44. पतरस अतै यूहन्ना अक्की भिखारी जो चंगा करदै हिन्

अक्क धैङै, पतरस अतै यूहन्ना मंदरा मंज गै। आक्क अपंग मणु भीख मंगणै तांई फाटका पुर बैहुरा थु।

पतरसै तैस लंगड़ै मणु री कनारी हेरु अतै बल्लू, "मिंजो बलै तीजो दिणै तांई पैसा ता निया। पर जेङा मिंजो बलै हा सो अऊँ तीजो दिन्दा हा। यीशु रै नां थऊँ, उठ अतै चाल-फिर!"

झाट ही, प्रमात्मै तैस लंगड़ै मणु जो चंगा करी दिता। तिनी ऐरा-ओरा चलना अतै कूदणा, अतै प्रमात्मै री स्तुति करना शुरू करी दिता। मंदरा रै अंगणा मंज मौजूद मणु हैरान थीयै ।

जल्दी ही मणु री अक्क भीड़ तैस मणु जो हेरनै तांई आई जेङा चंगा भूची गो थु। पतरसै तिन्या सीतै बल्लू, "एह मणु ठीक हा, पर ऐसा गल्ला पुर हैरान मत भुन्दै। अहै ऐसियो अपणी शक्ति सितै चंगा ना करू हा, या ठेरैतांई ना कि अहै प्रमात्मै रा आदर करदै हिन्। बल्कि, सो यीशु हा जिनी ऐस मणु जो अपणी शक्ति सितै चंगा करू हा, क्योकि अहै यीशु पुर भरोसा करदै हिन् ।"

सो तु ही हा जिन्यै तैस रोमी राज्यपाल जो यीशु जो मारी दिणै तांई बल्लू थु। तेंई तैसीयो मारी दिता जेड़ा सब्बी जो जीवन दिन्दा हा। पर प्रमात्मै तैसीयो मरुरै मंज थऊँ जीन्दा करू। तुहै ना समझु कि तुहै कै करु करदै थीयै, पर जैहणै तुहै तिन्या कम्मा करु करदै थीयै, ता जेङा भविष्यद्वक्तै बल्लू थु| सो पूरा भूआ। तिन्यै बल्लू थु कि मसीह दुःख चुआणा अतै मरी गाणा। प्रमात्मै ऐतियो ऐस तरीके सितै भूणा दिता। ठेरैतांई अबै, पश्चाताप करा अतै प्रमात्मै री कनारी फिरा, ताकि सो तुन्दै पापा जो धोईकरी साफ करी देआ।

जैहणै मंदरा रै अगुवै पतरस अतै यूहन्ना जो हुणु, ता सो बङै डरी गै। ठेरैतांई तिन्यै तिन्या जो गिरफ्तार कीरकै जेलखानै मंज पाई दिता। पर जेड़ा पतरसै बल्लू थु तैस पुर बङै मणुयै विश्वास करू। यीशु पुर विश्वास करनै वाळै री संख्या बढ़ी करी लगभग 5,000 भूची गेई।

अगलै धैङै,सो यहूदी अगुवै पतरस अतै यूहन्ना जो महायाजक अतै होर धार्मिक अगुवै रै सामणै लेईकरी आए। सो तैस मणु जो भी लेईकरी आए जेड़ा अपंग थु। तिन्यै पतरस अतै यूहन्ना थऊँ पूछु, "कास अधिकार सितै तुहै तैस अपंग मणु जो चंगा करू ?"

पतरसै जवाब दिता, "एह मणु जेड़ा तुन्दै सामणै खड़ुरा हा एसीयो यीशु मसीह री सामर्थ रै द्वारा चंगा करया गो हा। तुहै यीशु जो क्रूस पुर चढ़ाई दिता, पर प्रमात्मै तैसियो भीरी जीन्दा करी दिता! तुहै तैसियो अस्वीकार करी दिता, पर यीशु रै सामर्थ रै माध्यम रै अलावा उद्धार पाणै रा कोई दूआ रस्ता नीआ!"

सो अगुवै हैरान थीयै कि पतरस अतै यूहन्नै बड़ी साहसी रूप सितै गाल करी थी। तिन्यै हेरु कि एह साधारण मङद थीयै जेड़ा कि अनपढ़ थीयै। पर भिरी तिन्या जो याद आ कि एह मङद यीशु रै सोगी रैह थीयै। ठेरैतांई तिन्यै तिन्या जो बल्लू, "असू तुसियो बङा जादा दंड दिल्लै जे तुहै ऐस मणु यीशु रै बारै मंज मणु जो कोई और संदेश दिन्दै हिन्।" इन्नी बङी गल्ला बलणै रै बाद, तिन्यै पतरस अतै यूहन्ना जो गाणा दिता।