50. यीशु वापस फिरन्दा हा

लगभग 2,000 साला थऊँ, संसार मंज सबी जगहा पुर ज्यादा थऊँ ज्यादा मणु मसीह यीशु रै बारै मंज शुभ संदेश जो हुणु करंदै हिन्। कलीसिया उन्नति करू करदी हा। यीशुयै वादा करू कि सो संसार रै अंत मंज वापस फिरना। यद्यपि सो अलि वापस ना आ हा, ता भी तैस अपणै वादै जो पूरा करना।

जैहणै कि अहै यीशु रै वापस फिरनै री भाळ करन्दै हिन्, प्रमात्मै असू थऊँ एसा रीति सितै ही जीवन जीणै री इच्छा करन्दा हा जेड़ा पवित्र हा अतै जेड़ा तसेरा आदर करन्दा हा। जैहणै यीशु पृथ्वी पुर रेऊ करदा थू तैहणै तिनी बल्लू, "मेरै चेलै संसार मंज सबी जगहा रै मणु जो प्रमात्मै रै राज्य रै बारै मंज शुभ संदेश प्रचार करना, अतै तैहणै अंत चली ईणा।"

मती जिनी जातियै अलि तक यीशु रै बारै मंज ना हुणु हा। स्वर्गा जो फिरनै थऊँ पैहलै, यीशुयै मसीही थऊँ तिन्या मणु जो शुभ संदेश हुणाणै जो बल्लू जिन्यै एतियो कदी ना हुणु हा। तिनी बल्लू, "गच्छा अतै सबी जाति रै मणु जो चेला बणा!" अतै "कटाई करनै ताई खेत पकी चुकूरै हिन्!"

यीशुयै यह भी बल्लू, "कसी मणु रा सेवक अपणै स्वामी थऊँ बडा ना भुन्दा। इस संसार रै महत्वपूर्ण मणुयै मिंजो सितै नफरत करी, अतै मेरै कारण तिन्या तुसू जो भी सताणा अतै मारी दिणा। इस संसार मंज तुसू पीड़ित भूणा, परन्तु मज़बूत बणा, क्योंकि मैंई शैतान जो हराई दित्ता हा जेड़ा इस संसार पुर शासन करन्दा हा। जे तुहै अंत तक मेरै विश्वासयोग्य बणी रेहन, ता प्रमात्मै तुसू जो बचाणा!"

यीशुयै अपणै चेलै जो यह समझाणै ताई अक्क कहाणी हुणाई कि जैहणै संसार रा अंत भुन्दा हा ता मणु सोगी कै भूणा। तिनी बल्लू, "कसी मणुयै अपणी बगड़ी मंज खरा बीज बोऊ। जैहणै सो सोऊ करदा थू ता तसेरा शत्रु आ अतै कणका रै बिया रै मंजै जंगली बूटा रै बिया जो बाई दित्ता, अतै फिरी सो चली गो।"

जैहणै बूट अंकुरित भूयै ता सेवकै तैस मणु सितै बल्लू, 'हे स्वामी, तेई ता अपणी बगड़ी मंज खरा बी बाऊ थू। ता फिरी एत मंज जंगली बूट क्यों हिन् ?' तिनी मणुै ने जवाब दिता, 'केवल मेरै शत्रुयै ही तिन्या जो बाऊ बोना । एह मेरा कोई शत्रु हा जिनी ऐसा करू हा।'

तिन्यै सेवकै अपणै स्वामी जो जवाब दित्ता, 'कै असूओ जंगली बूटा जो पुट्टी दिणा चेहिन्दा?' तिनी मालकै बल्लू, 'ना। जे तुसू इन्या करना ता तुसू कणका जो भी पुट्टी दिणा। कटाई रै टैमा तिकर भाळ करा। तैहणै जंगली बुट्टा जो खड्डै मंज कट्ठेरी लेया ताकि तुहै तिन्या जो फुक्की स्कन। अपर कणका जो मेरै पेड़ू मंज लेईकरी अईया।'

चेलै एसा कहाणी रै मतलब जो ना समझाऊ, ठेरैताई तिन्यै यीशु सितै तिन्याजो समझाणै रा निवेदन करू। यीशुयै बल्लू, "खरा बी बाणै वाळा मणु मसीह रा प्रतिनिधित्व करन्दा हा। खेत संसार रा प्रतिनिधित्व करन्दा हा। करा बी प्रमात्मै रै राज्य रै मणु रा प्रतिनिधित्व करन्दा हा।"

