्टी जो बणाऊ| तैहणै सो फिरी पाड़ा पुर चढ़ी गो अतै प्रार्थना करी कि प्रमात्मा तिन्या मणु जो माफ़ करा| प्रमात्मै मूसा री हुणी अतै तिन्याजो माफ़ करी दित्ता| नोई पट्टी पुर दस आज्ञा जो लेऊरै मुसा पाड़ा थऊँ थल्लै उतरी आ| तैहणै प्रमात्मै सीनै पाड़ा थऊँ लेईकरी प्रतिज्ञा रै देश तिकर इस्रायली री अगुवाई करी|