21. प्रमात्मा मसीह री प्रतिज्ञा करन्दा हा

जैहणै प्रमात्मै संसार री रचना करी थी, सो जाणदा थू कि तैसियो बादा मंज कस धैड़ै मसीह जो भेजणा। तिनी आदम अतै हव्वा सितै प्रतिज्ञा करी कि सो ऐसा करला । तिनी बल्लू कि हव्वा थऊँ अक्क वंशज जन्म लैणा जेड़ा कीड़ै रै हैरा जो दरड़ना। जिनी कीड़ै हव्वा जो धोखा दित्ता सो निसन्देह शैतान थू। प्रमात्मै रा अर्थ थू कि मसीह पूरी तरह सितै शेतान जो हराई दीणा ।

प्रमात्मै अब्राहम सितै प्रतिज्ञा करी थी कि तसेरै द्वारा संसार री पुरी जाति आशीष पाणीया । प्रमात्मै बादा मंज कस टैमा पुर मसीह जो भैजणै रै द्वारा एसा प्रतिज्ञा जो पूरा करना। सो मसीह संसार रै हर अक्क जाति मंज थऊँ मणु जो तयांरै पाप थऊँ छुड़ाणा ।

प्रमात्मै मूसा सितै प्रतिज्ञा करी थी कि भविष्य मंज सो मूसा रै समान अक्क अन्य भविष्यद्वक्ता जो भैजणा। एह भविष्यद्वक्ता मसीह भूणा। एसा रीति सितै, प्रमात्मै फिरी थऊँ प्रतिज्ञा करी कि सो मसीह जो भैजणा।

प्रमात्मै राजा दाऊद सितै प्रतिज्ञा करी थी कि तसेरा अक्क वंशज मसीह भूणा। सो राजा भूणा अतै प्रमात्मै रै मणु पुर सदा ताई शासन करना।

प्रमात्मै यिर्मयाह भविष्यद्वक्ता सितै गल करी अतै बल्लू कि अक्क दिन सो अक्क नोई वाचा बनणीया। सो नोई वाचा इस्राएल सोगी सीनै पुर बन्नी पराणी वाचा जिनी ना भूणी। जैहणै मणु सोगी सो अपणी नोई वाचा जो बनणा, ता तैसतिन्या पुर अप्पू जो व्यक्तिगत रूप सितै प्रकट करना। हर अक्क जन तैस सितै लगाव रखणा अतै तसेरी व्यवस्था रा पालन करनै री इच्छा रखणी हा। प्रमात्मै बल्लू कि एह तसेरी व्यवस्था रा तयांरै दिला पुर लिखी दीणै जीना भूणा। सो तसेरै मणु भूणै, अतै प्रमात्मै तयांरै पापा जो माफ़ करना। सो मसीह भूणा जेड़ा तिन्या सोगी तैसा नोई वाचा जो बनणा।

प्रमात्मै रै भविष्यद्वक्तै एह भी बल्लू कि मसीह अक्क भविष्यद्वक्ता भूणा। अक्क भविष्यद्वक्ता सो व्यक्ति हा जेड़ा प्रमात्मै रै वचना जो हुणदा अतै फिरी मणु पुर प्रमात्मै रै संदेशा री घोषणा करन्दा हा। जैसियो भैजणै रि प्रमात्मै प्रतिज्ञा करी थी सो मसीह अक्क सिद्ध भविष्यद्वक्ता भूणा। मतलब सो मसीह प्रमात्मै रै संदेशा जो अच्छी तरह सितै हुणना, अतै सो मणु जो तिन्या संदेशा जो अच्छी तरह सितै सखाणा।

इस्राएली याजकै मणु ताई प्रमात्मै रै अगुं बलिदान चढ़ाना जारी रखु। ऐह बलिदान मणु रै पापा ताई तिन्या जो प्रमात्मै द्वारा दंडित करनै री जगह पुर चढ़ाए गै थीयै। याजकै मणु ताई प्रार्थना भी करी। अपर, सो मसीह सिद्ध महायाजक भूणा जेड़ा प्रमात्मै जो दीणै ताई अक्क सिद्ध बलि रै रूपा अप्पू जो चढ़ाई दीणा। मतलब, तैस कदी पाप ना करना, अतै जैहणै सो अप्पू जो बलि भूणै ताई दीणा, ता संसारा रा कोई भी अन्य बलि जरूरी ना भूणा ।

