16. छड़ाणैं वाळै

यहोशू रे मरनै थऊँ बाद इस्राएलियै परमात्मै रा हुकम ना मन्नू। तिन्यै परमात्मै रै कनुना रा पालन ना करू, अतै तिन्यै तैस वाचा रै देशा थऊँ बचुरै कनानी जो बाहर ना कड्डू। इस्राएलियै अपणै सच्चै परमात्मै, यहोवा जो छडी करी कनानी रै देवतै री पूजा करना शुरू करी दिती। इस्राएली बलै कोई राजा ना थू, ठेरैताईं जैसियो जेड़ा सही लगु तिनी सो ही करू।

परमात्मै री आज्ञा ना मनणै रै द्वारा इस्राएलियै अक्की रवाजा जो शुरू करी दित्ता जेसियो कई बरी दोहराया गो थू। ऐह रवाज इस प्रकार थऊँ चलू: कुछ साल तक इस्राएली परमात्मै री आज्ञा ना मनणी,तैहणै सो तिन्या जो तयांरै दुशमणा थऊँ हराणै रै द्वारा दंडित करला। ऐह दुशमण इस्राएली थऊँ तयांरी चीजा जो लुट्टी लैलै, तयांरी जायदादी जो खत्म करी दिणा, अतै तिन्या मन्ज थऊँ मतै जो मरी दिणा। फिरी जैहणै इस्राएली रै दुशमण तिन्या पुर कई साला तक अत्याचार करना, तैत थऊँ बाद इस्राएली अपणैं पापा रा पश्चाताप करना अतै परमात्मै थऊँ तिन्या जो बचाणै ताई प्रार्थना करनिया।

हर बरी जैहणै इस्राएली पश्चाताप करना तां परमात्मै तिन्या जो बचाणा। सो आक्क छड़ाणै वाळै रै द्वारा इन्या करना – आक्क ऐसा जन जेड़ा तयांरै दुशमणा रै वरुद्ध लड़ना अतै तिन्या जो हराई दिणा। तैहणै देशा मन्ज शान्ति भूणीया अतै सो छड़ाणै वाळा तिन्या पुर ठीक तरह थऊँ शासन करना। परमात्मै तिन्या मणु जो बचाणै ताईं मतै छड़ाणै वाळै जो भेजू। परमात्मै नेड़ै ही रै अक्की दुशमण जाति, मिद्यानी रै द्वारा इस्राएली जो हराणै रै द्वारा फिरी थऊँ ऐसा करू।

मिद्यानियै सत्ता साला तक इस्राएली री फसला जो लूटू। इस्राएली मणु बड़ै डरी गै थीयै, अतै सो गुफा मन्ज लुक्की बैहै ताकि मिद्यानी मणु तिन्या जो तोपी ना पान। आखिरकार, तिन्या जो बचाणै ताईं तिन्यै परमात्मै जो पुकारु।

गिदोन नां रा आक्क इस्राएली जोआन थू। आक्क दिन, सो अक्की गुप्त जगह मन्ज कणका झाड़ू करंदा थू ताकि मिद्यानी मणु तैतियो चोरी ना पान। यहोवा रै स्वर्गदूतै गिदोन रै नेड़ै इचिकरी तैस सितै बल्लू, "हे शूरवीर सूरमा, परमात्मा तीजो सोगी हा। गा अतै इस्राएली जो मिद्यानी थऊँ बचा।"

गिदोन रै पिता बलै मूर्ति जो समर्पित आक्क वेदी थी। सब्बी थऊँ पैहली गाल जेड़ी परमात्मै गिदोन जो करनै ताईं बली सो तैसा वेदी जो त्रोड़ना थू। अपर गिदोन मणु थऊँ डरन्दा थू, ठेरैताईं तिनी रात भूणै री भाळ करी। तैहणैं तिनी तैसा वेदी जो त्रोड़ी करी टुकड़ै-टुकड़ै करी दित्ता। तिनी परमात्मै ताईं आक्क नोई वेदी जो बणाऊ अतै तैसा पुर परमात्मै ताईं बलि चढ़ाई।

अगली भ्यागा मणुयै हेरू कि कसीयै वेदी जो त्रोड़ी करी टुकड़ै-टुकड़ै करी दितुरा हा, ठेरैताईं सो बड़ै जळै। सो गिदोन जो मारनै ताईं तसेरै घरै गै, अपर गिदोन रै पितै बल्लू, "तुहै क्यो अपणै देवतै री मदद करना लगुरै हिन्? जे सो देवता हा ता तैसियो अपणी रक्षा अप्पू करना देया!" क्योकि तिनी ऐसा बल्लू ठेरैताईं मणुयै गिदोन जो ना मारू।

तैहणैं इस्राएली जो लूटणै ताईं मिद्यानी मणु फिरी आयै। सो ऐतणै सारै थीयै कि तयांरी गिणती भी ना करी सकन्दै थीयै। गिदोनै तयांरै वरुद्ध लड़णै ताईं इस्राएली जो आक्क सोगी हद्दू। गिदोनै परमात्मै थऊँ दूँ चिन्हा री माँग करी ताकि तैसियो विश्वास भूची गच्छा कि परमात्मा सच मन्ज तैसियो इस्राएल जो बचाणै ताईं बल्लू करदा हा।

पैहलै चिन्ह ताईं, गिदोनै भेड़ा री ऊना जो जमीना पुर रखी करी परमात्मै सितै बल्लू कि भ्यागा री ओस केवल भैड़ा री ऊना पुर पेया अतै जमीना पुर ना पेया। परमात्मै ऐसा ही करू। अगली रात, तिनी परमात्मै सितै बल्लू कि जमीन सीजी गच्छा अपर भैड़ा री ऊन हुक्की रेया। परमात्मै ऐसा भी करू। इन्या दूँ चिन्हा रै कारण, गिदोनै विश्वास करू कि परमात्मा सच मन्ज चाहन्दा हा कि सो इस्राएली जो मिद्यानी थऊँ बचा।

