22. यूहन्ना रा जन्म

अतीत मंज, प्रमात्मै अपणै भविष्यद्वक्ता सितै गल करी थी ठेरैताई सो मणु सोगी गल करी सकै थीयै। अपर तैस टैमा थऊँ लेईकरी 400 साला रै बीतणै तक तिनी तिन्या सोगी गल ना करी । तैहणै प्रमात्मै जकर्याह नां रै भविष्यद्वक्ता बलै अक्की स्वर्गदूता जो भैज्जू। जकर्याह अतै तसेरी लाड़ी एलीशिबा प्रमात्मै रा आदर करन्दै थयै। सो बड़ेै बूड्डै भूची गछुरै थीयै, अतै तैस बलै कोई संतान पैदा ना भछुरी थी।

तिनी स्वर्गदूतै जकर्याह सितै बल्लू, "तेरी लाड़ी बलै अक्क पुत्र पैदा भूणा। तू तसेरा नां यूहन्ना रखणा। प्रमात्मै तैसियो पवित्र आत्मा सितै परिपूर्ण करना, अतै यूहन्ना मणु जो मसीह जो ग्रहण करनै ताई तैयार करना।" जकर्या है जवाब दित्ता, "मुं अतै मेरी लाड़ी संतान पैदा करनै ताई बड़ै बूडडै हिन्! अऊँ किन्या जाणु कि आप मिंजो सितै सच बल्लू करदै हिन् ?"

तिनी स्वर्गदूतै जकर्याह जो जवाब दित्ता, " तीजो बलै एस शुभ संदेश जो लेईणै ताई अऊँ प्रमात्मै भैज्जू हा। क्योकि तेई मिंजो पुर विश्वाश ना करू, ठेरै ताई बच्चै पैदा भूणै तक तूद ना बली पाणा।" तुरन्त ही, जकर्याह कणैई ना पाऊ। तैहण सो स्वर्गदूत जकर्याह थऊँ चली गो। ठेरै बाद, जकर्याह घरा जो फिरी आ अतै तसेरी लाड़ी गर्भवती भुई।

जैहणै एलीशिबा छः महीनै रि गर्भवती थी, ता सो ही स्वर्गदूत अचानक थऊँ एलीशिबा री रिश्तेदार पूर प्रकट भूआ, जसेरा नां मरियम थू। मरियम कुँआरी थी अतै बैह भूणै ताई यूसुफ नां रै मड़दा सोगी तसारी मंगणी भूची चुकूरी थी। स्वर्गदूतै बल्लू, "तूद गर्भवती भूणा अतै अक्की पुत्रा जो जन्म दिणा। तुद तसेरा नां यीशु रखना हा। वह सर्व-शक्तिमान प्रमात्मै रा पुत्र भूणा अतै सदा ताई शासन करना।"

मरियमै जवाब दित्ता, "एह किन्या भूणा, क्योकि अऊँ ता कुँआरी हा?" तिनी स्वर्गदूतै समझाऊ, "पवित्र आत्मा तीजो पूर ईणा, अतै प्रमात्मै री सामर्थ तीजो पूर छां करनिया। ठेरैताई सो शिशु पवित्र भूणा, अतै सो प्रमात्मै रा पुत्र भूणा।" जेड़ा तिनी स्वर्गदूतै बल्लू तैस पूर मरियमै विश्वास करू।

एह भूणै रै तुरन्त बाद, मरियमै गिचिकरी एलीशिबा सितै भेंट करी। जिंया ही मरियमै तैसियो नमस्कार करू, एलीशिबा रा शिशु तसारै अंदर उछलू। तयांरै ताई प्रमात्मै जेड़ा करू थू तसेरै बारै मंज सो जनानी खुश भूईं। एलीशिबा सोगी तराई महीनै रैहणै रै बाद, मरियम घरा जो फिरी गई।

ठेरै बाद, एलीशिबै अपणै बालक जो जन्म दित्ता। जकर्याह अतै एलीशिबै तैस बालक रा नां यूहन्ना रखू, जिंया कि तिनी स्वर्गदूतै आदेश दित्ता थू। तैहणै प्रमात्मै जकर्याह रा मुह खोली दित्ता। जकर्याहै बल्लू, "प्रमात्मै री स्तुति भोआ, क्योंकि तिनी अपणै मणु री मदद करना याद रखु हा ! हे मेरे पुत्र, तू सर्व-शक्तिमान प्रमात्मै रा भविष्यद्वक्ता भूणा। तूद मणु जो दसणा कि सो किन्या अपणै पापा ताई माफ़ी पाई सकदै हिन् ! "