43. कलीसिया री शुरआत भुन्दी हा

यीशु रै स्वर्गा फिरी गाणै थऊँ बाद, चेलै यरूशलेम मंज ही रुकै जैसा कि यीशुयै तिन्या जो करनै जो हुक्म दिता थु। तैठीया रै विश्वासी मणु लगातार आक्क सोगी प्रार्थना करनै तांई कट्ठै भुंन्दै थीयै।

हर साल, फसह रै त्यौहार रै 50 धैङै रै बाद, यहूदी मणु पिन्तेकुस्त ना रै आक्क महत्वपूर्ण धैङै जो मनान्दै थीयै। पिन्तेकुस्त सो टैम थु जैहणै यहूदी मणु कणका री कटाई जो मनान्दै थीयै। सब्बी संसार थऊँ यहूदी मणु पिन्तेकुस्त रै धैङै जो सोगी मनाणै तांई यरूशलेम मंज आए थीयै। एस साल, पिन्तेकुस्त मनाणै रा टैम यीशु रै स्वर्गा जो चली गाणै रै लगभग अक्की हप्तै रै बाद छुरा थु।

जैस टैमै साब्ब विश्वासी मणु सोगी इकट्ठा थीयै, ता जैस घरा मंज सो थीयै आकदम सितै सो तेज ओआ री आवाज सितै भरी गो। तैहणै अग्गी री लपटा साईं हुजणै वाळा कुछ सब्बी विश्वासि रै हैरा रै ऊपर प्रकट भूआ। सो सब पवित्र आत्मा सितै भरी गै अतै तिन्यै अन्य भाषा मंज प्रमात्मै री स्तुति करी। एह सो भाषा थी जैतियो बलनै रै तांई तिन्या जो पवित्र आत्मै सक्षम करू थु।

जैहणै यरूशलेम मंज रैहणै वाळै मणुयै तैस हल्लै जो हुणु, ता सो भीड़ रै रूप मंज यह हेरनै रै तांई सोगी आए कि कै भुछु करदा थु। तिन्यै विश्वासी जो प्रमात्मै द्वारा करूरै बड़ै-बड़ै कम्मा री घोषणा करदै हुए हुणु। सो विस्मित थीयै क्योकि सो तिन्या कम्मा जो अपनी ही भाषा मंज हुणु करदै थीयै।

इन्या मंज कुछ मणुयै बल्लू कि सो चेलै नशै मंज थीयै। पर पतरस ऊठी भूआ अतै तिनी बल्लू, "मेरी गाल्ल हुणा! एह मणु नशै मंज ना हिन्! ठैरै बजाए, जो तुहै हेरदै हिन् सो ही हा जेङा योएल भविष्यद्वक्तै बल्लू थु कि भुल्ला: प्रमात्मै बल्लू, 'अंत रै धैङै मंज, मुं अपणा आत्मा डोळला।'"

हे इस्राएली मङदो, यीशु आक्क ऐसा मणु थु जिनी यह दसणै तांई कि सो कुण थु वङै नोखे काम्म करूरै थीयै। तिनी प्रमात्मै रै सामर्थ थऊँ बङै अद्भुत कम्मा जो करू थु। तुहै यह जाणदै हिन्, क्योकि तुहै इन्या कम्मा जो हेरुरा हा। पर तुहै तैसियो क्रूस पुर चढ़ाई दिता!

यीशु मरी गो पर प्रमात्मै तैसियो मरुरै थऊँ जीन्दा करी दिता। इनी तैसा गल्ला जो पूरा करी दिता जैतीयो अक्की भविष्यद्वक्तै लिखू थु: 'तू अपणै पवित्र जन जो कब्रा मंज हङणा ना दिल्ला।' अहै गवाह हिन् कि प्रमात्मै यीशु जो फिरी थऊँ जीन्दा करी दिता।

प्रमात्मै पितै अबै यीशु जो अपणी सिदी कनारी बहाली करी तैसीयो आदर दिता हा। अतै यीशुयै इन्दै तांई पवित्र आत्मा भैजु हा जिनी कि तिनी प्रतिज्ञा करी थी कि सो भैजला। पवित्र आत्मा ही तिन्या कम्मा जो भूणा दिछु करदा हा जैतियो तुहै हेरु करदै अतै हुणु करदै हिन्।

तुहै तैस मणु, यीशु जो क्रूस पुर चढ़ाई दिता। पर निश्चित रूप थऊँ जाणी लेआ कि प्रमात्मै यीशु जो सब्बी चीज़ा पुर प्रभु अतै मसीह जोई ठहरऊरा हा!

पतरस री हुणनै वाळै मणु तसेरै द्वारा बलुरी गल्ला सितै अंदरा तिकर हिली गै थीयै। ठेरैतांई तिन्यै पतरस अतै चेलै थउँ पूछु, "हे भाइयो, असीयो कै करना चैईन्दा?"

पतरसै तिन्या जो जवाब दिता, "तुसु मंज हर आक्क अपणै पाप तांई पश्चाताप करा ताकि प्रमात्मा तुन्दै पापा जो माफ़ करा, अतै यीशु मसीह रै ना थऊँ बपतिस्मा लेआ। तैहणै सो तुसियो वरदान स्वरूप पवित्र आत्मा भी दिल्ला।"

पतरसै जेङा बल्लू तैस पुर लगभग 3,000 मणुयै विश्वास करू अतै यीशु रै चेलै बणी गै। तिन्यै बपतिस्मा लेऊ अतै यरूशलेम री कलीसिया रा हिस्सा बणी गै।

जैहणै प्रेरितै तिन्या जो शिक्षा दींती ता विश्वासियै लगातार हुणी। सो अक्सर मुळदै थीयै अतै सोगी भोजन करदै थीयै, अतै तिन्यै अक्सर अक्की दूयै रै तांई प्रार्थना करी।तिन्यै मिली करी प्रमात्मै री स्तुति करी अतै जेङा कुछ भी तिन्या बलै थु तिन्यै अक्की दूयै रै सोगी साझा करू। नगरा रा हर अक्क मणु तन्यारै ताईं अच्छा विचार रखदा थु। प्रतिदिन, जादा थऊँ जादा मणु विश्वासी बणदै गै।