19. भविष्यद्वक्ता

प्रमात्मा हमेशा इस्रायली रै बलै भविष्यवक्ता जो भैजन्दा रैहन्दा थू| भविष्यवक्ता प्रमात्मै थऊँ संदेसा जो हुणदैं थीयै अतै फिरी तैतियो मणु जो दसन्दै थीयै|

जैहणै अहाब इस्रायल राज्य पुर राजा थू ता तैस टैमै एलिय्याह भविष्यवक्ता थू| अहाब अक्क बुरा मणु थू| तिनी झूठै बाल देवतै री पूजा कराणै ताई मणु जो मजबूर करू थू| ठेरैताई एलिय्याहै अहाब सितै बल्लू कि प्रमात्मा तिन्या मणु जो दंड दीणा थू| तिनी तैस सोगी बल्लू, “जैहणै तक मुं फिरी थऊँ बरखा भूणै ताई ना बल्लू तैहणै तक इस्रायल रै राज्य मंज ना बरखा भूणी अतै ना ही ओस पैणी|”एसै गलै अहाब जो एतना गुस्सा करी दिता कि तिनी एलिय्याह जो मारनै रा फैसला करू|

ठेरै ताई प्रमात्मै एलिय्याह सितै बल्लू कि सो बणा मंज गिची करी अहाब थऊँ लुकी गच्छा| एलिय्याह बणा मंज तेस सोते बलै गो जैठीया जो गाणै ताई प्रमात्मै तैसियो दस्सू थू| हर भयागा अतै हर संझा, पखेरु एलिय्याह ताई रोट्टी अतै मॉस लेईकरी इन्दै थीयै| एस पुरै टैमै, अहाब अतै तसेरी सेना एलिय्याह री खोज करंदै रैह, पर सो तैसियो खोजी ना पायै|

बरखा ना भूणै थऊँ कुछ टैमा बाद सो सोता हुकी गो| ठेरैताई एलिय्याह नेड़ै रै ही अक्की देशा जो चली गो| तैस देशा मंज अक्क गरीब विधवा थी जैसा बलै अक्क पुत्र थू| तिन्या बलै खाणै जो लगभग मुकी गछुरा थू क्योकि तैठी कोई फसल ना भछुरी थी| पर फिरी भी, तैसै जनानीयै एलिय्याह री देखभाळ करी, ठेरैताई प्रमात्मै तसारी अतै तसारै पुत्रा री जरूरता जो पूरा करू, एस कारण थऊँ तसारै पिठ्ठै रा भाण्डाँ अतै तसारै तैला री कुप्पी कदी खाली ना भुई| तैस पुरै अकाल रै दोरान तिन्या बलै खाणा थू| एलिय्याह कुछ साला तिकर तैठी रेऊ|

साढ़ै त्रीं साला रै बाद, प्रमात्मै एलिय्याह सितै बल्लू कि सो फिरी थऊँ बरखा करला| तिनी एलिय्याह सितै वापस इस्रायल रै राज्य मंज गिचीकरी अहाब सितै गल्ला करनै ताई बल्लू| ठेरैताई एलिय्याह अहाब बलै गो| जैहणै अहाबै तैसियो हेरू ता तिनी बल्लू, “अच्छा तू हा, मुसीबत पैदा करनै वाळा!” एलिय्याहै जबाब दित्ता, “मुसीबत पैदा करनै वाळा ता तू हा! तेई यहोवा जो त्यागी दितुरा हा| सो ही सच्चा प्रमात्मा हा, पर तू बाल री पूजा करू करंदा हा| अबै तुद इस्रायल राज्य रै सबी मणु जो कम्रेल पाड़ा पुर लेई करी इणा हा|”

अत: सब मणु कम्रेल पाड़ा जो गै| सो मड़द भी आयै जेड़ै बलदै थीयै कि सो बाल रै संदेसा जो बलदै हिन्| एह बाल रै भविष्यवक्ता थीयै| सो सब 450 थीयै| एलिय्याहै मणु सोगी बल्लू, “कैहणै तिकर तुहै अपणै मना जो फराई रखलै? जे यहोवा प्रमात्मा हा ता तसेरी आराधना करा! जे बाल प्रमात्मा हा ता तसेरी पूजा करा!”

तैहणै एलिय्याहै बाल रै भविष्यवक्ता सोगी बल्लू, “अक्की बाळदा जो बलि करीके तसेरै मासा जो बलिदान भूणै ताई अक्की वेदी पुर रखा, पर आग अंत लंदै| तठेरै बाद मुं भी तिन्या ही करना, अतै अक्क लग वेदी पुर मुं तैस मासा जो रखणा| तैहणै जे प्रमात्मा वेदी पुर पैन्दा हा ता तुसू जाणी लैणा कि सो सच्चा प्रमात्मा हा|” तैहणै बाल रै भाविश्य्वक्तै अक्की बलि जो तयार करू अपर आग ना लाइ|

तैहणै बाल रै भाविश्य्वक्तै बाल सितै प्रार्थना करी, “हे बाल, इंदी हुण!” पूरा धैड़ा तिन्यै प्रार्थना करी अतै बकै अतै ऐठीया तिकर कि अप्पू जो चाकू सितै बड्डी लेऊ, अपर बालै जबाब ना दित्ता, अतै तिनी कोई आग ना फैकीं|

