46. पौलुस मसीही विश्वासी बणी गंदा हा

शाऊल ना रा आक्क मणु थु जिनी यीशु पुर विश्वास ना करुरा थु। जैहणै सो जोआन थु, तैहणै तीनी स्तिफनुस जो मारनै वाळै मणु रै ओडणा री निगरानी करी थी। बादा मंज, तिनी विश्वासी जो सताऊ थु। तिनी यरूशलेम मंज घरै-घरै गिचिकरी मङद अतै जनानी धुनी जो गिरफ्तार करीकै जेलखानै मंज पाई दिता थु। तैहणै महायाजकै शाऊल जो दमिश्क नगरा मंज गाणै री अनुमति दीती। तिनी तैठी रै मसीहि जो गिरफ्तार करनै अतै तिन्या जो वापस यरूशलेम लेईकरी ईणै रै तांई शाऊल सितै बल्लू ।

अतः शाऊलै दमिश्क गाणै री यात्रा शुरू करी। तैस नगरा जो पुजणै थऊँ पैहलै ही, तसेरै चरूनी कनारी अम्बरा थऊँ आक्क उज्जवल प्रकाश चमकु, अतै सो जमीना पुर टिरी पेऊ। शाऊलै कसी जो बलदै हुणु, "हे शाऊल! हे शाऊल! तू मिंजो कयो सताऊ करदा हा?" शाऊलै पूछु, "हे प्रभु, तू कुण हा?" यीशुयै तैसीयो जवाब दिता, "अऊँ यीशु हा। तू मिंजो सताऊ करदा हा!"

जैहणै शाऊल ऊठु ता सो हेरी ना सकदा थु। तसेरै मित्र तैसीयो दमिश्क मंज लेईकरी गै थीयै। शाऊलै त्राई धैङै तिकर कुछ भी खऊरा पिऊरा ना थु।

दमिश्क मंज हनन्याह ना रा आक्क चेला थु। प्रमात्मै तैस सितै बल्लू, "तैस घरा जो गा जैठी शाऊल ठैरुरा हा। अपणै हथा जो तैस पुर रख ताकि सो भिरी हेरना लगा।" पर हनन्याहै बल्लू, "हे प्रभु, मेंई हूणुरा हा कि इनी मणुयै विश्वासी जो किंया सताऊरा हा।" प्रमात्मै तैसीयो जवाब दिता, "गा! मेंई तैसीयो यहूदी मंज अतै दूई जाति रै मणु मंज मेरै ना री घोषणा करनै रै तांई चुणी लेऊ हा। तैस मेरै ना तांई बङा कष्ट सैहणा।"

अतः हनन्याह शाऊल बलै गो, अपणै हथा जो तैस पुर रखु, अतै बल्लू, "यीशुयै, जेङा ऐठी ईणै रै तेरै मार्ग मंज तीजो पुर प्रकट भूआ थु, मिंजो तीजो बलै भैजू हा ताकि तू भिरी हेरना लगा, अतै पवित्र आत्मा तीजो भरी देआ।" तैहणै ही शाऊल भिरी हेरना लगी पेऊ, अतै हनन्याहै तैसीयो बपतिस्मा दिता। तैहणै शाऊलै भोजन करू अतै भिरी बलवंत भूची गो।

तैहणै थऊँ, शाऊलै दमिश्क मंज रैहणै वाळै यहूदी मंज प्रचार करना शुरू करी दिता। तिनी बल्लू, "यीशु ही प्रमात्मै रा पुत्र हा!" यहूदी मणु हैरान थीयै, क्योकि शाऊल ता विश्वासी जो मारी दिणै री कोशिश करी थी, पर अबै तिनी यीशु पुर विश्वास करू थु। शाऊलै यहूदी सोगी वाद-विवाद करू। तिनी दसु कि यीशु ही मसीह थु।

बङै धैङै रै बाद, यहूदियै शाऊल जो मारी दीणै री योजना बणाई। तिन्यै तैसियो मारी दीणै तांई नगरा रै फाटका पुर मणु जो भैजु। कि तसेरी निगरानी करा पर शाऊलै तैस योजना रै बारै मंज हुणी लेऊ, अतै तैसीयो दोस्तै बचाई करी निकलनै मंज तसेरी सहायता करी। आक्क रात जो तिन्यै तैसियो टोकरी मंज बहाली करी नगरा री दीवार थऊँ तैसीयो थलै तारी दिता। दमिश्क थऊँ बची करी निकलनै रै बाद शाऊलै यीशु रै बारै मंज प्रचार करना जारी रखु।

शाऊल प्रेरिता सितै मिलनै तांई यरूशलेम गो, पर सो तैस थँऊ डरदै थीयै। तैहणै बरनबास ना रा आक्क विश्वासी शाऊल जो प्रेरिता बलै लेईकरी गो। तिनी तिन्या जो दसू कि शाऊलै किन्या साहसी भुचिकरी दमिश्क मंज प्रचार करू थु। तठेरै बाद, प्रेरितै शाऊल जो स्वीकार करी लेऊ।

कुछ विश्वासी जेड़ै यरूशलेम रै सताव थऊँ नही गै थीयै सो दूर अंताकिया नगरा मंज चली गै थीयै अतै यीशु रै बारै मंज प्रचार करदै थीयै। अंताकिया मंज रहणै वाळै मणु ज्यादातर यहूदी ना थीयै, पर पैहली बरी, तिन्या मंज बङै मणु विश्वासी बणी गै। बरनबास अतै शाऊल इन्या नोए विश्वासि जो यीशु रै बारै मंज होर ज्यादा सखाणै तांई तैठी गै अतै कलीसिया जो मजबूत करू। यीशु पुर विश्वास करनै वाळै पैहली बरी अंताकिया मंज ही "मसीही" कहलाए।

आक्क धैङै, अंताकिया रै मसीही मणु उपवास सोगी प्रार्थना करु करदै थीयै पवित्र आत्मै तिन्या सितै बल्लू, "मेरै तांई बरनबास अतै शाऊल जो तैस कम्मा जो करनै तांई लाग करी देआ जैतियो करनै तांई मेईं तिन्या जो ह्दुरा हा।" ठेरैतांई अंताकिया री कलीसिया बरनबास अतै शाऊल तांई प्रार्थना करी अतै तिन्या पुर अपणै हथा जो रखु। तैहणै तिन्यै तिन्या जो अन्य बङी जगह पुर यीशु रै बारै मंज शुभ संदेश रा प्रचार करनै रै तांई भैजी दिता। बरनबास अतै शाऊलै लाग-लाग जाति रै मणु जो शिक्षा दीती, अतै बङै मणुयै यीशु पुर विश्वास करू।