48. यीशु ही प्रतिज्ञा करूरा मसीह हा

जैहणै प्रमात्मै संसार जो बणाऊ ता सब कुछ खरा थु। कोई पाप ना थु। आदम अतै हव्वा अक्की दूयै जो प्रेम करदै थीयै, अतै सो प्रमात्मै सितै प्रेम करदै थीयै। कोई बमारी या मृत्यु ना थी। प्रमात्मै ऐसै ही संसार जो चाहन्दा थु।

शैतानै कीड़ै रै दुआरा थऊं बगीच मंज हव्वा सितै गाल्ल करी, क्योकि सो तैसायो धोखा दिणा चाहन्दा थु। तैहणै हव्वा अतै आदमै प्रमात्मै रै वरुद्ध पाप करू। क्योकि तिन्यै पाप करू थु ठेरैतांई पृथ्वी पुर रैहणै वाळै सब जणै मरदै हिन् ।

क्योकि आदम अतै हव्वै पाप करू थु, ठेरैतांई कुछ होर भी बुरा भूआ। सो प्रमात्मै रै शत्रु बणी गै। तठैरै परिणाम-स्वरूप, तैहणै थऊँ हर आक्क जणै पाप करू हा। हर आक्क जन जन्म थऊँ ही प्रमात्मै रा शत्रु हा। प्रमात्मै अतै मणु रै बीचा,मंज शान्ति ना थी। पर प्रमात्मा शान्ति स्थापित करना चाहन्दा थु।

प्रमात्मै प्रतिज्ञा करी कि हव्वा रा आक्क वंशज शैतान रै मुण्डा जो कुचळी दिल्ला। तिनी एह भी बल्लू कि शैतान तसेरी खुरी जो डसल्ला। दूयै शब्दा मंज, शैतान मसीह जो मारी दिल्ला, पर प्रमात्मै तैसीयो भिरी जीन्दा करी दिल्ला। ठेरै बाद, मसीह शैतान री शक्ति जो हमेशा रै तांई मुकाई दिल्ला। कई साल्ला रै बाद, प्रमात्मै प्रकट करू कि सो मसीह यीशु हा।

प्रमात्मै तैसा बाढ़ थऊँ अपणै परिवार जो बचाऊ जैसीयो सो लेईणै वाळा थु। नूह सितै आक्क नाव बनाणै तांई बल्लू कि सो ऐस प्रकार प्रमात्मै तिन्या मणु जो बचाऊ जेड़ै तैस पुर विश्वास करदै थीयै। ऐस प्रकार, सो साब्ब रै साब्ब प्रमात्मै रै द्वारा मारी दीणै रै योग्य थीयै क्योकि तिन्यै पाप करूरा थु। पर प्रमात्मै तिन्या सब्बी जो बचाणै तांई यीशु जो भैजू जेड़ै तैस पुर विश्वास करदै हिन्।

होआ साल्ला तिकर, याजक प्रमात्मै तांई बलिदान चढ़ान्दै रैह। एह दर्शान्दा हा कि मणुणै पाप करू, अतै एह कि सो प्रमात्मै रै द्वारा तिन्या जो दंडित करै गाणै रै योग्य थीयै। पर सो बलिदान तिन्यारै पापा जो क्षमा ना करी सकै थीयै। यीशु सब थऊँ बड़ा महायाजक हा। तिनी सो करू जेङा कोई याजक ना करी सकदा थु। तिनी सो एकमात्र बलिदान भुणै तांई अपु जो दि दिता जेङा हर कसी रै पापा जो मिटाई सकदा थु। तिनी स्वीकार करू कि परमात्मा तिन्या सब्बी रै पापा तांई तैसीयो दंडित करा। एस कारण, यीशु सिद्ध महायाजक थु।

प्रमात्मै अब्राहम सितै बल्लू, "अऊँ तेरै द्वारा संसार रै सब्बी कुला जो आशीष दिल्ला।" यीशु एसी अब्राहम रा वंशज थु। परमात्मा अब्राहम रै माध्यम थऊँ सब्बी कुला जो आशीष दिन्दा हा, क्योकि जेङै यीशु पुर विश्वास करदै हिन् परमात्मा तिन्या सबी जो पापा थऊँ बचान्दा हा। जैहणै एह मणु यीशु पुर विश्वास करदै हिन्, ता परमात्मा तिन्या जो अब्राहम रै वंशज मनदा हा।