मणु रै झुंडा पुर राजा अतै प्रधान शासन करन्दै हिन्, अतै कदी-कदी सो गलती भी करन्दै हिन्। राजा दाऊदै केवल इस्राएलि पूर शासन करू, अपर राजा दाऊद रा वंशज मसीह पूरै संसार पूर शासन करना, अतै तैस सदा ताई शासन करना। ठेरै अलावा, सो हमेशा न्यायपूर्ण रीति सितै शासन करना, अतै सही फैसलै जो लैणा।

प्रमात्मै रै भविष्यद्वक्तै मसीह रै बारै मंज मती गल्ला जो बल्लू । उदाहरण ताई, मलाकीयै बल्लू कि मसीह रै इणै थऊँ पैहलै अक्क होर भविष्यद्वक्ता ईणा। सो भविष्यद्वक्ता बड़ा जरूरी भूणा। ठेरैआलावा, यशायाह भविष्यद्वक्तै लिखू कि मसीह अक्की कुँआरी थऊँ जन्म लैणा। अतै मीका भविष्यद्वक्तै बल्लू कि मसीह बैतलहम नगर मंज जन्म लैणा।

यशायाह भविष्यद्वक्तै बल्लू कि मसीह गलील रै क्षेत्रा मंज वास करना। जेड़ै मणु बड़ै दुःखी हिन् मसीह तिन्या जो शान्ति दिल्ला। तैस कैदि जो भी अजाद करना। मसीह बीमारा जो अतै जेड़ै हुणी ना सकदैं, हेरी ना सकदै, बल्ली ना सकदैं, या चली ना सकदैं तिन्या जो भी चंगा करना।

यशायाह भविष्यद्वक्तै एह भी बल्लू कि मणु मसीह सितै नफरत करनीया अतै तैसियो अपनाणै थऊँ ना करी दीणी हा । होरी भविष्यद्वक्तै बल्लू कि मसीह रा अक्क साथी तसेरै वरुद्ध उठणा। जकर्याह भविष्यद्वक्तै बल्लू कि तसेरा एह साथी ऐसा करनै ताई दूयै मणु थऊँ चाँदी रै ती सिक्कै लैणै। ठेरै अलावा, कुछ भविष्यद्वक्तै बल्लू कि मणु मसीह जो मारी दीणा, अतै एह कि सो तसेरै ओडणा ताई जुआ खेलणा।

भविष्यद्वक्तै एह भी दस्सू कि मसीह किन्या मरना। यशायाहै भविष्यद्वाणी करी कि मणु मसीह पूर थूकणा, तसेरा मजाक उड़ाणा, अतै तैसियो जकणा। तिन्या तैसियो बिनी दीणा अतै तैस बड़ी पीड़ा अतै यातना मंज मरी गाणा, जबकि तिनी कुछ भी गलत ना करूरा भूणा ।

भविष्यद्वक्तै एह भी दस्सू कि मसीह पाप ना करना। सो सिद्ध भूणा। अपर तैस ठेरताई मरना क्योकि प्रमात्मै तैसियो होरी मणु रै पापा रै कारण दंडित करना। तसेरै मरने थऊँ मणु प्रमात्मै सोगी मेल करने मंज काबल भूणै। ठेरैताई प्रमात्मा चाहन्दा हा कि मसीह मरा।

भविष्यद्वक्तै एह भी दस्सू कि प्रमात्मै मसीह जो मरूरै थऊँ जिन्दा करना । एह दर्शान्दा हा कि एह सब नोई वाचा जो बनणै री प्रमात्मै री योजना थी, ताकि सो तिन्या मणु बचाई सका जिन्यै तसेरै वरुद्ध पाप करू हा।

प्रमात्मै भविष्यद्वक्ता पुर मसीह रै बारै मति जिनी गल्ला जो प्रकट करू, अपर मसीह तिन्या भविष्यद्वक्ता मंज कसी रै भी जीवनकाल मंज ना छुरा थू। इन्या भविष्यद्वाणि रै दितै गाणै रै 400 थऊँ ज्यादा साला रै बाद, सही टैमा पुर, प्रमात्मै मसीह जो इस संसार मंज भैजणा ।