23. यीशु रा जन्म

यूसुफ ना रै अक्की धर्मी मणु सोगी मरियम री मंगणी भूची चुकुरी थी । जैहणै तिनी हुणु कि मरियम गर्भवती हा ता सो जाणदा थू कि सो तसारा बच्चा निया । अपर, सो मरियम जो बदनाम ना करना चाहन्दा थू, ठेरैताई तिनी तैसा पुर कृपा करनै री अतै तैसाओ चुपचाप तलाक दिणै री सोची। अपर एत थऊँ पैहलै कि सो ऐसा करन्दा, अक्की स्वर्गदूतै तसेरै सुपने मंज इचिकरी तैस सितै गल करी।

तिनी स्वर्गदूतै बल्लू, "हे यूसुफ, मरियम जो अपणी लाड़ी बणाणै थऊँ मत डर। तसारै अंदर जेड़ा बच्चा हा सो पवित्र आत्मा री तरफा थऊँ हा । तैसा अक्की पुत्रा जो जन्म दिणा। तसेरा नां यीशु रखैं (जठेरा अर्थ हा, 'यहोवा बचन्दा हा), क्योकि तैस मणु जो तयांरै पापा थऊँ बचाणा।"

अतः यूसुफै मरियम सितै बैह करू अतै तैसा जो लाड़ी बणाई करी घरा जो लेई आ, अपर तसारै बच्चे जो जन्म दिणै तिकर सो तैसा सोगी ना सोऊ।

जैहणै मरियम प्रसूता भूणा लगी, ता तैहै अतै यूसुफै बैतलहम गाणै री अक्क लंबी यात्रा करी। तिन्या जो तैठी गाणा ही थू क्योकि रोमी अधिकारी इस्राएल मंज रहणै वाळै सभी मणु री गिनती करना चाहन्दै थीयै। सो चाहन्दै थीयै कि सभी मणु तैठी गान जैठी तयांरै पूर्वज रैहन्दै थीयै। राजा दाऊद रा जन्म बैतलहम मंज भूआ थू, अतै सो मरियम अतै यूसुफ धुनी रा पूर्वज थू|

मरियम अतै यूसुफ बैतलहम गै, अपर तैठी जानवरा जो रखणै वाळी जगह रै अलावा तयांरै ठैहरनै ताई कोई जगह ना थी। सो ही स्थान थू जैठी मरियमै अपणै बच्चै जो जन्म दित्ता। तिनी तैसियो चरनी मंज रखु क्योकि तैठी तसेरै ताई कोई बिस्तर ना थू। तिन्यै तसेरा नां यीशु रखू।

तैसा राती, तैठी नेड़ै ही बगड़ी मंज कुछ पाअल अपणी भैड़ा री रखवाली करू करदै थीयै। अचानक थऊँ, अक्क चमकदार स्वर्गदूत तिन्या पुर प्रकट भूआ, अतै सो डरी गै। तिनी स्वर्गदूतै बल्लू, "मत डरा, क्योकि मिंजो बलै तुसू ताई शुभ संदेश हा। बैतलहम मंज मसीह, रा जन्म भूआ हा!"

गिची करी तैस बच्चे री खोज करा, अतै तुहै तैसियो ओडणा मंज लिपटूरा अतै चरनी मंज सुतुरा पाणा।" अचानक थऊँ, अम्बर स्वर्गदूता सितै भरी गो। सो प्रमात्मै री स्तुति करृ करदै थीयै। तिन्यै बल्लू, "सारी महिमा स्वर्ग मंज विराजमान प्रमात्मै जो मुळा। पृथ्वी पूर तिन्या मणु मंज शान्ति भोआ जयांरी सो चिन्ता करदा हा!"

तैहणै स्वर्गदूत चली गै। सो पाअल भी अपणी भैड़ा जो छडी करी बच्चै जो हेरना गै। तोंळै ही सो तैसा जगह पूर पुज्जै जैठी यीशु थू अतै तिन्यै तैसियो चरनी मंज सुतुरा हेरू, जिंया कि तिनी स्वर्गदूतै बल्लू थू। सो बड़ै खुश थीयै। तैहणै सो पाअल वापस तैठी फिरी गै जैठी तयांरी भैड़ा थीं। तिन्यै जो कुछ भी हुणु अतै हेरू तैस ताई सो प्रमात्मै री स्तुति करू करदै थीयै।

पूर्व मंज दूर अक्क देशा मंज कुछ मड़द थीयै। तिन्यै सतारै रा अध्ययन करूरा थू अतै सो बड़ै बुद्धिमान थीयै। तिन्यै अक्की असामान्य सतारै जो अम्बरा मंज हेरू। तिन्यै बल्लू कि ठेरा अर्थ हा कि यहूदि रै अक्की नोयै राजा रा जन्म भूआ हा। ठेरैताई तिन्यै तैस बच्चै जो जाचणै ताई अपणै देशा थऊँ यात्रा करनै रा फैसला करू। अक्की लंबी यात्रा रै बाद, सो बैतलहम आए अतै सो घर मुळू जैठी यीशु अतै तसेरै माता-पिता ठैरुरै थीयै।

जैहणै इन्यै मड़दै यीशु जो अपणी मोआ सोगी हेरू ता तिन्यै घुटनै टेकी करी तसेरी आराधना करी। तिन्यै यीशु जो कीमती उपहार दितै। फिरी सो घर वापिस फिरी गै।