47. फिलिप्पी मंज पौलुस अतै सीलास

जैहणै शाऊलै सम्पूर्ण रोमी साम्राज्य मंज यात्रा करी ता तिनी अपणै रोमी नां "पौलुस" रा उपयोग करना शुरू करी दिता। आक्क धैङै, पौलुस अतै तसेरा दोस्त सीलास फिलिप्पी नगरा मंज यीशु रै बारै मंज शुभ संदेश हुणाणै तांई गै। सो नगरा रै बाहर नदी रै कनारै अक्की जगह पुर गै जैठी मणु प्रार्थना करनै तांई कट्ठै थीयै। तैठी सो लुदिया नां री अक्की जनानी सितै मुळै जेङी अक्क व्यापारी थी। सो प्रमात्मै सितै प्रेम करदी थी अतै तसेरी आराधना करदी थी।

प्रमात्मै लुदिया जो यीशु रै बारै मंज संदेश पुर विश्वास करनै तांई सक्षम करू। पौलुस अतै सीलासै तैसियो अतै तसेरै परिवार जो बपतिस्मा दिता। तिनी पौलुस अतै सीलास जो अपणै घरै ठैहरनै तांई आमंत्रित करू, ठेरैतांई सो तैठी ठैहरी गै।

पौलुस अतै सीलास मणु सितै अक्सर तैसा जगह पुर मुळदै थीयै जैठी यहूदी मणु प्रार्थना करदै थीयै। रोज जैहणै सो तैठी गन्दै थीयै ता आक्क दासी कुळी जेड़ी दुष्टात्मा द्वारा भरूरी थी तन्यारा पीछा करदी थी। तैसा दुष्टात्मा रै माध्यम सितै सो मणु रा भविष्य दसदी थी, ठेरैतांई सो भविष्य दसणै वाळी रै रूपा मंज अपणै स्वामि तांई बङा धन कमादी थी।

तन्यारै गन्दै टैमै एह दासी कुळी अल्ला पांदी थी, "एह मणु परम प्रधान प्रमात्मै रै सेवक हिन्। एह तुसु जो उद्धार पाणै रा रस्ता दसू करदै हिन्!" सो रोज ऐसा करदी थी जैस थऊँ कि पौलुस नाराज़ भूची गो।

अंत मंज,आक्क धैङै जैहणै तैसै दासी कुळीयै अल्ला शुरू करू, ता पौलुसै तसारी कनारी मुड़ी करी तसारै अंदरा री दुष्टात्मा सितै बल्लू, "यीशु रै ना थऊँ ऐसा थऊँ से निकळी गा।"तैसी टैमै तैसै दुष्टात्मै तसायो छडी दिता।

तैसा दासी कुळी रै स्वामी बङै गुस्सै भूची गै। तिन्या जो पता भूची गो कि बिना तैसा दुष्टात्मा रै सो दासी कुळी मणु जो भविष्य ना दसी सकदी थी। ठेरा अर्थ थु कि मणु अबै तसारै स्वामि जो पैसा ना दिल्लै कि सो तिन्या जो भविष्य दसन कि तन्यारै सोगी कै भुल्ला।

ठेरैतांई तैसा दासी कुळी रै स्वामी पौलुस अतै सीलास जो रोमी अधिकारी बलै लेई गै तिन्यै पौलुस अतै सीलास जो मारू, अतै भिरी तिन्या जो जेलखानै मंज पाई दिता।

तिन्यै पौलुस अतै सीलास जो जेलखानै रै ऐसै हिस्से मंज रखु जैठी सबी थऊँ जादा सपाई थीयै। ऐठी तिकर कि तिन्यै तन्यारै पैरा जो लकड़ी रै बड़ै टुकड़ै मंज जोड़ी दिता। पर पौलुस अतै सीलास अधी राती रै टैमै, प्रमात्मैय री स्तुति रै गीता गाऊ करदै थीयै।

आक्कदम थऊँ, आक्क भयानक भूकम्प भूआ! जेलखानै रै साब्ब द्वार खुली गै, अतै साब्बी कैदी री जंजीरा खुली करी टिरी पेई।

तैहणै दरोगा जागी गो। तिनी हेरू कि जेलखानै रै द्वार खुलुरै थीयै। तिनी सोचु कि साब्ब कैदी बची करी नही गै थीयै। सो डरी गो कि तन्यारै नही गाणै रै कारण रोमी अधिकारी तैसियो मारी दिणा, ठेरैतांई सो अपु जो मारी दीणै तांई तैयार भूची गो! पर पौलुस तैसियो हेरी करी चिल्लाऊ, "रुकी गा! अपु जो नुकसान मत पुजा। अहै साब ऐठी हिन् ।"

तैस दरोगै कमदै कमदै पौलुस अतै सीलास रै नेङै इचिकरी पूछु, "उद्धार पाणै रै तांई अऊँ कै करूँ?" पौलुसै जवाब दिता, "प्रभु यीशु पुर विश्वास कर, ता तू अतै तेरा घराना उद्धार पाला।" तैहणै सो दरोगा पौलुस अतै सीलास जो अपणै घरै लेई गो अतै तन्यारै जख्मा जो धोऊ। पौलुसै तसेरै घरा रै सब मणु जो यीशु रै बारै मंज शुभ संदेश हुणाऊ।

दरोगा अतै तसेरै पूरै टवरै यीशु पुर विश्वास करू, ठेरैतांई पौलुस अतै सीलासै तिन्या जो बपतिस्मा दिता। तैहणै दरोगै पौलुस अतै सीलास जो भोजन करवाऊ, अतै सो सोगी खुश भुए।

अगलै धैङै नगरा रै अगुवै पौलुस अतै सीलास जो जेलखानै थऊँ स्वतंत्र करी दिता अतै फिलिप्पी थऊँ चली गाणै तांई बल्लू। पौलुस अतै सीलास लुदिया अतै कुछ होरी दोस्ता सितै मुळै अतै तठेरै बाद नगरा थऊँ निकळी गै। यीशु रै बारै मंज शुभ संदेश फैलन्दा गो, अतै कलीसिया बधन्दी गेई।

पौलुस अतै होरी मसीही अगुवै बङै नगरा री यात्रा करी। तिन्यै मणु जो यीशु रै बारै मंज शुभ संदेश हुणाऊ। तिन्यै कलीसिया रै विश्वासि जो उत्साहित करनै अतै शिक्षा दीणै तांई कई चिठ्ठी भी लिखी। ऐत थऊँ कुछ पत्री बाइबल री कताबा बणी गेई।