12. निर्गमन

इस्रायली मणु मिस्र थऊँ निकळी करी बड़ै खुश थीयै| सो अबै दास ना थीयै, अतै सो प्रतिज्ञा रै देशा जो चलूरै थीयै! जेड़ा कुछ भी इस्रायलीयै मंगू, मिस्रीयै तिन्या जो सब कुछ दित्ता, ऐठीया तक कि सोना अतै चाँदी अतै अन्य खास चिजा| दूयै देशा रै कुछ मणुयै प्रमात्मै पुर विशवास करू अतै जैहणै इस्रायली मणु मिस्र थऊँ निकळै ता सो भी तिन्या सोगी भूची गो|

धैड़ै रै दोरान बदळा रा अक्क मोट्टा खम्बा तसेरै अगै- अगै चलू| अतै राती रै टैमै एह अग्गी रा खम्बा बणी गो| प्रमात्मा जेड़ा कि तैस बदळा रै खम्बै मंज अतै अग्गी रै खम्बै मंज थू, हमेशा तयारै सोगी थू अतै तिनी यात्रा करदै टैमै तयारी अगुआई करी| तिन्याजो केवल एतना करना थू कि तसेरै प्चुं चलन|

थोड़ै टैमा रै बाद,फिरौन अतै त्सेरै मणुयै अपणै मना जो बदली दित्ता| सो इस्रायली जो फिरी थऊँ अपणा दास बणाणा चाहन्दै थीयै| ठेरैताई तिन्यै इस्रायली रा पीछा करू| एह प्रमात्मा ही थू जिनी तयांरै मना जो बदली दित्ता थू| तिनी एसा ठेरैताई करू क्योकि सो चाहन्दा थू कि हर कोई एह जाणी लेया कि फिरौन थऊँ अतै मिस्री रै देवता थऊँ सो, यहोवा, ज्यादा शक्तिशाली हा|

जैहणै इस्रायली मिस्र री सेना जो इन्दै हेरू ता तिन्या जो पता लगा कि सो फिरौन री सेना अतै लाल समुंदर रै बीचा मंज फस्सी गै| सो बड़ै डरी गै अतै रुणा लगै, “ अहै मिस्र जो कजो छड्डू ? अहै मरनै वाळै हिन्!”

मूसै इस्रायली सितै बल्लू, “ डरना बंद करा! प्रमात्मै अज तुसू ताई लड़ना अतै तुसियो बचला|” तैहणै प्रमात्मै मुसा सितै बल्लू, “इन्या मणु थऊँ लाल समुन्दरा री तरफ अगुं बदणै ताई बल्लू|”

तैहणै प्रमात्मै तैस बदळा रै खम्बै जो लेइकरी इस्रायली अतै मिस्री रै बिचा मंज रखी दित्ता ताकि मिस्री मणु इस्रायली जो हेरी ना पान|

प्रमात्मै मूसा सितै समुन्दरा पुर अपणा हाथ बदाणै ताई बल्लू| फिरी प्रमात्मै हवा सितै समुन्दरा रै पाणी जो सज्जी अतै खब्बी तरफ कराई दित्ता, जैत थऊँ कि समुंदर थऊँ भूची करी अक्क रस्ता बणी गो|

इस्रायली मणु अपणै धुनी तरफ पाणी री दुआला सोगी हुक्की जमीना पुर समुन्दरा मितै भूचीकरी बदी चलै|

तैहणै प्रमात्मै तैस रस्तै थऊँ बदळा जो चुकी लेऊ ताकि मिस्री मणु इस्रायली जो बची करी गन्दै हेरु| मिस्रीयै तिन्या जो पकड़नै ताई त्यांरा पीछा करनै रा फैसला लेऊ|

अत: तिन्यै समुंदर रै माध्यम सितै तैस रस्तै पुर इस्रायली रा पीछा करू, पर प्रमात्मै मिस्री जो घबराई दित्ता अतै तयांरै रथा जो टकाई दित्ता| सो बकणा लगै, “नहा! इस्रायली री तरफा थऊँ प्रमात्मै लड़ु करदा हा!”

पुरै इस्रायली समुन्दरा री दुई तरफ पूजी गै| तैहणै प्रमात्मै मुसा सितै बल्लू कि सो फिरी पाणी पुर हाथ बड़ाअ| जैहणै मुसै एसा करू, ता पाणी मिस्री सेना पुर इची पेऊ अतै अपणी समान्य दशा मंज भूची गो| पुरी मिस्री सेना डूबी गेई|

जैहणै इस्रायलीयै हेरू कि मिस्री मरी गै थीयै ता तिन्यै प्रमात्मै पुर विशवास करू| तिन्यै विशवास करू कि मुसा प्रमात्मै री तरफा थऊँ भविष्यवक्ता थू

इस्रायली मणु ठेरैताई भी बड़ै खुश थीै क्योकि प्रमात्मै तिन्या जो मरनै थऊँ अतै दास भूणै थऊँ बचाई लेऊ थू| अबै सो प्रमात्मै री आराधना करनै अतै तसेरी आज्ञा रा पालन करनै ताई आजाद थीयै| इस्रायलीयै अपणी आजादी रा उत्सव मनाणै ताई अतै प्रमात्मै री स्तुति करनै ताई कई गीता जो गऊ क्योकि तिनी तिन्याजो मिस्री री सेना थऊँ बचऊ थू|

प्रमात्मै इस्रायली जो हर साल अक्क त्योहार मनाणै रा हुक्म दित्ता एह याद करनै ताई कि किन्या प्रमात्मै मिस्री जो पराजित करू अतै तिन्याजो दास भूणै थऊ आजाद करू| एह फसह रा पर्व कहलऊ थू| एतमंज तिन्याजो ठेरा उत्सव मनाणै ताई अक्क ठीक मेमने जो बलि करना थू, तैसियो भूजणा थू, अतै तैसियो बिना खमीर वाली रोट्टी सोगी खाणा थू|