49. प्रमात्मै री नोई वाचा

अक्की स्वर्गदूतै अक्की जोआन जनानी मरियम सितै बल्लू कि सो प्रमात्मै रै पुत्र जो जन्म दिल्ली। सो अल्ली कुँआरी थी, पर पवित्र आत्मा तैसा बलै आ अतै सो गर्भवती भूई। तैसै आक्क पुत्र जो जन्म दिता जसेरा ना तैसै यीशु रखु। ठेरैतांई, यीशु परमात्मा अतै मणु दोई हिन्।

यीशुयै बङै चमत्कार करै जेङै दसदै हिन् कि सो परमात्मा हा। सो पाणी पुर चलु अतै आँधी जो शान्त करू। तिनी मतै बमारा मणु जो चंगा करू अतै बङै मणु थऊँ दुष्टात्मा जो कडु। तिनी मरुरै मणु जो जीन्दा करी दिता, अतै तिनी पाँज रोटी अतै दोई मछलि जो 5,000 मणु जो खुआणै तांई पर्याप्त भोजन मंज परिवर्तित करी दिता।

यीशु आक्क महान शिक्षक भी थु। जेड़ा कुछ भी तिनी सिखाऊ, सो तिनी सिद्धता सोगी सिखाऊ। जेड़ा सो मणु सितै करनै तांई बलदा हा सो तिन्या जो करना चेईन्दा क्योकि सो प्रमात्मै रा पुत्र हा। उदाहरण तांई, तिनी सिखाऊ कि तुसु जो होरी मणु जो तैसा रीति सितै प्रेम करनै री आवश्यकता हा जिंया तुहै अपु जो प्रेम करदै हिन्।

तिनी एह भी सिखाऊ कि तुसु जो साब्ब चिजा थऊँ जादा अतै अपणी संपत्ति थऊँ भी जादा प्रमात्मै जो प्रेम करना चेईन्दा ।

यीशुयै बल्लू कि संसार मंज कसी भी चीजा जो प्राप्त करनै थऊँ जादा अच्छा हा प्रमात्मै रै राज्य मंज भूणा। तसेरै राज्य मंज तुन्दै प्रवेश करनै तांई जरूरी हा कि परमात्मा तुसु जो तुन्दै पापा थऊँ बचा।

यीशुयै बल्लू कि कुछ मणु तैसियो ग्रहण करलै। परमात्मा तिन्या मणु जो बचाला। पर दूयै मणु तैसियो ग्रहण ना करलै। तिनी एह भी बल्लू कि कुछ मणु अच्छी जमीना रै साईं हा, क्योकि सो यीशु रै बारै मंज शुभ संदेश जो स्वीकार करी लैन्दै हिन्, अतै परमात्मा तिन्या जो बचन्दा हा। पर कुछ मणु मार्ग री कठोर भूमि रै साईं हिन्। प्रमात्मै रा वीआ रै साईं रस्तै पुर पैन्दा हा, पर तैठी कुछ भी ना लँगदा हा। एह मणु यीशु रै बारै मंज संदेश जो अस्वीकार करी दिन्दै हिन्। सो तसेरै राज्य मंज प्रवेश करनै थऊँ ना करी दिन्दै हिन्।

यीशुयै सिखाऊ कि परमात्मा पापी सितै बङा प्रेम करदा हा। सो तिन्या जो क्षमा करना चान्दा हा अतै तिन्या जो अपणी संतान बणाणा चान्दा हा।

यीशुयै एह भी दसू कि परमात्मा पाप थऊँ घृणा करदा हा। क्योकि आदम अतै हव्वै पाप करू, ठेरैतांई तिन्यारै सब्बी वंशजै भी पाप करू। ऐस संसारा मंज रैणै वाळा हर आक्क जण पाप करदा हा अतै प्रमात्मै थऊँ दूर हा। हर आक्क जण प्रमात्मै रा शत्रु हा।

पर प्रमात्मै एस संसार मंज रैणै वाळै हर आक्क जण सितै एसा रीति सितै प्रेम करू: तिनी अपणै एकलौते पुत्र जो दि दिता ताकि परमात्मा तिन्या जो दण्ड ना देआ जेड़ै तैस पुर विश्वास करदै हिन्। ठेरै बजाए, सो तसेरै सोगी हमेशा रै तांई रैहणै।

तुहै मरनै रै योग्य हिन्, क्योकि तुहै पाप करू हा। तुसु थऊँ प्रमात्मै रा क्रोधित भूणा ठीक ही हा, ठेरी अपेक्षा, सो यीशु पुर गुस्सा भूआ। तिनी यीशु जो क्रूस री मोत दीकरी दण्ड दिता।