बाल रै भाविश्य्वक्तै बाल सोगी प्रार्थना करनै मंज लगभग पूरा धैड़ा बिताई दित्ता| अतै तिन्यै प्रार्थना करना बंद करी दित्ता| तैहणै एलिय्याहै दुयै बाळदा रै मासा जो तैस बलिदान पुर तैहणै तिकर डोळनै ताई बल्लू जैहणै तक कि मॉस, लकड़ी, अतै एठीया तक कि वेदी रै आसपास री जमीन पुरी तरह थऊँ सीजी ना गेई|

तैहणै एलिय्याहै प्रार्थना करी कि, “ हे यहोवा, अब्राहम, इसहाक, अतै याकूब रै प्रमात्मा, असियो दस कि तुहै इस्रायल रै प्रमात्मा हिन् अतै एह कि अऊँ तुन्दा दास हा| मिंजो जबाब देया कि मणु इन्या जाणी लैणा कि तुहै ही सच्चै प्रमात्मा हिन्|”

तुरंत ही, अम्बर थऊँ आग पेई अतै तिनी मॉस, लकड़ी, घोड़ी, चिक, अतै ऐठीया तक कि वेदी रै आसपास रै पाणी जो भी फुकी दित्ता| जैहणै मणुयै एह हेरू, सो जमीना पुर पेई गै अतै बल्लू, “यहोवा ही प्रमात्मा हा! यहोवा ही प्रमात्मा हा!

तैहणै एलिय्याहै बल्लू, “बाल रा अक्क भी भविष्यवक्ता बची करी ना गिची सका!” ठेरैताई मणुयै बाल रै भविष्यवक्ता जो पकड़ी लेऊ अतै तिन्या जो तैठीया थऊँ लग लेई गै अतै तिन्या जो मारी दित्ता|

तैहणै एलिय्याहै अहाब राजै सितै बल्लू, “तोंळा अपणी जगह जो नहीं गा, क्योकि बरखा भूणै वाळी हा|” झट ही बदळ घणै भूची गै, अतै भरी बरखा शुरू भूची गेई| यहोवा तैस अकाल जो खत्म करू करदा थू| एत थऊँ प्रकट भुआ कि यहोवा ही सच्चा प्रमात्मा हा|

जैहणै एलिय्याहै अपणै कमा जो खत्म करी दित्ता, ता प्रमात्मै एलीशा नां रै अक्की मड़दा जो अपणा भविष्यवक्ता भूणै ताई चुणु| प्रमात्मै एलीशा रै दोआरा बड़ै चमत्कार करै| अक्क चमत्कार नामान सोगी भुआ| सो अक्क दुशमणा री सेना रा सरदार थू, अपर तसियो चमड़ी रा अक्क बुरा रोग भूची गछुरा थू| नामानै एलीशा रै बारै मंज हुणुरा थू, ठेरैताई सो एलीशा बलै आ अतै तैस सितै तैसीयो ठीक करनै ताई बिनती करी| एलीशै नामान सितै बल्लू कि गिचिकरी यरदन नदी रै पाणी मंज सात बरी डूबकी लाइ लै|

नामान गुस्सा भूची गो| तिनी एसा करनै थऊँ ना करी दिती, क्योकि एह तैसियो मुर्खता रा कम लगन्दा थू| अपर बादा मंज तिनी अपणा मन बदली लेऊ अतै गिचिकरी यरदन नदी रै पाणी मंज सात बरी डुबकी लगाई| जैहणै आख़री बरी सो पाणी थऊँ बाहर निकळू ता प्रमात्मै तैसियो ठीक करी दित्ता|

प्रमात्मै इस्रायल रै मणु बलै होरी मतै सारै भविष्यवक्ता जो भैज्जू| तिन्या सबीयै मणु सितै मूर्ति री पूजा करना बंद करनै ताई बल्लू| ठेरै बजाय, तिन्या जो अक्की दुयै रै सोगी न्याय सितै वर्ताव करन चेहिन्दा अतै अक्की दुयै पुर दया करना चेहिंदी| तिन्या भविष्यवक्तै मणु जो चेतावनी दित्ती कि तिन्याजो बुरै कमा जो बंद करी दीणा हा अतै ठेरै बजाय प्रमात्मै री गल्ला रा पालन करना हा| जे तिन्या मणुयै एसा ना करू ता प्रमात्मा तिन्या जो दोषी मन्नीकरी तयांरा न्याय करना, अतै तिन्या जो दंड दीणा|

ज्यादा टैमै, तिन्या मणुयै प्रमात्मै री आज्ञा रा पालन ना करू| अक्सर तिन्यै भविष्यवक्ता सोगी बुरा वर्ताव करू अतै ऐठीया तक कि कदी-कदी तिन्या जो मारी दित्ता| अक्क बरी, तिन्यै यिर्मयाह भविष्यवक्ता जो हक्कै खुआ मंज पाई दित्ता अतै तैसियो मरनै ताई छड्डी दित्ता| सो खुआ रै तळा मज चिकड़ा मंज धसी गो| पर तैहणै राजा जो तैस पुर दया आई अतै तिनी अपणै सपाई जो हुक्म दित्ता कि यिर्मयाह रै मरनै थऊँ पैहलै तैसियो खुआ थऊँ खिंजी लेन|

भविष्यवक्ता रै दोआरा प्रमात्मै री तरफ बलना जारी रखु भलै ही मणुयै तिन्या सितै नफरत करी| तिन्यै मणु जो चेतावनी दित्ती कि प्रमात्मै तिन्या बलै मसीह जो भैजणै री प्रतिज्ञा करी हा|