24. यूहन्ना यीशु जो बपतिस्मा दिंदा हा

एलीशिबा अतै जकर्याह रा पुत्र यूहन्ना, मोटा भुचिकरी अक्क भविष्यद्वक्ता बणी गो। सो बणा मंज रैहन्दा थू, अतै जंगली मखिर अतै टिड्डि खन्दा थू, अतै ऊँट रै रोम सितै बणुरै ओडणा लंन्दा थू।

मतै मणु यूहन्ना री गल्ला हुणनै ताई बणा मंज निकळी आय। तिनी एह बली करी तिन्या जो प्रचार करू, "पश्चाताप करा, क्योकि स्वर्गा रा राज्य नेड़ै हा!"

जैहणै मणुयै यूहन्ना रै संदेशा जो हुणु, ता तिन्या मंज मतै अपणै पापा थऊँ पश्चाताप करू, अतै यूहन्नै तिन्या जो बपतिस्मा दित्ता। यूहन्ना जो जाचणै ताई मतै धार्मिक अगुवै भी आय, अपर तिन्यै अपणै पापा रा पश्चाताप या अंगीकार ना करू ।

यूहन्नै धार्मिक अगुवै सितै बल्लू, "हे जहरीलै कीड़ैयो! पश्चाताप करा अतै अपणै व्यवहार जो बदला। प्रमात्मै हर सो रुखा जो बड्डी दिणा जेड़ा खरा फळ ना लेईन्दा, अतै तैस तिन्या जो अगी मंज झोंकी दिणा।" जेड़ा भविष्यद्वक्तै बल्लू थू यूहन्नै तैसियो पूरा करू, "हेर, तोळैं ही मु तेरै अगै अपणै संदेशवाहक जो भैजणा जेड़ा तेरै ताई रस्तै जो तैयार करना।"

कुछ धार्मिक अगुवै यूहन्ना थऊँ पूछु कि कै सो मसीह हा। यूहन्नै जवाब दित्ता, "अऊँ मसीह नीया, अपर सो मेरै बाद इछु करदा हा। सो ऐतना महान हा कि अऊँ तसेरै जुत्तै रै तसमै खोलनै रै भी काबल निया।"

अगलै धैड़ै, यीशु बपतिस्मा लैणै ताई यूहन्ना बलै आ। जैहणै यूहन्नै तैसियो हेरू, ता तिनी बल्लू, "हेरा! प्रमात्मै रा मेमना जेड़ा संसार रै पापा जो चुकी करी लेई गाणा।"

यूहन्नै यीशु सितै बल्लू, "अऊँ तीजो बपतिस्मा दीणै रै काबल निया। बजाए ठेरै जरूरी हा कि तू मिंजो बपतिस्मा देया।" अपर यीशुयै बल्लू, "तीजो मिंजो बपतिस्मा दीणा चहिन्दा, क्योकि करनै ताई सही काम ऐही हा।" अतः यूहन्नै तैसियो बपतिस्मा दित्ता, जबकि यीशुयै कदी पाप ना करूरा थू।

बपतिस्मा दिणै रै बाद जैहणै यीशु पाणी थऊँ निकळी करी बाहर आ, ता प्रमात्मै रा आत्मा कबूतरा रै रूपा मंज प्रकट भुआ अतै थल्लै इचिकरी तैस पूर बैही गो। तैस ही टैमै, प्रमात्मै स्वर्गा थऊँ । तिनी गल करी, "तू मेरा पुत्र हा। अऊँ तीजो सितै प्रेम करन्दा हा, अतै अऊँ तीजो थऊँ बड़ा खुश हा।"

प्रमात्मै यूहन्ना सितै बल्लू थू, "पवित्र आत्मा थल्लै इचिकरी कसी पूर ठैहरी गाणा जैसियो तू बपतिस्मा दिल्ला।" सो ही प्रमात्मै रा पुत्र हा प्रमात्मा अक्क ही हा। परन्तु जैहणै यूहन्नै यीशु जो बपतिस्मा दित्ता, ता तिनी प्रमात्मै पिता जो गल्ला करन्दै हुणु, पुत्रै प्रमात्मै जो हेरू, जो कि यीशु हा, अतै तिनी पवित्र आत्मा जो हेरू।