यीशुयै कदी पाप ना करू, पर तिनी प्रमात्मै जो तैसियो दण्ड दिणा दिता। तिनी मरी गाणा स्वीकार करू। ऐस रीति सितै, तुन्दै पापा जो अतै ऐस संसार मंज रैहणै वाळै हर आक्क जणै तै पापा जो चुकी लेई गाणै रै तांई सो आक्क सिद्ध बलिदान थु। यीशुयै अपु जो प्रमात्मै रै तांई बलिदान करी दिता, परमात्मा कसी भी पाप जो, एठी तिकर कि भयंकर पापा जो भी क्षमा करदा हा।

भलै ही जे तुहै बङै अच्छै कम्मा जो करदै हीन, ता ठेरै द्वारा परमात्मा तुसु जो ना बचाल्ला। तसेरै दोस्त बणनै तांई ऐसा कुछ भी ना हा जेड़ा तुहै करी सकदै हिन्। ठेरीतांई अपेक्षा, तुसुजो विश्वास करना हा कि यीशु प्रमात्मै रा पुत्र हा, अतै सो तुन्दै बदलै मंज क्रूस पुर मरी गो, अतै एह भी कि प्रमात्मै तैसियो भिरी जीन्दा करी दिता। जे तुहै एस पुर विश्वास करा, ता परमात्मा तुन्दै पापा री क्षमा दील्ला।

परमात्मा तैस हर आक्क जणै जो बचाणा जेड़ा यीशु पुर विश्वास करदा हा अतै तैसियो अपणा प्रभु स्वीकार करदा हा। पर सो तिन्या जो ना बचाल्ला जेङा तैस पुर विश्वास ना करदै हिन्। ऐह कोई मायने ना रखदा कि तुहै धनी भून या गरीब भून, मङद भून या जनानी भून, बूडै भून या जवान भून, या तुहै कङी रैन्दै भून। परमात्मा तुसु सीतै प्रेम करदा हा अतै चाहन्दा हा कि तुहै यीशु पुर विश्वास करा कि सो तुन्दा दोस्त बणी सका।

यीशु तुसु जो हदू करदा हा कि तैस पुर विश्वास करा अतै बपतिस्मा लेआ। कै तुहै विश्वास करदै हिन् कि प्रमात्मै रा एकलौता पुत्र, यीशु ही मसीह हा? कै तुहै विश्वास करदै हिन् कि तुहै आक्क पापी हिन् अतै एह कि तुहै प्रमात्मै द्वारा तुसु जो दंडित करै गाणै रै योग्य हिन्? कै तुहै विश्वास करदै हिन् कि तुन्दै पापा जो मटाणै रै तांई यीशु क्रूस पुर मरु?

जे तुहै यीशु पुर अतै जेङा तिनी तुन्दै तांई करू हा तैस पुर विश्वास करदै हिन्, ता तुहै आक्क मसीही हिन्! शैतान अपणै अंधकार रै राज्य मंज अबै तुसु पुर शासन ना करदा हा। अबै प्रमात्मै अपणै प्रकाश रै राज्य मंज तुसू पुर शासन करदा हा। तिनी तुसु जो पाप करनै थऊँ रोकी दिता हा, जैसियो तुहै करु करदै थीयै। तिनी तुसु जो आक्क नोआ, उचित जीवन दिता हा।

जे तुहै आक्क मसीही हिन् ता जेङा यीशुयै करू हा तसेरै कारण प्रमात्मै तुन्दै पापा जो क्षमा करी दिता हा। अबै, परमात्मा आक्क शत्रु री अपेक्षा तुसियो आक्क घनिष्ठ दोस्त मनदा हा।

जे तुहै प्रमात्मै रै दोस्त हिन् अतै प्रभु यीशु रै सेवक हिन् ता तुहै तिन्या गल्ला रा पालन करनै री इच्छा करलै जेङा यीशु तुसु जो सिखान्दा हा। भलै ही तुहै आक्क मसीही हिन्, शैतान अल्ली भी पाप करनै तांई तुन्दी परीक्षा करल्ला। पर परमात्मा हमेशा सो करदा हा जेङा सो बलदा हा कि सो करल्ला। सो बलदा हा कि जे तुहै अपणै पापा जो मन्नी लेआ, ता सो तुसू जो क्षमा करी दिल्ला। सो तुसू जो पाप रै विरुद्ध लड़नै री सामर्थ दिल्ला।

परमात्मा तुसु जो प्रार्थना करनै अतै तसेरै वचन जो पढ़नै तांई बलदा हा। सो तुसु जो होरी विश्वासि रै सोगी मिलीकरी तसेरी आराधना करनै तांई भी बलदा हा। तुसु जो होरी मणु जो भी दसणा हा कि तिनी तुन्दै तांई कै करू हा। जे तुहै इंया सब्बी कम्मा जो करन, ता तुहै तसेरै आक्क पक्कै दोस्त बणी गाणै ।