तैहणैं गिदोनै सपाई जो अप्पू बलै हद्दू अतै 32,000 सपाई आयै। अपर परमात्मै तैस सितै बल्लू कि ऐह बड़ै ज्यादा हिन्। अतः गिदोनै तिन्या सब्बी थऊँ 22,000 सपाई जो घर वापस भैजी दित्ता जेड़ै लड़नै थऊँ डरदैं थीयै। परमात्मै गिदोन सितै बल्लू कि ऐह सपाई अल्ली भी बड़ै ज्यादा हिन्। ठेरैताईं गिदोनै 300 सपाई जो छडी करी तिन्या सब्बी जो घरा जो भैजी दित्ता।

तैसा राती परमात्मै गिदोन सितै बल्लू, "मिद्यानी रै डेरै मन्ज गा अतै तिन्या जो गल्ला करदैं हुण। जैहणै तू हुणा कि सो कै गल्ला करदैं हिन् तां तू तिन्या पुर हमला करनै थऊँ मत डरन्दा।" ठेरैताईं तैसा राती, गिदोन थल्लै तयांरै डेरै मन्ज गो अतै तिनी अक्की मिद्यानी सपाई जो अपणैं दोस्ता जो सो गाल हुणन्दै हुणु जेड़ी तिनी सुपनै मन्ज हेरी थी। तैस सपाई रै दोस्तै बल्लू, "एस सुपनै रा मतलब हा कि गिदोन री सेना असू मिद्यानी सेना जो हराई दिणा!" जैहणै गिदोनै ऐह हुणू तां तिनी परमात्मै री स्तुति करी।

तैहणैं गिदोन अपणै सपाई बलै फिरू अतै तिन्या जो हर अक्की जो आक्क-आक्क तुरही, आक्क चिक्का रा भांडा, अतै आक्क मशाल दिती। तिन्यै तैस डेरै जो घेरी लेऊ जैठी मिद्यानी सपाई सुतुरै थीयै। गिदोन रै 300 सपाईयै अपणी मशाला भांडै सितै ढकुरी थी ठेरैताईं मिद्यानी मणु तिन्या मशाला री लोई जो ना हेरी पायै थीयै।

तैहणैं गिदोन रै सब्बी सपाईयै अपणै भांडै जो आक्क ही टैमा पुर भन्नी करी अचानक थऊँ मशाला री अग्गी जो प्रकट करी दित्ता। तिन्यै अपणी तुरही बजाई अतै बलणा लगै, "यहोवा री अतै गिदोन री तलवार!"

परमात्मै मिद्यानी जो डराई दित्ता, ठेरैताईं सो अक्की दुयै जो मारना-बडणा लगै। तोळैं ही, गिदोनै दुत्ता जो मतै होरी इस्राएली जो मिद्यानी रा पीछा करनै मन्ज तयांरी मदद करनै जो हदणैं ताईं भैजै। तिन्यै तिन्या मन्ज थऊँ मतै मारी दित्तै अतै बाकि रा पीछा करीके तिन्या जो इस्राएल देशा थऊँ बाहर कड्डी दित्ता। तैस दिन 1,20,000 मिद्यानी मारै गै। एस तरह परमात्मै इस्राएल जो बचाऊ।

सो मणु गिदोन जो अपणा राजा बणाणा चाहन्दै थीयै, अपर गिदोनै तिन्या जो इन्या ना करना दित्ता, अपर तिनी तिन्या थऊँ सो सोनै रै गैणै मंगै जेड़ै तिन्या मन्ज थऊँ हर अक्कीयै मिद्यानी थऊँ लुट्टी लै थीयै। तिन्यै मणुयै बड़ी मात्रा मन्ज गिदोन जो सोना दित्ता।

तैहणैं गिदोनै तैस सोनै सितै आक्क खास ओडण बणाऊ जिंया कि महायाजक पैनदैं थीयै। अपर मणुयै तसेरी पूजा करना शुरू करी दित्ता जिंया कि सो आक्क मूर्ति भोआ। तैहणैं परमात्मै फिरी इस्राएल जो दंड दित्ता क्योकि तिन्यै मूर्ति री पूजा करी थी। परमात्मै तयांरै दुशमणा जो तिन्या जो हराणै ताईं शक्ति दित्ती। आखिरकार तिन्यै फिरी परमात्मै थऊँ मदद करनै ताईं प्रार्थना करी, अतै परमात्मै तिन्या बलै तिन्या जो बचाणै ताईं आक्क होरी छड़ाणै वाळै जो भैजू।

ऐह ही गाल कई बरी घटि: इस्राएली मणु पाप करना, परमात्मा तिन्या जो दंडित करला, तिन्या पश्चाताप करना, अतै परमात्मै तिन्या जो छड़ाणै ताईं कसी जो भैजणा। कई साला तक, परमात्मै मतै छड़ाणै वाळै जो भैजू जिन्यै इस्राएली जो तयांरै दुशमणा थऊँ बचाऊ।

आखिरकार, तिन्यै मणुयै होरी देशा साईं परमात्मै थऊँ अपणैं ताईं अक्की राजै री माँग करी। सो आक्क ऐसा राजा चाहन्दै थीयै जेड़ा लंबा अतै शक्तिशाली भोआ, अतै जेड़ा लड़ाई मन्ज तयांरी अगुवाई करी सका। परमात्मै जो ऐह बिनती खरी ना लगी, अपर तिनी तिन्या जो तिना ही राजा दित्ता जिनी तिन्यै माँग करी थी।