जंगली बूट तैस दुष्ट जन, शैतान रै मणु रा प्रतिनिधित्व करन्दै हिन्। तैस मणु रा शत्रु शैतान रा प्रतिनिधित्व करन्दा हा, जिनी जंगली बूट्टा जो बाई दित्ता थू। कटाई एस संसार रै अंत रा प्रतिनिधित्व करन्दी हा, अतै कटाई करनै वाळै प्रमात्मै रै स्वर्गदूता रा प्रतिनिधित्व करन्दै हिन्।

जैहणै संसार रा अंत भूणा तैहणै स्वर्गदूत तिन्या सबी मणु जो अक्क सोगी कट्ठैरना जेड़ै शैतान रै हिन्। तिन्या जो स्वर्गदूता अक्की बड़ी ही गर्म अग्गी मंज फैंकी दिणा। तैठी तिन्या मणु भयंकर सताव मंज रुणा अतै अपणै दाँत पीणै। अपर जेड़ै मणु धर्मी हिन्, जिन्यै यीशु रा अनुसरण करू हा, तिन्या तयांरै प्रमात्मै पिता रै राज्य मंज सूरजा समान चमकणा।

यीशुयै एह भी बल्लू कि तैस संसार रा अंत भूणै थऊ पैहलै पृथ्वी पुर फिरना। तैस तैसही तरीकै सितै वापस ईणा जिंया सो गो थू। मतलब, तैस बलै वास्तविक शरीर भूणा, अतै तैस अम्बरा मंज बादळा पुर सवार भुचिकरी ईणा। जैहणै यीशु फिरन्दा हा, ता हर अक्क मसीही जेड़ा मरी चुकूरै हिन् मरूरै थऊँ जी उठणा अतै तैस सितै अम्बरा मंज मुळना।

तैहणै जेड़ै मसीही अलि भी जिन्दै हिन् सो अम्बरा मंज चुकी लैणै अतै तिन्या दुयै मसीहि सोगी शामिल भूची गाणा जेड़ै मरूरै थऊँ जी उठूरै हिन्। सो सबी तैठी यीशु सोगी भूणा। तठेरै बाद, यीशु अपणै मणु सोगी रैहणा। जैहणै सो अक्क सोगी रैहन्दै हिन् ता तिन्या बलै सदा ताई पूरी शान्ति भूणी।

यीशुयै तैस पुर विश्वास करनै वाळै हर अक्क जन जो अक्क मुकुट दीणै रि प्रतिज्ञा करी हा। तिन्या सदा ताई प्रमात्मै रै सोगी हर आक्क चीज पुर शासन करना। तिन्या बलै सिद्ध शान्ति भूणी ।

अपर प्रमात्मै तिन्या सबी रा न्याय करना जेङै यीशु पुर विश्वास ना करन्दै हिन्। तैस तिन्या जो नरक मंज पाई दिणा। तैठी तिन्या रूणा अतै अपणै दाँत पीणै, अतै तिन्या हमेशा पीड़ित भुन्दै रैहणा। कदी ना बुझणै वाळी अग्गी तिन्या यो लगातार फुकदै रैहणा, अतै कीड़ै तिन्या जो खाणै थऊँ कदी ना रुकणा।

जैहणै यीशु फिरदा हा, ता तैस पूरी रीति सितै शैतान जो अतै तसेरै राज्य जो नष्ट करी दीणा। सो शैतान जो नरका मंज पाई दिणा। तैठी शैतान हमेशा ताई फुकिन्दा रैहणा, तिन्या सबी सोगी जिन्यै प्रमात्मै रि गल्ला जो मानणै रै बजाए शैतान रै पीछे चलने रा चुनाव करू थू।

क्योकि आदम अतै हव्वै प्रमात्मै री आज्ञा ना मन्नी थी अतै पाप जो ऐस संसार मंज लेईकरी आए थीयै, प्रमात्मै तैसीयो श्राप दिता अतै तैसीयो खत्म करनै रा निर्णय करू। पर कसी धैङै प्रमात्मै अक्क नोऐ स्वर्ग अतै आक्क नोई पृथ्वी री रचना करला जेङै सिद्ध भूणै।

यीशु अतै तसेरै मणु तैसा नोई पृथ्वी पुर रैहणा, अतै सो सदा ताई सबी चीजा पुर शासन करना। सो मणु री हाख्रि थऊँ हर आक्क टिपळै जो पूँजी दील्ला। अबै कोई भी पीड़ित या दुःखी ना भुल्ला। सो रोल्लै ना। सो बीमार ना भूणै या मरल्लै ना। अतै तैठी कुछ भी बुराई ना भूणी। यीशु अपणै राज्य पुर न्यायपूर्वक, अतै शान्ति सोगी शासन करना। तैस हमेशा ताई अपणै मणु रै सोगी रैहणा।