20. बंधूआई अतै फिरना

इस्रायल रै राज्य अतै यहूदा रै राज्य धुनीयै प्रमात्मै रै वरुद्ध पाप करू| तिन्यै तैसा वाचा जो तरोड़ी दित्ता जेड़ी प्रमात्मै तिन्या सोगी सीनै पुर ब्स्न्नी थी| प्रमात्मै तिन्या जो पश्चाताप करनै अतै फिरी थऊँ तसेरी आराधना करनै ताई चेतावनी दिणै ताई अपणै भविष्यवक्ता जो भैज्जू, अपर तिन्यै तयांरी गल्ला जो मनणै ताई ना करी दित्ती|

अत: प्रमात्मै तयांरै दुशमणा जो नाश करनै मंज काबल करनै रै दोआरा धुनी राज्य जो दण्डित करू| अश्शुर अक्क होर देश थू जेड़ा बड़ा शक्तिशाली भूची गछुरा थू| सो दूयै देशा रै प्रति बड़ै निर्दयी भी थीयै| तिन्यै इचिकरी इस्रायल रै राजै जो नाश करी दित्ता| अश्शुरियै इचीकरी इस्रायल रै राज्य मंज मतै जो मारी दित्ता, जेड़ा चाऊ सो लुटी लेऊ, अतै देशा रै कई हेस्सै जो फुकी दित्ता|

अश्शुरियै सबी अगुवै, अमीर मणु, अतै एसै मणु जो जेड़ै कीमती चिजा बणाई सकन्दै थीयै अक्क सोगी कठेरु अतै सो तिन्या जो अश्शुर देशा जो लेई गै| इस्रायल मंज केवल कुछ गरीब इस्रायली ही बचै|

फिरी अश्शुरी मणु तैस देशा मंज रैहणै वाळै ताई विदेशी जो लेईकरी आयै| तिन्या विदेशीयै तिन्या नगरा जो फिरी थऊँ बणाऊ| जेड़ै इस्रायली तैठी बचुरै थीयै तिन्या सितै तिन्यै बैह करै| इन्या मणु रै वंशज सामरी कहलायै|

यहूदा रै राज्य रै मणुयै हेरू कि किन्या प्रमात्मै तैस पुर विशवास ना करनै अतै तसेरी गल्ला जो ना मनणै रै कारण इस्रायल रै राज्य रै मणु जो दण्डित करू थू| अपर तैहणै भी तिन्यै कनानी रै देवतै री मूर्ति री पूजा करी| प्रमात्मै तैसियो चेतावनी दीणै ताई भविष्यवक्ता जो भैज्जू, अपर तिन्यै हुणनै थऊँ ना करी दिती|

लगभग 100 साला रै बाद अश्शुरियै इस्रायल रै राज्य जो नाश करी दित्ता| प्रमात्मै बेबीलोन रै राजा, नबूकदनेस्सर जो यहूदा रै राज्य पुर हमला करनै ताई भैज्जू| बेबीलोन अक्क शक्तिशाली देश थू| यहूदा रा राजा नबूकदनेस्सर रा दास बणनै अतै हर साल तैसियो मतै सारै धना रा भुगतान करनै ताई सेहमत भूची गो|

अपर कुछ साला बाद, यहूदा रै राजै बेबीलोन रै वरुद्ध बलवा करू| अत: बेबीलोनीयै वापस इची करी यहूदा रै राज्य पुर हमला करी दित्ता| तिन्यै यरुशलेम नगर पुर कब्जा करी लेऊ, मंदरा जो खत्म करी दित्ता, अतै नगर अतै मंदरा रै खज़ानै जो लुटी लेई गै|

बलवा करनै रै कारण यहूदा रै राजै जो दण्डित करनै ताई, नबूकदनेस्सर रै सपाईयै राजै रै पुत्रा जो तसेरै सामणै मारी दित्ता अतै फिरी तैसियो अँधा करी दित्ता| ठेरै बाद, सो राजै जो लेई गै ताकि सो बेबीलोन रै जेलखानै मंज मरी गच्छा|

नबूकदनेस्सर अतै तसेरी सेना रै राज्य रै लगभग सबी मणु जो बेबीलोन लेई गेई, केवल सबी थऊँ गरीब मणु जो प्चुं छडी करी ताकि सो बगड़ी मंज फसल उगान| टैमा रै एस काला जो बंधूआई बल्या गो हा, जेतमंज प्रमात्मै रै मणु जो प्रतिज्ञा रै देशा थऊँ कडणै जो विवश करूरा थू|

भलै ही प्रमात्मै अपणै मणु जो तयांरै पापा ताई बंधूआई मंज नीणै रै दोआरा दण्डित करू|, ता भी सो तिन्या जो या अपणी प्रतिज्ञा जो ना भूलुरा थू| प्रमात्मै अपणै मणु री निगरानी करना जारी रखु अतै अपणै भविष्यवक्ता रै दोआरा तिन्या सितै गल्ला करन्दा रेऊ| तिनी प्रतिज्ञा करी कि सतर साला बाद, सो फिरी थऊँ प्रतिज्ञा रै देशा मंज फिरना|

लगभग सत्तर साला बाद, फारस रै राजा कुस्रूयै बेबीलोन जो हराऊ, ठेरैताई रैसम्राज्य रै बजाऐ फारस रै साम्राज्य कई देशा पुर शासन करू|इस्रायली मणु अबै यहूदी कहलन्दै थीयै| तिन्या मंज मतै अपणा जीबन बेबीलोन मंज कटुरा थू| कुछ थोड़ै हो यहूदी बुड्डै जो ही यहूदा रा देश याद थू|

फ़ारसी मणु बड़ै सामर्थी थीयै, अपर तिन्यै अपणै जिन्दै मणु पुर दया करी थी| फ़ारसी मणु रा राजा बणनै रै थोड़ै टैमा बाद, कुस्रूयै अक्क आदेश दित्ता कि कोई भी जेड़ा यहूदी यहूदा जो फिरना चाहन्दा थू, सो फारस थऊँ नकेई करी यहूदा जो गिची सकदा हा|ऐथीया तक कि तिनी तिन्या जो मंदरा जो बणाणै ताई पैहै भी दीतै| अत: बंधूआई रै सत्तर साला बाद, यहूदी रा अक्क हलका झुण्ड यहूदा मंज यरूशलेम नगर जो फिरी आयै|

जैहणै सो मणु यरूशलेम पुज्जै ता तिन्यै मंदारा जो अतै नगर री चोरुनी तरफा री दोआला जो फिरी बणाऊ| फ़ारसी मणु अबै भी तिन्या पुर शासन करन्दै थीयै अपर अक्क बरी फिरी थऊँ सो प्रतिज्ञा रै देशा मंज रेऊ करन्दै थीयै अतै मंदरा मंज आराधना करू करदै थीयै|