प्रमात्मै अब्राहम सितै बल्लू कि सो अपणा एकलोता पुत्र, तसेरै तांई बलिदान करी देया। पर भिरी प्रमात्मै इसहाक रै बदलै मंज बलि करनै तांई आक्क मेमना दिता। अहै साब्ब अपणै पापा रै तांई मारी दीणै रै योग्य थीयै! पर प्रमात्मै ईन्दी जगह पुर मरनै तांई यीशु जो बलिदान रै रूप मंज दिता। ऐसी कारण थऊँ अहै यीशु जो प्रमात्मै रा मेमना बलदै हिन्।

जैहणै प्रमात्मै मिस्र पुर अंतिम विपत्ति भैजी ता तिनी हर अक्की इस्राएली परिवार सितै बल्लू कि सो अक्की मेमने री बलि करा। तैस मेमने मंज कोई दोष ना भूणा चेईन्दा। तैहणै अपणै दारा री चौखटा रै ऊपर अतै ब्रखा मंज तिन्या जो तसेरै लहू जो लाणा थु। जैहणै प्रमात्मै तैस लहू जो हेरु ता सो तन्यारै घरा थऊँ आगै बढ़ी गो अतै तन्यारै पहलौठे पुत्रा जो ना मारु। जैहणै एह भुआ ता प्रमात्मै एतियो फसह रा त्यौहार बल्लू ।

यीशु फसह रै त्यौहार रै आक्क मेमने रै साईं हा। तिनी कदि पाप ना करू, ठेरैतांई तैत मंज कुछ भी गलत ना थु। सो फसह रै त्यौहार रै टैमा पुर मरु। जैहणै कोई यीशु पु'र विश्वास करदा' हा, तैहणै यीशु रा लहू तैस मणु रै पापा री कीमत चुकान्दा हा। ऐह ऐसा हा जैसा कि परमात्मा तैस मणु रै नेङै थऊँ अगै बढ़ी गो, क्योकि सो तैसीयो दण्ड ना दिन्दा हा।

प्रमात्मै इस्राएली मणु रै सोगी आक्क वाचा बन्नी, क्योकि सो ऐसै मणु थीयै जिन्या जो प्रमात्मै अपणा भूणै रै तांई चुणुरा थु। पर अबै प्रमात्मै आक्क ऐसी वाचा बन्नी हा जेङी कि सब्बी रै तांई हा। जे कसी भी जाति रा कोई भी जन एसा नोई वाचा जो स्वीकार करदा हा, ता सो परमात्मैं रै मणु मंज शामिल भूची गंदा हा। सो ऐसा ठेरैतांई करदा हा क्योकि सो यीशु पुर विश्वास करदा हा।

मूसा आक्क ऐसा भविष्यद्वक्ता थु जिनी प्रमात्मै रै वचन जो बड़ी सामर्थ सोगी प्रचार करू थु। पर यीशु सब्बी भविष्यद्वक्ता मंज सब थऊँ मोट्टा हा। सो परमात्मा हा, ठेरैतांई जेङा कुछ भी तिनी करू अतै बल्लू सो प्रमात्मै रै कार्य अतै वचन थीयै। ठेरैतांई पवित्र-शास्त्र यीशु जो प्रमात्मै रा वचन बलदा हा।

प्रमात्मै राजा दाऊद सितै प्रतिज्ञा करी थी कि राजा रै रूपा मंज तसेरा आक्क वंशज प्रमात्मै रै मणु पुर सदा तांई शासन करल्ला। यीशु प्रमात्मै रा पुत्र अतै मसीह हा, ठेरैतांई सो राजा दाऊद रा वंशज हा जेङा सदा तांई राज्य करी सकदा हा।

दाऊद ता इस्राएल रा राजा थु, पर यीशु सब्बी जगत रा राजा हा! तैस भिरी ईणा अतै सदा तांई न्याय अतै शान्ति रै सोगी अपणै राज्य पुर शासन करना।