45. स्तिफनुस अतै फिलिप्पुस

पैलै मसीही अगुवै रै बीचा मंज स्तिफनुस ना रा अक्क मङद थु। सब मणु तसेरा आदर करदै थीयै। पवित्र आत्मै तैसियो बङी सामर्थ अतै बुद्धि प्रदान करुरी थी। स्तिफनुसै बङै चमत्कार करै थीयै। जैहणै तिनी यीशु पुर भरोसा करनै रै बारै मंज तिन्या जो शिक्षा दित्ती ता बङै मणुयै तैस पुर विश्वास करू।

अक्क धैङै, स्तिफनुस यीशु रै बारै मंज शिक्षा दिच्छु करदा थु, अतै कुछ ऐसै यहूदी आए जिन्यै यीशु पुर विश्वास ना करूरा थु अतै तसेरै सोगी वाद-विवाद करना शुरू करी दिता। सो बङै गुस्सा भूची गै, ठेरैतांई सो धार्मिक अगुवै बलै गै अतै तसेरै बारै मंज झूठ बल्लू। तिन्यै बल्लू, "अहै स्तिफनुस जो मूसा अतै प्रमात्मै रै बारै मंज बुरी गल्ला बलदै हुणु हा!" ठेरैतांई धार्मिक अगुवै स्तिफनुस जो गिरफ्तार करी लेऊ अतै तैसियो महायाजक अतै यहूदी रै होरी अगुवै रै सामणै लेईकरी आए। होर भी झूठै गवाह आए अतै तिन्यै स्तिफनुस रै बारै मंज झूठ बल्लू ।

महायाजकै स्तिफनुस थऊँ पूछु, "कै एह मणु तेरै बारै मंज सच बल्लू करदै हिन्?" स्तिफनुसै महायाजक जो जवाब दिणै तांई बङी गल्ला जो बलणा शुरू करी दिता। तिनी बल्लू कि अब्राहम रै टैमा थऊँ यीशु रै टैमा तिकर प्रमात्मै इस्राएल रै मणु रै तांई बङै अनोखै काम्म करुरै हिन्। पर मणुयै हमेशा प्रमात्मै री आज्ञा ना मन्नी थी। स्तिफनुसै बल्लू, "तुहै मणु प्रमात्मै रै विरुद्ध हठीलै अतै बलवा करनै वाळै हिन्। तुहै हमेशा पवित्र आत्मा जो अस्वीकार करू,जिन्या कि इन्दै वजुर्गै हमेशा पवित्र आत्मा जो अस्वीकार करू थु अतै हमेशा तसेरै भविष्यद्वक्ता जो मारी दिता थु। पर जेड़ा तिन्यै करू थु तसेरी तुलना मंज तुहै होर भी बुरा करू हा! तुहै मसीह जो मारी दिता!"

जैहणै तिन्यै धार्मिक अगुवै एह हुणु, ता सो ऐतणै गुस्सा भूची गै कि तिन्यै अपणै कन्ना जो बंद करी लेऊ अतै ऊची आवाज मंज चिल्लाए। सो स्तिफनुस जो घसीटी करी नगरा थऊँ बाहर लेई गै अतै तैसियो मारी दीणै तांई तैसियो नाङ मारै।

जैहणै स्तिफनुस मरु करदा थु, सो पुकारी उठु, "हे यीशु, मेरी आत्मा जो ग्रहण कर!" तैहणै सो अपणै जाणु पुर टिरी पेऊ अतै भिरी पुकारी उठु, "हे प्रभु, एह पाप तिन्या पुर मत लान्दा।" तैहणै सो मरी गै।

तैस धैङै, यरूशलेम मंज रैणै वाळै बङै मणुयै यीशु रै विश्वासी जो सताणा शुरू करी दिता, ठेरैतांई विश्वासी मणु होरी जगह जो नही गै। पर ठेरै बावजूद भी, जैठी कठी भी सो गै तिन्यै यीशु रै बारै मंज प्रचार करू।

फिलिप्पुस नां रा यीशु रा आक्क विश्वासी थु। जिंया कि होरी बङै विश्वासियै करू थु सो भी यरूशलेम थऊँ नही गो। सो सामरिया रै क्षेत्र मंज चली गो। तैठी तिनी मणु मंज यीशु रै बारै मंज प्रचार करू। बङै मणुयै तैस पुर विश्वास करू अतै उद्धार पाऊ। अक्क धैङै, फिलिप्पुस रै बलै प्रमात्मै री कनारी थऊँ आक्क स्वर्गदूत आ अतै तैस जो बणा मंज गाणै तांई, अतै अक्की सड़का पुर चलनै तांई बल्लू। फिलिप्पुस तैठीया जो चली गो। जैहणै सो तैसा सड़का पुर चलु करदा थु, ता तिनी आक्की मणु जो अपणै रथा मंज गन्दै हेरु। एह मणु कूश देशा रा आक्क महत्वपूर्ण अधिकारी थु। पवित्र आत्मै फिलिप्पुस सितै बल्लू कि गिचिकरी तैस मणु रै सोगी-सोगी चलै।

ठेरैतांई फिलिप्पुस रथा बलै गो। तिनी हुणु कि सो कूशी प्रमात्मै रै वचन जो पढ़ु करदा थु। जेड़ा यशायाह भविष्यद्वक्तै लिखु थु सो तैतीयो पढ़ु करदा थु। सो एह पढ़ु करदा थु, "सो तैसियो वडणै वाळी भेड़ा रै समान लेई गै, अतै जिंया आक्क मेमना शान्त भुन्दा हा, तिनी भी आक्क शब्द ना बल्लू। तिन्यै तसेरै सोगी बुरा व्यवहार करू अतै तसेरा आदर ना करू। तिन्यै तसेरा प्राण लेई लेऊ।"

फिलिप्पुसै तैस कूशी थऊँ पूछु, "जेङा तू पढ़ु करदा हा कै तू तैतीयो समझदा भी हा?" तिनी कूशीऐ जवाब दिता, "ना। जैहणै तिकर कोई ऐतियो मिंजो ना समझा, तैहणै तिकर अऊँ ऐतियो ना समझी सकदा। कृपा करीके मेरै नेङै इचिकरी बैह। यशायाह एह अपणै बारै मंज लिखु करदा थु या कसी होरी रै?"

फिलिप्पुस रथा पुर चढ़ी करी बैही गो। तैहणै तिनी तैस कूशी मणु जो सो दसु जेड़ा यशायाहै यीशु रै बारै मंज लिखु थु। फिलिप्पुसै प्रमात्मै रै वचना रै बङै होरी भागा री भी चर्चा करी। एस तरीकै सितै, तिनी तैस मणु जो यीशु रै बारै मंज शुभ संदेश हुणाऊ।

फिलिप्पुस अतै सो कूशी चलदै पाणी रै नेङै आए। तिनी कूशीयै बल्लू, "हेर! ऐठी पाणी हा! कै अऊँ बपतिस्मा लेई सकदा हा?" अतै तिनी सारथी सितै रथा जो रोकणै तांई बल्लू।

अतः सो पाणी मंज चली गै, अतै फिलिप्पुसै तैस कूशी जो बपतिस्मा दिता। जैहणै सो पाणी थऊँ बाहर आए, ता पवित्र आत्मा आकदम ही फिलिप्पुस जो चुकी करी कसी होरी जगह जो लेई गो। तैठी फिलिप्पुसै मणु जो यीशु रै बारै मंज दसणा जारी रखु।

सो कूशी अपणै घरा री यात्रा पुर अगै बढ़ी गो। सो खुश थु कि सो अबै यीशु जो जाणदा थु।